Ŋikat. 16 - Ebaibul

Samuson ka Delila

¹ Akoloŋit apei abu Samuson tolot Gasa, neni eryamunotor iŋes ka amalaat, tosodi kituruwo iŋes aberu keŋ.

² Aponi tolimokinae ŋituŋa a Gasa ebe, “Abu Samuson ne.” Aŋun apotu ikes kirikaut etaun toduka idarito iŋes akuwar daadaŋ alopuke a ŋolo ke etaun, kililiŋiete a nen cek akuwar kia etamete ebe “Odapa iŋes akitodol ŋina ecaunia akoloŋ taparacu, ikiari iwon iŋes.”

³ Nai abu Samuson tojoto akitodol kidiŋ akuwar bon. Ani edoli kidiŋ akuwar, tonyou iŋes, kikamu ŋipukei ŋulu ke etaun ka ŋipirin ŋuluarei todita ŋipirin ka ŋikekya daadaŋ, toryoŋak loseketa keŋ, ya kidiama ekamukumukut ŋolo eyai kiŋaren Eburon.

⁴ Ekaku aŋun, tominak Samuson aberu ŋina ayai nakadipaalat a Sorek, anyaritae ekiro a aberu a ŋin Delila.

⁵ Toloto ŋikapolok a Ŋipilistin neni a Delila tolimokis iŋes temasi, “Tomodik ekile kon, toyenu ibore ŋini einakinit iŋes agogoŋu ŋina apolon nooi, toyenu daŋ epite ŋolo ilounere isua iŋes, ikotere ikipedori isua akien iŋes, ido kilounae iŋes. tosodi ikiinakinio isua iyoŋ ŋisilipae aliput ka amiat a ŋinituŋanan.”

⁶ Aŋun, abu Delila tema neni a Samuson, “Ekelipit ayoŋ iyoŋ, tolimokinae ayoŋ ibore ŋini ikiinit iyoŋ agogoŋu ŋina apolon nooi ka epite ŋolo epedorya ituŋanan akien iyoŋ, ikotere ikilouni iyoŋ.”

⁷ Tolimok Samuson Delila tema, “Ani kakaena ikes ayoŋ a ŋaunoi a ŋakanikaarei a ŋunakitet, a ŋuna nyeokito, a ŋuna a ŋakawo a ŋikaleŋeleŋei, edaun agogoŋu kaŋ, ido ikikwaanikin ayoŋ ka ŋituŋa ŋuluce.”

⁸ Yaut nai ŋikapolok a Ŋipilistin neni a Delila ŋaunoi ŋakanikaarei ŋunakitet ŋuna pa aokito ŋuna a ŋakawo a ŋikaleŋeleŋe, toenia Delila Samuson.

⁹ Apaki ŋin, adukito ŋikilyok analapatu a ŋina alokidiŋ akai, tema Delila neni a Samuson, “Samuson, apotu Ŋipilistin.” Nai abu Samuson toŋed ŋaunoi, totubutuboor ŋaunoi esibit ŋausi ŋuna anom akim. Aŋun, aponi nyeyenun neni eryamunitor iŋes agogoŋu keŋ.

¹⁰ Tolimok nai Delila Samuson tema, “Ikijamuwarit iyoŋ ayoŋ, aŋuna ikilimokinia ŋakiro ŋuna erae alyokonu, ekelipit tolimokinae ayoŋ epite ŋolo epedorere akien iyoŋ.”

¹¹ Tolimok Samuson Delila tema, “Ani kakaena ikes ayoŋ a ŋaunoi aŋuna kitet a ŋuna nyisitiyatae, edaun agogoŋu kaŋ, ido ikikwaanikin ayoŋ ka ŋituŋa ŋuluce.”

¹² Aŋun, abu Delila tolemu ŋaunoi ŋunakitet, kisitiya ikes aenia Samuson tosodi kiworou tema, “Samuson, apotu Ŋipilistin!” (Ayakasi ŋikilyok ŋulu adapito Samuson nalapatu ŋina alokidiŋ akai.) Nai toŋedeŋedaya Samuson anakan keŋ ŋaunoi esibit erae ŋausi koŋin.

¹³ Tolimok nai Delila Samuson tema, “Tari tokona eriŋa iyoŋ ikijamuwarit ayoŋ ka irworo neni kaŋ alyokonu, tolimokinae epite ŋolo epedorere akien iyoŋ.” Tolimok Samuson iŋes tema, “Ani kioiyonok iyoŋ iwapei ŋaeneta a ŋitim kaŋ ŋuna erae ŋakanikaarei, tosodi kipitak ikes a isuwat, edaun agogoŋu kaŋ, ido ikikwaanikin ayoŋ ka ŋituŋa ŋuluce.”

¹⁴ Aŋun, abu Delila apaki ŋina ajotoo Samuson, tooiyonok iwapei ŋaeneta a ŋitim a Samuson ŋuna arae ŋakanikaarei, ido kipitak a isuwat. Tolimok nai Delila Samuson tema, “Samuson apotu Ŋipilistin!” Tokyenyu nai Samuson tolema isuwat ŋini sek epitakinitere ŋitim keŋ iwapei, tolacak ŋitim keŋ ka tolaca ausi ŋina aenitere ŋitim.

¹⁵ Tema nai Delila neni a Samuson, “Kaanukiro ibaakar iyoŋ ayoŋ ebe, ‘Akamina ayoŋ iyoŋ’ tomam bo etau kon aneni kaŋ? Ikijamuwa iyoŋ ayoŋ, adol tokona ŋarwa ŋauni ka nyelimokina iyoŋ ayoŋ ibore ŋini ikiinit iyoŋ agogoŋu kon ŋina apolon.”

