Ŋikat. 20 - Ebaibul

Kitijikis ŋituŋa a ŋikabilae a ŋuluce ŋituŋa a ekabila a Benjamin

¹ Apotu nai Ŋisirael daadaŋ ameun alo Dan tari Bee-Seba akitodol Gilead, tocunakin daadaŋ kiŋaren Ekapolon nakibois apei alo Misipa.

² Ayakasi natukot ŋin ŋikarikok daadaŋ a ŋikabilae a ŋituŋa a Isirael ka ayakasi nen ŋasigarya ŋuna alosete a ŋakejen ŋalipyo ŋamiae ŋaomwon ŋulu ayakatar ŋiboro ŋulu ke ejie.

³ (Kiirasi ŋituŋa a ekabila a Benjamin atemar etipeiyosi Ŋisirael daadaŋ Misipa.) Kiŋita nai Ŋisirael Elepait temasi, “Tolimokinae isua epite ŋolo etiyakinotor ŋakiro ŋuna aronok nu.”

⁴ Tolimok nai Elepait ŋolo aponi toarae aberu keŋ, Ŋisirael tema, “Abu ayoŋ odolu Gibea lotaun ŋolo a ŋituŋa a ekabila a Benjamin, aŋuna ka akiper nen, ikirukit ayoŋ ka aberu kaŋ ŋina pa eisitae.

⁵ Tosodi apotu ŋituŋa a Gibea potu neni kaŋ nakwaare kirikaut akai ecamito ikes akiar ayoŋ, apotu nai ikes, torata aberu kaŋ tari ŋina atwania.

⁶ Abu nai ayoŋ olemu akuwan a aberu kaŋ otubutubu, ido eyakiya ŋatubutubeta ŋun nakwap a ŋituŋa a Isirael daadaŋ, anerae etiyata ikes akapil alo Isirael.

⁷ Aŋun, tokona iyes Ŋisirael daadaŋ, tolimutu ŋakiro ŋuna itamete iyes atemar iyookino ka ŋuna erae kitiyae aŋuna a ŋakiro a ŋun.”

⁸ Tonyout ŋituŋa daadaŋ ecamuna temasi, “Nyikilosi isua daadaŋ loeemae kosi, mam tari ipei daŋ alokidiŋ kosi ŋini eboŋori kai keŋ.

⁹ Nai ŋuna elosyo isua akitiya neni a ŋituŋa a Gibea, ikes nu: Ilamilamyo isua toyenunae ŋituŋa ŋulu alosete akitijikin ŋituŋa a Gibea.

¹⁰ Alotooma ŋituŋa amiat earyo ŋituŋa ŋitomon alokabilae a daadaŋ a ŋulu a Ŋisirael, eseunio alotooma ŋituŋa aliput earyo ŋituŋa amiat ka alotooma ŋalipyo ŋatomon earyo ŋituŋa aliput, aŋuna ka akiwok akimuj a ŋasigarya a ŋuna elosete akinyaŋar ŋakiro a ŋituŋa a Gibea a etaun a ŋolo a Benjamin, ŋakiro daadaŋ ŋuna ka akapil a ŋina apotu ikes kitiyata alo Isirael.”

¹¹ Aŋun, apotu ŋikilyok daadaŋ alo Isirael kimorikinos aŋuna ka akitijiore ŋituŋa a etaun Gibea.

¹² Kiyakiyasi ŋituŋa a ŋikabilae a Ŋisirael a daadaŋ ŋituŋa lokabila a ŋituŋa a Benjamin temasi, “Anironis ŋin ŋina keponi kitiyae alokidiŋ kus?

¹³ Aŋun, yautu tokona ŋikesyaak ŋulu a Gibea, ikotere toarae isua ikes, tolemarere aronis alo Isirael.” Nai apotu ŋituŋa a ekabila a Benjamin nyecamut ŋakiro ŋuna a ŋiyeneta kec a Ŋisirael a ŋuluce.

¹⁴ Tocunakinos ŋituŋa a ekabila a Benjamin alotaunio a daadaŋ Gibea, alosit akitijiore Ŋisirael ŋuluce.

¹⁵ Akoloŋit ŋin, apotu ŋituŋa a ekabila a Benjamin tocunut alotaunio kec ŋikilyok ŋalipyo ŋatomoniarei ka ŋakanikapei ŋulu ayakatar ŋiboro ŋulu ke ejie, pa imaritae ŋikilyok ŋulu ke etaun Gibea.

¹⁶ Alotooma ŋikilyok ŋul, ayakasi ŋikilyok ŋamiae ŋakanikaarei ŋulu aseunitae ŋulu akedyenyaka, apedori ŋinituŋanan a ŋikilyok a ŋul akimasar amoru a adoe emam akidyak ibore ŋini etya etimat.

