Ŋikat. 13 - Ebaibul

Akidouno a Samuson

¹ Apotu nabo Ŋisirael kitiyata ŋakiro ŋuna aronok alokiŋaren Ekapolon, ido abu Ekapolon kipotok ikes napedor a Ŋipilistin ŋikaru ŋatomoniomwon.

² Apaki ŋin, ayai ecekile ŋolo alo Sora, abunit iŋes alokabila a Dan, arae ekiro keŋ Manoa. Akolupana aberu keŋ, ido amamukar ŋidwe.

³ Totakanu emalaika a Ekapolon neni ka aberu a Manoa, tolimok iŋes tema, “Tari kikolupana iyoŋ, kemam ŋidwe, ipotiuni iyoŋ ka idouni ikoku ŋinisapat.

⁴ Tocoite nai imasi epiini, kori ŋagwe ŋuna adwarak, kori inyami ibore ŋini itoroniyaritae,

⁵ anerae ipotiuni iyoŋ ka idouni ikoku ŋinisapat. Emam ebanyet emaikina totap akou keŋ, anerae eruwor Enasarait, edya ŋolo italeoritae aŋuna ka akitiyanakin Akuj ameun anakidouno keŋ. Iŋes ebuni ageikin alakun Ŋisirael anapedor a Ŋipilistin.”

⁶ Abu nai aberu ŋin tolot, tolimok ekile keŋ tema, “Abu ekile ŋolo arae ituŋanan ŋini ka Akuj bu neni kaŋ etakani akuwan keŋ esibit emalaika ŋolo ka Akuj, arae iŋes ŋolo ikitubuli nooi; nyiŋita ayoŋ neni kebunio iŋes ka nyelimokina iŋes ayoŋ ekiro keŋ,

⁷ nai abu iŋes okolimok ayoŋ tema, ‘Ipotiuni iyoŋ ka idouni ikoku ŋinisapat. Aŋun, nyimat epiini kori ŋagwe ŋuna adwarak ka nyinyam ibore ŋini itoroniyaritae, anerae eruwor edya Enasarait, ŋolo italeoritae aŋuna ka akitiyanakin Akuj ameun anakidouno keŋ tari natwanare keŋ.’”

⁸ Todyek nai Manoa Ekapolon tema, “Okoe Ekapolon, ekelipi kimyek ekile ŋolo erae ituŋanan ŋini ka Akuj ŋolo iyakuunit iyoŋ bu neni kosi nabo ka ikitatam isua ŋuna emaikina isua kitiyae aŋuna a edya a ŋolo idounio.”

⁹ Abu Ekapolon kiira ŋakiro a Manoa, ido abu emalaika ŋolo ke Ekapolon bu nabo neni ka aberu a Manoa apaki ŋina ayakar iŋes lomanikor, nai amam Manoa ekile keŋ a nen.

¹⁰ Aŋun, abu aberu toem atipei tolimok ekile keŋ tema, “Abu nabo neni kaŋ ekile ŋolo koloŋit atakanunit neni kaŋ.”

¹¹ Tonyou nai Manoa kiwuapak aberu keŋ, todolo neni ayai ekile ŋol; kiŋit Manoa ekile ŋol tema, “Arae iyoŋ ekile ŋolo ibu kirwor neni ka aberu a na a?” Toboŋok ekile ŋol tema, “Arae ayoŋ.”

¹² Kirworik nai Manoa tema, “Tolimokinae tokona, ani apaki ŋina iyookinotor ŋakiro kon, anukiro emaikina edya kiwuap anakiyar keŋ, nyo emaikina iŋes kitiya?”

¹³ Tolimok nai emalaika ŋolo ke Ekapolon Manoa tema, “Emaikina aberu kon kiwuap ŋakiro daadaŋ ŋuna adau ayoŋ alimokin iŋes.

¹⁴ Nyemaikina iŋes tonyam idiobore ŋini elemunio alokitoe a epiini, nyemaikina iŋes tomat epiini, kori ŋagwe ŋuna adwarak, kori ibore idio ŋini itoroniyaritae. Emaikina iŋes kiwuap ŋakiro daadaŋ ŋuna ecik ayoŋ iŋes.”

¹⁵ Tolimok nai Manoa emalaika ŋolo ke Ekapolon tema, “Nyilot kareca mono, kidaru kipounoe isua ikale aŋuna kon,”

¹⁶ Toboŋok emalaika ŋolo ke Ekapolon Manoa tema, “Ani kikiteŋela iyes ayoŋ nyanyami ayoŋ akimuj kus; nai kicamito iyes akitemokin ainakinet ŋina epeyo, ipedorete ainakin neni ke Ekapolon.” (Pa ayeni Manoa atemar arae ŋol emalaika ŋolo ke Ekapolon.)

¹⁷ Kiŋit nai Manoa emalaika ŋolo ke Ekapolon tema, “Ŋae ekiro kon? Ikotere ikitopolooryo isua iyoŋ akoloŋit ŋina iyookinotor ŋakiro kon,”

¹⁸ Nai toboŋok emalaika ŋolo ke Ekapolon Manoa tema, “Kaanukiro iŋitar iyoŋ ekiro kaŋ? Erae ekiro kaŋ ŋolo eiliili nooi.”

¹⁹ Aŋun, abu Manoa ya ikale kaapei ka ainakinet ŋina a ŋikinyom, inak iŋes ikes neni ke Ekapolon anataaba, inak neni ke Ekapolon a ŋolo itiyae ŋaumonokineta.

²⁰ Ani ikyaar arira ŋina ka akim kidiama anamuroet, kikyaar emalaika ŋolo ke Ekapolon kaapei ka arira ŋina anamuroet kiteete Manoa ka naberu keŋ; toryediko nai ikes kijuuroto todolo ŋireetin kwap.

²¹ Nyetakanuna nabo emalaika ŋolo ke Ekapolon neni a Manoa ka naberu keŋ. Abu nai Manoa toyenu atemar kerae ŋol emalaika ŋolo ke Ekapolon.

²² Tolimok nai Manoa aberu keŋ tema, “Kire jik, ikitwaki iwon, anerae eŋolikin iwon Akuj.”

²³ Nai tolimok naberu keŋ Manoa tema, “Kerae tocamite Ekapolon akiar iwon, pa kecamunit iŋes ainakinet yok ŋina epeyo ka ŋina a ŋikinyom, kori pa kikitoodikinit iwon ŋakiro nu daadaŋ, kori pa kikilimokinit iwon ŋakiro ŋuna ikote ŋun.”

²⁴ Abu nai aberu a Manoa kidou ikoku ŋinisapat, tolimok ekiro Samuson. Topolou edya ka kiterereŋ Ekapolon iŋes.

²⁵ Togeu etau ŋolo ke Ekapolon akitogogoŋ iŋes apaki ŋina ayakar iŋes Manedan kidiŋ Sora ka Esitaol.