Ŋikiru. 104 - Ebaibul

Akuj iŋes erae akasuban ka akainanakinan

¹ Okoe etau kaŋ, kipur Ekapolon. Okoe Ekapolon Akuj kaŋ, irae iyoŋ Akuj ŋina iyakar apolou ŋina iloit daadaŋ. Iyakar iyoŋ akibuses ka apolou ŋina ailiilon.

² Ikimukorit iyoŋ akica ikwa imukoritor elou ituŋanan, ibu iyoŋ topeta kidiama ikwa eema,

³ ibu iyoŋ todukok ere kon kidiama ariwo. Ilosi iyoŋ alodowuon, ilosi iyoŋ alokuwuam.

⁴ Isitiyae iyoŋ ekuwuam alimorya ŋakiro kon; isitiyae iyoŋ akimilyaa akitoodiunia anyunyura kon.

⁵ Ibu iyoŋ kiwuak neni ewuar akwap, ikotere nyiryaŋiryaŋakin jik.

⁶ Ibu iyoŋ torapuwa akwap a ŋakipi ikwa erapuwarya elou ibore, apotu ŋakipi torapuwasi ŋimoru.

⁷ Ani ieyakini iyoŋ ŋakipi, apotu totyakas; apotu totyakas iirarete etoil kon ŋolo agiro.

⁸ Apotu toleleut alomoru, toleleiyasi nakadipaalae, nakiboisyo ŋuna sek ibu iyoŋ tosub aŋuna kec.

⁹ Ibu iyoŋ kiwuak ŋikorin ŋulu nyepedorete ikes akitor, ikotere ikes nyeleleiyasi toburusiyasi akwap nabo.

¹⁰ Ibu iyoŋ kiteleleiya ŋilelyan anakadipaalae, ibu kiwuak ŋayona kidiŋ ŋimukura.

¹¹ Itamasete ikes ŋityaŋ ŋulu ka ariet daadaŋ; emasete a nen ŋityaŋ daadaŋ ŋulu ka ariet ŋulu ikwaan ka ŋisigirya.

¹² Edukete ŋikyeny lokito ŋulu eya nayona ŋun, ido eeosi anaten a ŋikito a ŋul.

¹³ Iyakiununui iyoŋ akiru alokidiama, kilim lomoru, toryamu akwap ŋarereŋisyo a etic kon.

¹⁴ Iturupununui iyoŋ ŋinya aŋuna a ŋibaren ka ŋikinyom aŋuna a ŋituŋa, ikotere itauniata akimuj analup,

¹⁵ toryamuniata epiini ŋolo einakini ikes alakara, toryamuniata akimyet ŋina eninanakinosi tomalumalut, toryamuniata akimuj ŋina einakini ikes agogoŋu.

¹⁶ Eryamunito ŋikito ŋulu ke Ekapolon ŋakipi ŋuna itemokino, ŋikito ŋulu eyakasi Lebanon ŋulu enyaritae Cedar.

¹⁷ Edukete ŋikyeny lokito ŋul; edukete ŋacolikokoi lokito ŋulu enyaritae Pine.

¹⁸ Erae ŋimoru ŋulu aoyak neni iboiyoto ŋityaŋ ŋulu ikwaan ka ŋamee; erae ŋatabab neni eŋopitotor ŋadukae.

¹⁹ Isubunit iyoŋ elap akipimitor ŋapakio ŋuna ke ekaru; edoiyori akoloŋ apaki ŋina itemokinitoe.

²⁰ Isubunit iyoŋ akiryonut, erae nen akuwar, apaki ŋin iŋes elomuniata kiŋa anamon ŋityaŋ daadaŋ ŋulu alyatok.

²¹ Irurumaete ŋiŋatunyo apaki ŋina iwaritotor akimuj, iwarito ikes akimuj ŋina einanakini Akuj ikes.

²² Ani elomuni akoloŋ, toboŋosi, ido topero anaduyon kec.

²³ Eloseneneete ŋituŋa loticisyo kec, kitiyata akitodol eboŋ.

²⁴ Okoe Ekapolon, itiyau iyoŋ ŋiboro ŋulu alalak! Itiyau iyoŋ ikes daadaŋ anaosou kon; ileleba ŋisubuna kon nakwap.

²⁵ Iyoŋ isubunit anam ŋina alalan nooi ka ŋina aoyan, eyakasi tooma keŋ ŋisubuna ŋulu alyatok ŋulu nyimarun, eyakasi tooma keŋ ŋisubuna ŋulu apolok ka ŋulu cicik.

²⁶ Elosete ka eboŋete ŋameeli a nen, ebolya etyaŋ ŋolo apolon nooi ŋolo enyaritae Lepiasan alotooma keŋ.

²⁷ Eyarikinito ŋul daadaŋ neni kon, aŋuna ka aryamun akimuj kec anapaki a ŋina iitanitotor.

²⁸ Ani iinakini iyoŋ ikes akimuj, ecunakinete ani iinakini iyoŋ ikes akimuj, imwokete.

²⁹ Ani iŋeri iyoŋ ikes, ebuli; ani ilemari iyoŋ ekieŋanu kec, etwakete, toruworos ŋalup.

³⁰ Ani iinakini iyoŋ ekieŋanu neni a ŋisubuna kon, eyakaunosi nakwap, iwuanakini iyoŋ nakwap ŋisubuna kon ŋulukitet;

³¹ Elipi torubak apolou ŋina ke Ekapolon ŋikaru ka ŋikaru, elipi tolelyan Ekapolon aŋuna a ŋiticisyo keŋ.

³² Ani iŋolikini Ekapolon akwap, emaranikini akwap, ani etapi Ekapolon ŋimoru epuruunete.

³³ Aeikini ayoŋ neni ke Ekapolon ŋirwa daadaŋ ŋulu ka akiyar kaŋ; aeikini ayoŋ ekipur neni ka Akuj kaŋ, ŋapakio daadaŋ ŋuna ka akiyar kaŋ.

³⁴ Elipi tolakar Ekapolon aŋuna ka akilip kaŋ, anerae alelyani ayoŋ aneni ke Ekapolon.

³⁵ Nai elipi tomunyarae ŋikasecak anakwap; todaunos anakwap ŋulu aronok! Kipur Ekapolon, okoe etau kaŋ. Kipuroe Ekapolon!