Ŋikat. 12 - Ebaibul

Toremokin ŋikabilae a Ŋisirael make

¹ Apotu ŋituŋa a Epuraim kitemokinos aŋuna ke ejie, todokasi Sapon ekekwaye Yorodan, kiŋita Yepesa temasi, “Kaanukiro ibunio iyoŋ todoka ekekwaye akitijiore Ŋiamoni, ido nyikinyar isua daŋ alosit kaapei ka iyoŋ? Icunyakinio isua akai kon iyai iyoŋ tooma!”

² Toboŋok Yepesa ikes tema, “Ikitiji ayoŋ ka ŋituŋa kaŋ Ŋiamoni ŋulu ikisicanito isua nooi. Nai ani akanyarae ayoŋ iyes, ipotu iyes nyikilakut ayoŋ anapedor kec.

³ Ani aanyuni ayoŋ atemar nyicamito iyes alakun ayoŋ, abu ojal akiyar kaŋ, odoka ekekwaye akitijiore Ŋiamoni, ido abu Ekapolon kipotok ikes napedor kaŋ. Kaanukiro nai iponitotor iyes neni kaŋ nakoloŋit na akitijiore ayoŋ?”

⁴ Abu nai Yepesa tocunak ŋikilyok daadaŋ ŋulu alo Gilead, kitijikis ŋituŋa a Epuraim kilout ŋituŋa a Gilead ŋituŋa a Epuraim, anerae abasi ŋituŋa a Epuraim elimokinete ŋituŋa a Gilead ebe, “Iyes ŋituŋa a Gilead, iraakasi iyes ŋulu ipotu toema alo Epuraim ka alo Manase.”

⁵ Apotu nai ŋituŋa a Gilead kikamasi ŋidoketa daadaŋ a Yorodan ŋulu edokanarere Epuraim. Ani keem ituŋanan alo Epuraim, ido tema, “Kimyekinae kareca ayoŋ odoka ekekwaye aŋolol,” iŋisete ŋituŋa a Gilead iŋes temasi, “Irae iyoŋ ŋolo alo Epuraim a?” Keboŋoki iŋes tema, “Mam”

⁶ Etemarete ikes, “Tema iyoŋ CIBOLES” Ani ketema iŋes “SIBOLES” anerae pa apedorit iŋes alimun akirot ŋin ejok, apedorete nai ikes akikamun ituŋanan ŋin toarakis lodoketa a Yorodan. Apaki ŋin apotu ŋituŋa a Epuraim ŋalipyo ŋatomoniomwon ka ŋiarei totwaka.

⁷ Kiboi Yepesa erae ekatubon ŋakiro alo Isirael ŋikaru ŋikanikapei. Ekaku, abu Yepesa Egileadait totwana, tonukae akuwan keŋ lotaun keŋ ŋolo ayai Gilead.

Ibisan, Elon ka Abidon

⁸ Ekaku a Yapesa, toruwor Ibisan ŋolo alo Betelem ekatubon ŋakiro alo Isirael.

⁹ Ayakar Ibisan ŋidwe ŋulusapa ŋatomoniuni. Abu iŋes inak ŋidwe keŋ ŋulupesur kiita ŋikilyok ŋulu pa arae ŋulu ka ateker keŋ, abu iŋes kiitu ŋaberu anatekerin a ŋunagelae aŋuna a ŋidwe keŋ a ŋulusapa. Abu Ibisan toruwor ekatubon ŋakiro alo Isirael ŋikaru ŋikanikaarei.

¹⁰ Abu nai Ibisan totwan, tonukae akuwan keŋ Betelem.

¹¹ Ekaku ka Ibisan toruwor Elon ŋolo alo Sebulon ekatubon ŋakiro alo Isirael. Toruwor iŋes ekatubon ŋakiro alo Isirael ŋikaru ŋitomon.

¹² Abu nai Elon ŋolo alo Sebulon totwana, tonukae akuwan keŋ Aijalon lotaun ŋolo alo Sebulon.

¹³ Ekaku ka Elon, toruwor Abidon lokoku a Ilel, ŋolo arae Epirasonait ekatubon ŋakiro alo Isirael.

¹⁴ Ayakar iŋes ŋidwe ŋulusapa ŋatomoniomwon ka ŋipapae ŋatomoniuni ŋulu adokito ŋisigirya ŋatomonikanikaarei. Abu Abidon toruwor ekatubon ŋakiro alo Isirael ŋikaru ŋikanikauni.

¹⁵ Abu nai Abidon lokoku ka Ilel ŋolo arae Epirasonait totwan, aponi tonukae akuwan keŋ Pirason nakwap ŋina a Epuraim ŋina a ŋikamukumukui ŋina a Ŋiamaleki.