Ŋikat. 14 - Ebaibul

Kiita Samuson

¹ Akoloŋit apei totiyaar Samuson Timina, abu iŋes kiŋolik a nen aberu ŋina arae Apilistait.

² Ani eboŋori iŋes lore kec, tolimok papa keŋ ka toto keŋ tema, “Eŋolikinit ayoŋ aberu ŋina Pilistait alo Timina, kiitakinae ayoŋ iŋes toruwor aberu kaŋ.”

³ Nai tolimokis papa keŋ ka toto keŋ Samuson temasi, “Emam mono aberu eyai nateker kus, kori alotuŋa yok a daadaŋ ilosyo iyoŋ aryamun aberu alo Pilistia, alotuŋa a ŋulu nyileŋeritae a?” Nai tolimok Samuson papa keŋ tema, “Kiitakinae ayoŋ iŋes, anerae akaminarit iŋes ayoŋ.”

⁴ Pa ayenete papa ka toto a Samuson atemar arae Ekapolon ayeunit ŋakiro ŋun, anerae ewarit Ekapolon epite ŋolo apedorya akitijikin Ŋipilistin. Apaki ŋin, epukato Ŋipilistin Ŋisirael.

⁵ Aŋun, apotu Samuson toloto Timina kaapei ka papa keŋ ta toto keŋ. Ani edolete ikes lomanikorin ŋulu a ŋikito a epiini ŋulu alo Timina, kirurumak itaok a eŋatuny neni keŋ.

⁶ Atipei toloma etau ŋolo ke Ekapolon neni a Samuson, tonyilinyiliya Samuson iŋatuny ŋin a ŋakan bon, lopite ŋolo enyilinyiliya ituŋanan ikale koŋin. Nai nyelimokina iŋes papa keŋ, kori toto keŋ ŋuna abu iŋes kitiya.

⁷ Tolot nai Samuson kiyana ka aberu ŋina arae Apilistait, ŋina sek eŋolikinit iŋes alo Timina, tonira Samuson aberu ŋin.

⁸ Kelunyarosi ŋirwa ŋidi, toboŋo Samuson akiit aberu ŋin, abu iŋes alorot tori akiŋolikin alyal a iŋatuny a ŋini sek abu iŋes toar akoloŋit ŋina arukitotor iŋes ka papa keŋ ta toto keŋ, ani edoli iŋes nen, kiŋolik ao ŋina alalan epori alogogol a iŋatuny ka anakap a ao a ŋuna ayai akimyet.

⁹ Tosodi nai Samuson togeritu a ŋakan ŋakap ŋuna ayai akimyet a ao, ido enyami tolosi. Ani edoli iŋes neni aya papa keŋ ka toto keŋ, inak ikes daŋ akimyet ŋina ka ao, tonyama ikes daŋ. Nai nyelimokina iŋes ikes atemar alemuni iŋes akimyet ŋina ka ao alogogol a iŋatuny a ŋini sek abu iŋes toar.

¹⁰ Tolot nai papa a Samuson neni ayai aberu ŋina acamit Samuson akiit, kitemok nai Samuson ŋasuban a nen, lopite ŋolo anaitotor ŋisorok akitiya.

¹¹ Ani iŋolikinete ŋituŋa iŋes, apotu yaut ŋikilyok ŋatomoniuni arukit ka iŋes.

¹² Tolimok Samuson ikes tema, “Akalimokini ayoŋ iyes totedosi ŋakiro nu. Ani kitedosi iyes alotooma ŋirwa ŋikanikaarei lu ŋulu a ŋasuban, akainakini ayoŋ iyes ŋilowi ŋulu amilimilak ŋatomoniuni ka ŋilowi ŋulu a ŋasuban daŋ ŋatomoniuni.

¹³ Nai ani pa kitedosi iyes ŋakiro ŋun, emaikina iyes ikiinakis ayoŋ ŋilowi ŋulu amilimilak ŋatomoniuni ka ŋulu a ŋasuban daŋ ŋatomoniuni.” Temasi nai ŋikilyok ŋul neni a Samuson “Totedokinoe isua ŋakiro kon, tolimokinae eirasi.”

¹⁴ Tolimok nai Samuson ikes tema, “Abu ibore ŋini enyamyo tolomu alotooma ibore ŋini epedori akinyam, abu ibore ŋini abobon tolomu alotooma ibore ŋini agogoŋon.” Nai apotu ŋirwa ŋiuni tolunyaros eriŋa ŋikilyok ŋul nyetedoro ŋakiro ŋun.

¹⁵ Ani epete ŋirwa ŋiomwon, toloto ŋikilyok ŋul neni ka aberu a Samuson tolimokis iŋes temasi, “Tomodik ekile kon ikilimok isua apolou a ŋakiro a ŋuna ikitedokinit iŋes isua, pa kitiya iyoŋ ŋun ikicunyario isua iyoŋ kaapei ka ŋituŋa a ekal a papa kon daadaŋ. Ikinyaraunit iyoŋ isua nege akitukulyakan a?”

¹⁶ Aŋun abu aberu a Samuson kigworok Samuson tema, “Ikiremokino iyoŋ ayoŋ, nyikimina iyoŋ ayoŋ kire. Itedok iyoŋ ŋituŋa kaŋ ŋakiro, nai nyelimokina iyoŋ ayoŋ apolou kec.” Tolimok Samuson aberu keŋ tema, “Kiira, nyelimokina ayoŋ papa kaŋ, kori toto kaŋ. Kaanukiro emaikina ayoŋ okolimok iyoŋ?”

¹⁷ Kigwor aberu a Samuson alokiŋaren keŋ ŋirwa ŋikanikaarei daadaŋ ŋulu a ŋasuban; nai a ŋuna ecania aberu ŋin Samuson, abu Samuson epete ŋirwa ŋikanikaarei tolimok aberu keŋ apolou a ŋakiro aŋuna atedokinit iŋes ŋituŋa ŋul. Abu nai aberu ŋin tolot tolimok ŋituŋa keŋ apolou a ŋakiro a ŋuna atedokinit Samuson ikes.

¹⁸ Tolimokis ŋikilyok ŋulu a etaun Samuson epete ŋirwa ŋikanikaarei eriŋa akoloŋ nyedoiyoro temasi, “Anibore ebob akilo akimyet ŋina ka ao? Anibore egogoŋ akilo eŋatuny?” Tema Samuson neni kec, “Kerae nyisitiyato iyes ŋina erae ŋina kaŋ akitaa, pa kitedorito iyes ŋakiro kaŋ.”

¹⁹ Toloma atipei etau ŋolo ke Ekapolon neni a Samuson, totiyaar iŋes Asikelon. Toar alotaun a ŋol ŋikilyok ŋatomoniuni, toŋata ŋiboro kec, inak ŋilowi ŋulu a ŋasuban neni a ŋikilyok a ŋulu atedorete ŋakiro keŋ. Toboŋo lore a papa keŋ eŋoit nooi.

²⁰ Aponi nai inakinae aberu a Samuson neni alokone keŋ a ŋolo amina iŋes nooi.