¹⁷ Tocunakis Ŋisirael ŋuluce, pa imaritae ŋulu a ekabila a Benjamin, ŋikajiok ŋalipyo ŋamiae ŋaomwon ŋulu ayakatar ŋiboro ŋulujiet.

¹⁸ Toloto Ŋisirael kiŋaren kitipeiyosi Besel neni eŋituniata ikes ŋakiro aneni ka Akuj ebasi, “Ŋae alokidiŋ kosi itipeiyori ekiŋaren akitijikin ŋituŋa a ekabila a Benjamin?” Toboŋok Ekapolon tema, “Ŋituŋa ekabila a Yuda ikes itipeiyorete ekiŋaren.”

¹⁹ Torotokis nai Ŋisirael taparacu sek kiboiyosi diyete Gibea aŋuna ka akitijikin ŋituŋa keŋ.

²⁰ Toloto Ŋisirael akitijikin ŋituŋa a ekabila a Benjamin, kicodosi Ŋisirael akirem ikes alo Gibea.

²¹ Tolomut ŋituŋa a ekabila a Benjamin alo Gibea toara akoloŋit ŋin Ŋisirael ŋalipyo ŋatomoniarei ka ŋaarei.

²² Totitinyokieta Ŋisirael toboŋo, kicodosi nabo anakibois a ŋinapei ecodoritotor akoloŋit ŋina a ekiŋaren.

²³ Kitipeiyosi Ŋisirael, kigworo neni ke Ekapolon apaaran daadaŋ akitodol eboŋ, kiŋita nabo ikes Ekapolon ŋakiro temasi, “Elosyo ba nabo isua diyete akicodor akitijikin ŋiyeneta kosi ŋituŋa a ekabila a Benjamin a?” Toboŋok Ekapolon ikes tema, “Toloto kitijikisi ikes.”

²⁴ Aŋun, apotu Ŋisirael toloto akitijikin ŋituŋa a ekabila a Benjamin akitijikinet ŋina a ŋaarei.

²⁵ Tolomut ŋituŋa a ekabila a Benjamin alo Gibea akitijikin Ŋisirael akitijikinet ŋina a ŋaarei, toara ikes apaki ŋin Ŋisirael ŋalipyo ŋatomon ka ŋakanikauni, ŋikilyok ŋulu ayakatar ŋiboro ŋulu ke ejie.

²⁶ Toloto nabo Ŋisirael daadaŋ Besel kigworo neni ke Ekapolon iboiyete a nen, kiredakis akiron akoloŋit ŋin akitodol eboŋ. Inanakis nai alo kiŋaren Ekapolon ŋainakineta ŋuna epeyo ka ŋamuronisya ŋuna ke ekisil.

²⁷ Kiŋita nabo Ŋisirael aneni ke Ekapolon ŋuna emaikina kitiyata (anerae alorwa a ŋul, ayai nen Asaduku ŋina ka Acamunet ŋina ka Akuj,

²⁸ ido arae Pineas lokoku ke Eleasar a ŋolo erae lokoku ka Aron iŋes etiyae etic ŋolo ka akidarit Asaduku alorwa a ŋul), kiŋita nai Ŋisirael Ekapolon temasi, “Elosyo ba isua nabo akitijiore ŋiyeneta kosi ŋituŋa a ekabila a Benjamin, kori imyekinio?” Toboŋok Ekapolon ikes tema, “Apesi, kitijikis ikes, anerae moi taparacu epotokini ayoŋ ikes napedor kus.”

²⁹ Aŋun, kiwuakis Ŋisirael ŋikilyok ŋulu irimokinito etaun Gibea kidiŋ.

³⁰ Kitipeiyosi nai Ŋisirael akitijikin ŋituŋa ekabila a Benjamin epete ŋirwa ŋiuni, kicodosi nabo akitijikin ŋituŋa a Gibea, lopite ŋolo ecodoritotor.

³¹ Ani elomunete ŋituŋa a ekabila a Benjamin akitijikin ajore a Ŋisirael, apotu Ŋisirael kitataiyasi ikes alotaun. Togeikis nabo ŋituŋa a ekabila a Benjamin akiar ŋasigarya a Ŋisirael, lopite ŋolopei sek a ŋijiesyo a ŋulu a ekiŋaren. Toara ikes Ŋisirael alorotin a ŋulu apolok, epei a ŋirotin a ŋul iŋes erot ŋolo elosere Besel, ŋoloce iŋes ŋolo elosere Gibea, toara daŋ ikes Ŋisirael anariet toara daŋ Ŋisirael ŋulu aapikinit ekimar kec ŋatomoniuni.

³² Totamakis ŋituŋa a ekabila a Benjamin ebe, “Eloun iwon ikes nabo, lopite ŋolo elounitere ekiŋaren.” Nai abasi ikes Ŋisirael, “Oboŋosi etatasi ikes tolwakyata alotaun todolo lorotin.”

