Ŋikat. 2 - Ebaibul

Toŋero Ŋisirael akiwuap ŋakiro ŋuna ka Akuj

¹ Abu emalaika ŋolo ke Ekapolon kitipeiyo alo Gilgal tari Bokim, tosodi tema, “Abu ayoŋ okoyau iyes alo Ijipit ka okoyau iyes nakwap ŋina abu ayoŋ eik neni atapapaa kus. Abu ayoŋ otema, ‘Erici ayoŋ jik acamunet kaŋ ka iyes.

² Nai iyes nyicamunosi ka ŋituŋa ŋulu ka akwap a na, tobwaŋabwaŋaasi ŋamuroeta kec.’ Nai nyiwuapa iyes ŋakiro ŋuna abu ayoŋ ekecik iyes. Kiŋolikisi iyes ŋuna idaut iyes akitiya!

³ Aŋun tokona, alimuni ayoŋ atemar nyeritari ayoŋ ŋituŋa ŋul alokiŋaren kus, nai eruworosi ikes ŋimoe kus ka eruworosi ŋakujo kec ŋuna ikirikorete iyes akilip neni kec.”

⁴ Ani irikakini emalaika ŋolo ke Ekapolon akirwor ŋakiro ŋun neni a Ŋisirael a daadaŋ, apotu ŋituŋa kiworout ecelasi nooi ka kigworo.

⁵ Aŋun, apotu Ŋisirael tolimokis akibois ŋin Bokim, tosodi apotu inakis ŋamuronisya neni ke Ekapolon a nen.

Atwanare a Yosua

⁶ Ani kedau Yosua akitorotokin ŋituŋa, apotu Ŋisirael daadaŋ toboŋonosi a ŋolokabila nakwap ŋina akorakinitae ikes.

⁷ Kilipa ŋituŋa neni ka Akuj ŋirwa ŋulu a akiyar a Yosua daadaŋ ka ŋirwa ŋulu ayaryata ŋikasikou ŋulu apotu torubakis eyarete ekaku atwanare a Yosua, ŋikasikou ŋulu apotu kiŋolikis a ŋakonyen kec ŋiticisyo ŋulu apolok daadaŋ ŋulu abu Ekapolon kitiya aŋuna a Ŋisirael.

⁸ Abu nai Yosua lokoku a Nun, ŋolo arae eketiyan a Ekapolon totwan, arae ŋikaru keŋ amiat ka ŋitomon.

⁹ Aponi tonukae iŋes nakwap keŋ, neni enyaritae Timinas-Eres anakwap a ŋina a ŋikamukumukui a ŋina a Epuraim, Kuju emukura Gaas.

¹⁰ Abu daŋ anyamet ŋin daadaŋ todaun, topolou nabo anyamet ace ŋina kitete, ŋina pa ayeni ŋakiro a Ekapolon, kori ŋiticisyo ŋulu abu Ekapolon kitiya aŋuna a Ŋisirael.

Tojoŋoto Ŋisirael akilip neni a Ekapolon

¹¹ Apotu Ŋisirael kitiyata ŋakiro ŋuna aronok alokiŋaren Ekapolon, inanakis ŋamuronisya neni ata Baal,

¹² kimyekis ikes Ekapolon Akuj atapapaa kec ŋina ayauni ikes anakwap a Ijipit, tosodo kiwuapa ŋakiro ŋace ŋuna a ŋituŋa a ŋulu eboiyete alodiyete kec, kilipa neni a ŋakujo a ŋun; aŋun, apotu ikes kitoŋoa Ekapolon.

¹³ Apotu ikes kimyekis Ekapolon, inanakis ŋamuronisya neni a Baal ka neni ka Asitores.

¹⁴ Aŋun, abu Ekapolon toŋoik Ŋisirael, kimyek ŋikaŋatak ŋulu apotu toŋatasi ŋiboro kec, abu Ekapolon kipotok ikes neni a ŋimoe kec a ŋulu eboiyete alowaetin a akwap kec daadaŋ, ikotere nyepedosi nabo ikes akiloun ŋimoe kec.

¹⁵ Apaki daadaŋ ŋina elosyoto ŋajorei a Isirael lojie, aremokino Ekapolon ikes, ido acamanakini kitiyakin neni kec ŋuna aronok, lopite ŋolo sek alimokinitor ka ekoŋitor Ekapolon neni kec, ido apotu Ŋisirael kiyaloloŋo nooi.

¹⁶ Abu nai Ekapolon toseu ŋikatubok ŋakiro, ŋulu apotu toiut Ŋisirael anapedor a ŋimoe kec a ŋulu aŋasete ŋiboro kec.

¹⁷ Kikote neni daŋ, apotu Ŋisirael nyiirasi tari ŋakiro a ŋikatubok ŋakiro kec, anerae agogoŋ ekibure kec ŋolo ka akiwuap ŋakujo ka akilip neni a ŋakujo a ŋun. Apotu ikes atipei toŋero ŋuna sek ewuapito atapapaa kec ŋulu apotu kiwuapa ŋakiciketa a Ekapolon, nyiwuapa Ŋisirael ŋuna ewuapito atapapaa kec.

¹⁸ Apaki daadaŋ ŋina eseunia Ekapolon ŋikatubok ŋakiro aŋuna kec, arukito Ekapolon ka ekatubon ŋakiro apaki ŋin ka abu Ekapolon toiu ikes alomoe kec ŋirwa daadaŋ ŋulu eyarya ekatubon ŋakiro ŋol, anerae esyoniyenene Ekapolon ikes anaumen kec aŋuna a ŋimoe a ŋulu aarete ka esicanito ikes.

¹⁹ Nai ŋinapei etwania ekatubon ŋakiro, aboŋorete ikes atipei akitiya ŋuna aronok akilo tari ŋuna etiyato atapapaa kec, ewuapeneneete ikes ŋakujo ŋace ka kilipeneneete ka kitiyanakinete ŋakujo ŋun. Pa emyeanakinete ikes edio a ŋiticisyo kec a ŋulu aronok, kori akisyaanu kec.

²⁰ Aŋun, abu Ekapolon toŋoik ikes, tosodi tema, “Aŋuna aŋeryoto ŋituŋa lu acamunet kaŋ ŋina abu ayoŋ ecik atapapaa kec akiwuap ka aŋuna aŋeryoto akiwuap ŋakiro kaŋ,

²¹ nyeriŋa nabo ayoŋ eritari alokiŋaren kec ŋituŋa a ŋakwapin a ŋuna abu Yosua nyirita eriŋa iŋes nyetwana.”

²² Aŋuna ka akikatakinia Ŋisirael, kepedorete kori pa kepedorete akiricakin akiwuap ŋuna a Ekapolon lopite ŋolo etiyatotor atapapaa kec, kori kemam,

²³ abu Ekapolon kimyek ŋakwapin ŋun, nyirita ŋituŋa kec daadaŋ kaapei ka ŋituŋa a ŋakwapin a ŋuna abu iŋes kiritarya ŋituŋa kec ka abu nyimyek Yosua kikama ŋakwapin ŋun.