Ŋikiru. 103 - Ebaibul

Alakar neni ka Akuj aŋuna ka ajokis keŋ (Ekiruk a Daudi)

¹ Okoe etau kaŋ, kipur Ekapolon, akuwan kaŋ daadaŋ, kipur ekiro keŋ ŋolo asegan.

² Okoe etau kaŋ, kipur Ekapolon, nyikimuryakis ŋuna ajokak daadaŋ ŋuna adau iŋes akitiya.

³ Isyoniyenene Ekapolon ŋasecisya kaŋ daadaŋ, eketaŋaleununui iŋes ayoŋ alodekesyo kaŋ a daadaŋ;

⁴ elakununui iŋes akiyar kaŋ anatwanare, ido akainanakini iŋes ayoŋ amina ŋina nyiryaŋiryaŋa ka akisyon.

⁵ Akainanakini iŋes ayoŋ ŋuna ajokak ŋirwa daadaŋ ŋulu ka akiyar kaŋ ikotere ayoŋ arubakini asorokana, apori ikwa eporyo egole.

⁶ Itiyae Ekapolon ŋuna ka akisyon ka akiyookino neni a daadaŋ a ŋulu iteryamunitae ŋican.

⁷ Abu iŋes kiteyenik Moses ŋakiro keŋ ŋuna etemokinit iŋes akitiya, abu kiteyenik ŋiticisyo keŋ neni a Ŋisirael.

⁸ Isyoniono Ekapolon ka erimaana nyepatana iŋes akiŋo, epol amina keŋ ŋina nyiryaŋiryaŋa.

⁹ Nyikiŋenyanakini iŋes jwi jwi, kori nyerubanakini iŋes eŋoit ŋikaru ka ŋikaru.

¹⁰ Nyikisicani iŋes iwon alopite a ŋolo emaikina ikisicanere iwon aŋuna a ŋasecisya yok, kori nyikicani iŋes iwon alopite a ŋolo emaikina ikisicanere iwon a ŋuna a ŋadyakanareta yok.

¹¹ Elal nooi amina ŋina ka Akuj aneni a ŋulu itopoloorito iŋes, etya alwanis ŋina eyai kidiŋ kidiama ka akwap.

¹² Ebi elwana neni elwania Kide alo To, elwana nooi neni ewuatari iŋes ŋasecisya aneni yok.

¹³ Ikwapei erimaania papa aneni a ŋidwe keŋ; erimaana Ekapolon aneni a ŋulu itopoloorito iŋes,

¹⁴ anerae eyeni iŋes epite ŋolo ikisubunitere iwon, eyeni iŋes atemar ikirae iwon apuwa.

¹⁵ Ani eruwor ŋituŋa, ikwaan ŋirwa kec ka ŋulu a ŋinya; epoloete ikes atipei ikwa ŋatur ŋuna ka ariet;

¹⁶ ŋuna ani ekutakini ekuwuam, toŋopiyasi, toŋopiyasi jik nyeyakaun nabo.

¹⁷ Nai ani eruwor ŋulu itopoloorito Ekapolon, erubakini aneni kec amina ŋina ke Ekapolon ŋina nyiryaŋiryaŋa ŋikaru ka ŋikaru. Erubakini akiyookino ŋina ke Ekapolon aneni a ŋipapae kec ŋanyameta daadaŋ,

¹⁸ erubakinete ŋun aneni a ŋulu iwuapito acamunet ŋina ke Ekapolon, ido totamunito akiwuap ŋakiciketa ŋuna ke Ekapolon.

¹⁹ Ewuak Ekapolon nakuj erae neni ipukator iŋes; iŋes erae ekepukan a daadaŋ.

²⁰ Kipuro Ekapolon, iyes ŋimalaikan keŋ, iyes ŋikajiok ŋulu etirok, ŋulu iwuapito ŋakiciketa keŋ, iyes ŋulu iwuapito ŋakiro keŋ.

²¹ Kipuro Ekapolon, iyes daadaŋ ŋajorei ŋuna anakuj, iyes ŋiketiyak ŋulu ke Ekapolon ŋulu itiyaete ŋuna ecamit iŋes.

²² Kipuro Ekapolon, iyes ŋisubuna keŋ daadaŋ, kipuro iŋes anakiboisyo a daadaŋ a ŋuna ipukat iŋes. Kipur Ekapolon, okoe etau kaŋ!