³³ Toboŋosi Ŋisirael ŋulu alalak aneni ayai ejie todolo Baal-Tamar, apaki ŋin toporut Ŋisirael ŋulu sek aurumikinito etaun Gibea alo To.

³⁴ Toloto nai ŋikilyok ŋalipyo ŋatomon ŋulu aseunitae alotuŋa a Ŋisirael daadaŋ akitijikin ŋituŋa a ekabila a Benjamin alo Gibea. Tomwanu ejie nooi nyeyenut ŋituŋa a ekabila a Benjamin atemar aapuu amunyar ikes.

³⁵ Kilou Ekapolon ŋituŋa a ekabila a Benjamin alokiŋaren Ŋisirael, toara Ŋisirael ŋituŋa a ekabila a Benjamin akoloŋit ŋin ŋalipyo ŋatomoniarei ka ŋakan ka amiat, arae ŋulu aaryo daadaŋ ŋikilyok ŋulu ayakatar ŋiboro ŋulu ke ejie.

³⁶ Toanyut nai ŋituŋa a ekabila a Benjamin atemar eloun ikes alojie. Apotu ŋasigarya a Ŋisirael ŋuna alalak toboŋosi kaku aneni a ŋituŋa a ekabila a Benjamin, anerae ekinyomito ikes ŋikilyok ŋulu aurumikinito etaun Gibea.

³⁷ Toporut ŋasigarya ŋuna aurumikinito etaun Gibea, tolomasi atipei lotaun, toara a ekileŋ ŋituŋa daadaŋ ŋulu ayakasi lotaun.

³⁸ Erworiunito sek ŋasigarya a Ŋisirael ŋuna alwaka alotaun ka ŋuna aurumikinito etaun atemar ani itupuruunete ŋulu eyakasi tooma etaun akim alotaun,

³⁹ emaikina ŋasigarya ŋuna alwaka alotaun toboŋo kitijikis ŋimoe. Nai aris ŋituŋa a ekabila a Benjamin kegeikis akiar Ŋisirael, toara ikes Ŋisirael ŋatomoniuni. Aŋun apotu ikes totamakis ebe, “Eloun iwon ikes nabo lopite ŋolopei koloŋit elounitere alojie a ŋolo a ekiŋaren.”

⁴⁰ Nai ani eremi apuru kidiama esibit edou alotaun, kiŋoliyasi ŋituŋa a ekabila a Benjamin kaku, kiŋolikis etaun daadaŋ epurui eremit apuru kidiama.

⁴¹ Kibeleun nai ajore a Ŋisirael ŋina alalan ŋina sek etataiyarit ŋimoe, tobul ŋituŋa a ekabila a Benjamin, anerae apotu ikes toanyut atemar apuu amunyar ikes.

⁴² Aŋun, apotu ikes toema aneni a Ŋisirael kitoro lowae ŋolo a aloŋisat, nai toditasi ŋikajiok a Ŋisirael ikes, toara Ŋisirael ŋulu sek aya lotaun a ŋituŋa a ekabila a Benjamin ŋulu aya kidiŋ ŋajorei kec.

⁴³ Kiwuapa Ŋisirael ŋituŋa a Benjamin, toara ageun alo Noa akitodol nakibois ŋina ayai kide Gibea.

⁴⁴ Toarae ŋasigarya a ŋituŋa a ekabila a Benjamin ŋalipyo ŋatomon ka ŋakanikauni, arae ŋul daadaŋ ŋikajiok ŋulu atitinyok.

⁴⁵ Ani ebwaŋasi ikes eemete lowae ŋolo ka aloŋisat, nataaba ŋina a Rimon, toara Ŋisirael ŋituŋa a ekabila a Benjamin ŋalipyo ŋakan a lorotin a ŋulu apolok, kiritae ikes akitodol Gidom, toarae nabo a nen ŋikilyok ŋalipyo ŋaarei.

⁴⁶ Aŋun, daadaŋ ŋulu aponi toarae akoloŋit ŋin alotuŋa a Benjamin arae ŋalipyo ŋatomoniarei ka ŋaarei ŋikilyok ŋulu ayakatar ŋiboro ŋulu ke ejie ka arae daadaŋ ŋikajiok ŋulu adedeŋak.

⁴⁷ Nai apotu ŋikilyok ŋamiae ŋakanikapei toema lowae ŋolo a aloŋisat, nataaba ŋina a Rimon, kiboiyoto a nen ŋilapyo ŋiomwon.

⁴⁸ Apaki ŋin, toboŋosi Ŋisirael neni aya ŋituŋa a ekabila a Benjamin, toara a ekileŋ ŋituŋa ŋulu eboiyete alotaun, ŋibaren ka ibore daadaŋ ŋini edoŋit, kicunyakis tari ŋitaunio ŋulu ariŋa nyicunya.