Ŋikat. 19 - Ebaibul

Elepait ka aberu keŋ ŋina pa eisitae

¹ Alorwa a ŋul, apaki ŋina amamukar erwosit alo Isirael, abu ekile ece ŋolo alokabila a Lepi, ŋolo eboi aneni ewasi nooi anakwap a ŋina a ŋikamukumukui a ŋina a Epuraim. Ya aberu ŋina pa eisitae alo Betelem alotaun a ŋolo ayai Yudaya.

² Nai abu aberu ŋin ŋina pa eisitae toŋoikin ka ekile ŋol. Toesik aberu ŋin ekile ŋol tolot lore a papa keŋ Betelem lotaun ŋolo eyai Yudaya, kiboi aina ŋilapyo ŋiomwon.

³ Tolot nai ekile keŋ kiwuapa iŋes, akimaimaun iŋes ka akinyakun iŋes. Arukito iŋes ka eketiyan keŋ epei ta ŋisigirya ŋiarei. Ani edoli iŋes lore a papa a aberu keŋ, kiŋolik papa ka aberu a ŋin ekile ŋol, tolot ka alakara akisiryam iŋes.

⁴ Abu nai lokamuran a ekile a ŋol kijau iŋes lore keŋ, torubak ekile ŋol iboi a nen ŋirwa ŋiuni. Aŋun, apotu ikes kimuja ka tomata kaapei, ido abu ekile ŋol kiriya alore alokamuran keŋ.

⁵ Ani edolete ŋirwa ŋiomwon, tokyenyut ikes taparacu nooi, kitemonokin ekile ŋol aŋuna ka alosit, nai tolimok papa a aberu a ekile a ŋol lokamuran keŋ tema, “Kimuj mono adio kimuj, tolot nai ekaku.”

⁶ Aŋun, apotu ŋikilyok ŋuluarei ŋul, kiboikinos kimuja ka tomata kaapei; tolimok nabo papa ka aberu a ekile a ŋol lokamuran keŋ tema, “Kaanukiro nyiperyo iyoŋ nakuwar na, toryamu alakara anatameta?”

⁷ Ani enyouni ekile ŋol aŋuna ka alosit, todyek lokamuran keŋ iŋes akiper nen, ido abu iŋes tocamu akiper nen akuwar ŋin.

⁸ Ani edolete ŋirwa ŋikan, tokyenyu ekile ŋol taparacu sek aŋuna ka arotokin, nai abu papa ka aberu a ekile a ŋol tolimok iŋes tema, “Kimuj idiobore, toryamunia agogoŋu.” Apotu ikes toŋeleŋeleta towar akwap, kimuja ka tomata ŋikilyok ŋuluarei ŋul kaapei.

⁹ Ani enyounete ekile ŋol ka aberu keŋ ta eketiyan keŋ ecamito arotokin, tolimok papa a aberu keŋ iŋes tema, “Kiŋolik, alunyar apaaran aapuu akwap akiwar, toper ne nakuwar na toryamu alakara anatameta. Ani moi taparacu ipedori iyoŋ akyenyun taparacu nooi aŋuna ka alosit kon, ido tolot nai lore kon.”

¹⁰ Nai abu ekile ŋol nyecamu akiper nen akuwar ŋin, abu iŋes tonyou torotok, todol neni eteosi ka Yebus (iŋes Yerusalem.) Ayakar iŋes ŋisigirya ŋiarei ŋulu aenikinitae ŋasaaja, arukito daŋ iŋes ka aberu keŋ ŋina pa eisitae.

¹¹ Ani eapiyarete ikes Yebus, aris akwap kewar nooi. Tolimok nai eketiyan a ekile a ŋol iŋes tema, “Bua oriwo lotaun lo ŋolo a Ŋiyebusi opero nen nakuwar na.”

¹² Nai abu ekapolon a eketiyan a ŋol toboŋok tema, “Nyikirii iwon lotaun a ŋituŋa a ŋulugelae, a ŋulu nyerae ŋituŋa a Isirael, nai ikilosi iwon kiŋaren tari Gibea.”

¹³ Tolimok nai ekile ŋol eketiyan keŋ tema, “Bua, ekatakisi akidol nakiboisyo ŋun adio opero Gibea, kori Rama.”

¹⁴ Aŋun, apotu ikes toloto kiŋaren. Todoiyo akoloŋ edolete ikes diyete Gibea, ŋolo erae lotaun a ŋituŋa a ekabila a Benjamin.

¹⁵ Toriwo ikes, tolomasi lotaun ŋol aŋuna ka akiper nen akuwar ŋin. Abu ekile ŋol toloma tooma lotaun, kiboikin nenilapat alotaun, nai mam ituŋanan abu tonyaraiya ikes kai keŋ ainakin neni eperete.

¹⁶ Ani ikaikaakini akwap, bu ekasikout ŋolo aboŋuni alotic keŋ alomanikor. Arae ekile ŋol ŋolo anakwap a ŋina a ŋikamukumukui a ŋina a Epuraim, nai eboi iŋes alo Gibea. (Arae ŋituŋa ŋulu eboiyete alotaun a ŋol ŋulu a ekabila a Benjamin.)