¹⁶ Torubak Delila iŋita Samuson ŋakiro ŋun a ŋinakoloŋit, kisya Delila iŋes, kituup nooi kiitan tari atwanare.

¹⁷ Aŋun, abu Samuson tolimok Delila neni eryamunitor iŋes agogoŋu keŋ, tolimok tema, “Nyetapa ebanyet akou kaŋ ŋinapei koloŋ, anerae arae ayoŋ Enasarait ŋolo eketaleoritae ŋinapei eriŋa ayai nakook a toto kaŋ aŋuna ka akitiyanakin Akuj. Ani kebanyi akou kaŋ, edaun agogoŋu kaŋ, apalagagiar ayoŋ, ikikwaanikin ka ŋituŋa ŋuluce.”

¹⁸ Ani eyenuni Delila atemar adau Samuson alimokin iŋes ŋakiro daadaŋ ŋuna sek emunonit Samuson, kiyakiya Delila ituŋanan anyarare ŋikapolok a Ŋipilistin ebala, “Potu jik tokona, anerae adau iŋes alimokin ayoŋ ŋakiro keŋ daadaŋ ŋuna sek emunonit.” Apotu nai ŋikapolok a Ŋipilistin potu neni a Delila, yaut Ŋisiliŋa etiŋito anakan kec.

¹⁹ Kimyek Delila Samuson tojotoor anakejen keŋ, tosodi tonyarau ekile epei, kitobanya ŋaeneta a ŋitim a Samuson ŋunakanikaarei. Togeu Samuson apalagag, todaun agogoŋu aneni keŋ.

²⁰ Tolimu nai Delila tema, “Samuson, apotu Ŋipilistin!” Ani ekyenyuni Samuson totamak ebe, “Alosi ayoŋ etiya lopite ŋolo etiyator ŋarwa ŋunace, aiun bon.” Nai pa ayeni iŋes atemar kedau Ekapolon aesikin iŋes.

²¹ Aŋun, kikamut Ŋipilistin Samuson, togoronosi ŋakonyen keŋ. Yaasi iŋes Gasa, toena iŋes a ŋiriko a ŋulu etiyaunitae a eburonis, inakinae akiryerea amoru a ŋinakiryeet alojera.

²² Nai, togeut ŋitim keŋ apoloun nabo anakou keŋ.

Atwanare a Samuson

²³ Tocunakinos nai ŋikapolok a Ŋipilistin ainakin amuronot neni a akuj kec a ŋina anyaritae Dagon ka ikotere elelyanete, anerae abasi ikes, “Adau akuj yok akipotokin emoit yok Samuson napedor yok.”

²⁴ Ani iŋolikinete Ŋipilistin Samuson, kipuro akuj kec, anerae abasi ikes, “Ikipotok akuj yok iwon emoit yok, ekenyasan a akwap yok, ŋolo abu toar ŋituŋa yok ŋulu alalak.”

²⁵ Ani elakarosi ikes nooi, temasi, “Tonyarautu Samuson, tobolya alokiŋaren yok ikitalaka iwon.” Aŋun, aponi tonyaraunae Samuson alojera tobolya Samuson kitalaka Ŋipilistin. Apotu Ŋipilistin kitowua Samuson alokidiŋ Ŋipirin,

²⁶ tosodi Samuson tolimok ituŋanan ŋini ainakinitae arikit iŋes tema, “Kimyekinae ayoŋ otap ŋipirin ŋulu ewuar akai, ikotere ogwaŋakin nen.”

²⁷ Apaki ŋin, eleleba ŋituŋa kai ŋin, ŋikilyok ka ŋaberu, ayakasi neni ŋikapolok daadaŋ ŋulu a Ŋipilistin ka ayakasi kidiama akai ŋaberu ka ŋikilyok, ŋituŋa ŋulu aapikinit ekimar kec ŋalipyo ŋauni, ŋulu eteete Samuson ebolya aŋuna ka akitalakar ŋituŋa.

²⁸ Apaki ŋin, tonyara Samuson Ekapolon tema, “Ekapolon Akuj totamunae ayoŋ, okoe Akuj kitogogoŋoi ayoŋ apaki na bon, ikotere anakiro a ŋuna apedori akitiya tokona enyaŋi Ŋipilistin aŋuna a ŋakonyen a ŋunaarei.”

²⁹ Kikamu Samuson a ŋakan keŋ ŋipirin ŋuluarei ŋulu alokidiŋ akai, ŋulu arae ikes awuar akai, togwaŋakin iŋes lopirin ŋul totapite akan a ŋina aloteten epir ka a ŋina alo kedyeny epir ŋoloce.

³⁰ Tolimu Samuson tema, “Kimyekisi otwaka ayoŋ ka Ŋipilistin.” Kiketakin Samuson ka agogoŋu keŋ a daadaŋ toritakin akai, totik ŋikapolok a Ŋipilistin ka ŋituŋa daadaŋ ŋulu aya tooma akai ŋin. Aŋun, ŋituŋa ŋulu abu Samuson toar akoloŋit ŋina atwania iŋes alalak akilo ŋituŋa ŋulu abu iŋes toar apaki ŋina ayarya.

³¹ Apotu nai ŋikaitotoi a Samsom ka ŋiyeneta keŋ totiyaunos, yaasi akuwan keŋ kitipeiyoryata nakwap kec tonuka iŋes kidiŋ Sora ka Esitaol, nakipany ŋina arae ŋina a papa keŋ. Aris iŋes ketub ŋakiro alo Isirael ŋikaru ŋatomoniarei.