¹⁷ Ani iŋoliyari ekasikout lowae ŋolo ayai ekaloton ŋol, kiŋolik iŋes iboi anenilapat a etaun, kiŋit tema, “Ai ilosi iyoŋ ka ai ibunitor iyoŋ?”

¹⁸ Toboŋok ekile ŋol iŋes tema, “Eponitae isua alo Betelem, elosyo nakibois ŋina iwasi jik anakwap a ŋina a ŋikamukumukui a ŋina a Epuraim, nakwap ŋina abunitor ayoŋ. Abu ayoŋ olot Betelem lotaun ŋolo a Yudaya, ido alosi tokona ayoŋ lore kaŋ. Mam ituŋanan akanyar ayoŋ kai keŋ.

¹⁹ Isua ŋiketiyak kon ikiyakar ŋinya ŋulu itoonitoe ka akimuj aŋuna a ŋisigirya kosi, eyakare daŋ isua ŋamugati ke epiini aŋuna kaŋ ka aberu kaŋ ta esorokit ŋolo ikirukitor isua. Mam ibore ice iitanitae isua.”

²⁰ Tolimu ekasikout tema, “Toyai ekisil neni kus. Akainakini ayoŋ iyes ibore daadaŋ ŋini iitanito iyes, nai nyemaikina iyes topero nalapatu ŋina a etaun.”

²¹ Abu nai ekasikout ŋol ya ekile ŋol ka ŋirukitos keŋ kai keŋ, kisimuj ŋisigirya, kilotasi ŋituŋa ŋul ŋakan kec, kimuja ka tomata.

Asecenu a ŋituŋa a Gibea

²² Ani eriŋa ŋituŋa ŋul imujete ka emasete, potu ŋikilyok ŋice ŋulu ke etaun a ŋol, ŋituŋa ŋulu esyaak, kirimokis akai kidiŋ togeikis anaŋanaŋ ekek a akai. Tolimokis ikes ekasikou; ŋolo a akai a ŋin temasi, “Yau kiŋa ekile ŋolo alomuni kai kon, ikotere isua toyenunae iŋes.”

²³ Tolot nai ekasikout ŋolo arae elope a akai a ŋin kiŋa, tolimok ŋikilyok ŋul tema, “Mam, okoe ŋikaitotoi kaŋ, nyitiyata akapil ŋina ikoni ŋin. Aŋuna eraakar ekile lo epeyonon kaŋ, nyitiyata asiilyo ŋin.

²⁴ Eyakasi ne nakoku kaŋ ŋina nyiryamakina ka ekile ka aberu a epeyonon kaŋ ŋina nyiisitae. Kimyekisi oyau ayoŋ ikes kiŋa apaki napei na. Torata ikes ka kitiyata neni kec ŋuna icamito iyes, nai nyitiyata asiilyo ŋina ikoni ŋin neni a ekile a ŋol.”

²⁵ Nai nyecamut ŋikilyok ŋul ŋakiro a ekasikout. Abu nai ekile ŋolo arae epeyonon kikamu aberu keŋ ŋina pa eisitae, kijuka kiŋa neni aya ŋikilyok ŋul. Apotu ŋikilyok ŋul daadaŋ kituruwosi aberu ŋin ŋina kec torata ikes aberu ŋin akuwar daadaŋ akitodol ŋina ewalarya akwap. Ani eapuuni akiwalar kimyekis ikes aberu tolot.

²⁶ Ani iwalari akwap, bu aberu ŋin lokek a akai a ekasikout a ŋolo ejauni ikes kai keŋ ŋina ayai ekapolon keŋ toramakin nen, kiboi aneni tari ŋina acaunia akoloŋ.

²⁷ Ani taparacu, tonyou ekile a aberu a ŋin, toŋaa ŋikekya a akai, ani elomari iŋes kiŋa elosi nen ecamit kiŋolik aberu keŋ ŋina pa eisitae eperi alokek akai, edolunito ŋakan keŋ nalapatu ŋina alokek a akai.

²⁸ Tolimok iŋes aberu keŋ tema, “Tonyou, oloto.” Nai mam ŋuna abu aberu ŋin toboŋok. Abu nai ekile ŋol todakak aberu keŋ losigirya, tolot lore keŋ.

²⁹ Ani edoli iŋes kai keŋ, tolemu ekileŋ, totubutubu akuwan a aberu keŋ, ŋarwa ŋatomon ka ŋaarei, kiyakiya nakwap a Isirael daadaŋ.

³⁰ Tolimok nai iŋes ŋikilyok ŋulu eyakit iŋes tema, “Kiŋita Ŋisirael ŋakiro nu, ‘Etiyakinosi mono ŋakiro nu ŋinapei koloŋ ameun akoloŋit ŋina aponiata Ŋisirael anakwap a Ijipit a? Totamatamata ŋakiro nu, kirworo aloikiikoe kus, kiserata ikes.’ ”