Ŋigal. 2 - Ebaibul

Tocamut ŋikiyakia ŋuluce Paulo

¹ Ani kelunyarosi ŋikaru ŋitomon ka ŋiomwon, abu ayoŋ oboŋosi ka Baranaba Yerusalem, oya Tito daŋ.

² Abu ayoŋ olot, anerae abu Akuj eketoodik ayoŋ atemar itemokino olot. Anakiryamiryam kaŋ ka ŋikarikok ŋulu a ŋatukon a Ŋikristo aneni kec make, abu esileerek neni kec Ŋakiro ŋuna Ajokak ŋuna alimonokini ayoŋ lotuŋa ŋulu nyerae Ŋiyudayan. Abu ayoŋ etiya ŋun, anerae pa acamit ayoŋ etic kaŋ ŋolo adau akitiya ka ŋolo a tokona eruwor koŋin.

³ Nai tari Tito, erukitos kaŋ ŋolo erae Egirik, aponi nyitiŋakin atemar kileŋerae.

⁴ Nai acamito ŋice atemar kitiyae ikoŋina. Apotu ŋikilyok ŋul kirepunos natukot kosi erae ŋikaripiripak itusubuna ŋikanupak, aŋuna ka akimimaun alacakina ŋina ayakare isua anakimorikina kosi ka Yesu Kristo. Apotu ikes kitiyata ŋun, anerae acamito akitiŋakin isua akiwuap Ŋikisila a Moses.

⁵ Nai aponi isua nyecamun ŋakiro kec tari iwadio, ikotere nai aŋuna kus erubakinete Ŋakiro ŋuna Ajokak erae ŋuna a kire.

⁶ Nai ikes ŋulu asibito ŋikarikok, apotu nyakalimokis ayoŋ ŋakiro ŋace ŋuna kitet. (Aneni kaŋ, nyerae ikes ŋikarikok, aŋuna ke epite a ŋolo paaran ayakatar ikes; anerae nyetubonokini Akuj aŋuna ke etakane.)

⁷ Nai akilo ikes akiyatakin ŋakiro ŋace ŋuna kitet nakiro ŋuna abu ayoŋ erwor, apotu toyenut atemar keris Akuj kakainaki ayoŋ etic ŋolo ka alimonokin Ŋakiro ŋuna Ajokak lotuŋa ŋulu nyerae Ŋiyudayan, ikwaŋinapei keris keinakinia neni a Petero etic ŋolo ka alimonokin Ŋakiro ŋuna Ajokak neni a Ŋiyudayan.

⁸ Anerae ikwapei abunio Akuj kituruworya Petero ekiyakia neni a Ŋiyudayan, abu eketuruwo ayoŋ daŋ ekiyakia neni a ŋituŋa a ŋulu nyerae Ŋiyudayan.

⁹ Apotu Yakobo, Petero ka Yoana, ŋulu asibito ŋipirin a Ŋikristo, toyenut atemar kebu Akuj okoinak ayoŋ ajokis ŋinakitiyaet etic ŋolo apolon lo; aŋun, apotu ikes tonyout otiŋakinos ka ayoŋ ka Baranaba ŋakan ŋuna aloteten, kitoodiu nen atemar ikirae isua ka ikes ŋipei. Tocamunetei atemar etiyata ayoŋ ka Baranaba alokidiŋ ŋituŋa ŋulu nyerae Ŋiyudayan, ido kitiyata ikes alokidiŋ Ŋiyudayan.

¹⁰ Ŋuna make apotu ikes tolimut ŋuna ka atemar itemokino isua totamunitetei ŋikulyak ŋulu anatukot kec, ibore ŋinipei sek ekeburit ayoŋ akitiya.

Kirwor Paulo alo Antiokio neni a Petero itepegit

¹¹ Nai ani ebuni Petero Antiokio, abu ayoŋ etepeg iŋes alokiŋaren ŋikanupak daadaŋ, anerae eleere atemar pa eyookino ŋakiro ŋuna etiyat iŋes.

¹² Ani eriŋa ŋikilyok ŋice ŋulu kiyakiyarit Yakobo nyedolo Antiokio, kimujete sek Petero ka ŋituŋa ŋulu pa arae Ŋiyudayan. Nai ani edolete ŋikilyok ŋul nen, totyakari Petero nyecamu akimuj ka ŋituŋa ŋulu pa arae Ŋiyudayan, anerae akuryanit iŋes aŋuna a ŋituŋa a ŋulu acamito ŋikanupak ŋulu nyerae Ŋiyudayan kileŋerae.

¹³ Apotu ŋikaitotoi ŋuluce daŋ ŋulu Yudayan togeut kaapei ka Petero alotooma akuryanu akitiya ŋuna ayenete ikes atemar nyiyookino; tari Baranaba daŋ, torikosi ŋakiro ŋuna etiyaete ikes.

¹⁴ Ani aanyuni ayoŋ atemar nyiwuapito ikes ŋuna a kire ŋuna elimunito Ŋakiro ŋuna Ajokak, abu ayoŋ erwor neni a Petero alokiŋaren ŋikanupak daadaŋ otema, “Irae iyoŋ Eyudayat, nai pa iboi iyoŋ ŋoon irae Eyudayat, nai ikwa ituŋanan ŋini nyerae Eyudayat. Ikokini nai iyoŋ ipedori areikin ŋituŋa ŋulu nyerae Ŋiyudayan akiboi ikwa Ŋiyudayan ai?”

Eiun Ŋiyudayan ka ŋulu nyerae Ŋiyudayan aŋuna ka anupit kec

¹⁵ Kire, ikiuruunitae isua ikirae Ŋiyudayan, meere “Ŋituŋa ŋulu nyerae Ŋiyudayan ŋulu erae ŋikasecak”, ikwapei enyaritere ikes;

¹⁶ oyenete bo isua atemar elimori Akuj atemar iyookino ituŋanan alokiŋaren keŋ aŋuna ka anupit Yesu Kristo bon, meere aŋuna itiyaa ŋuna ecamito Ŋikisila. Isua daŋ, ikinupit Yesu Kristo, ikotere elimori Akuj atemar ikiyookino isua alokiŋaren keŋ aŋuna ka anupit kosi Yesu Kristo, meere aŋuna ka akitiya ŋuna ecamito Ŋikisila. Anerae emam ituŋanan elimoryo atemar iyookino alokiŋaren Akuj aŋuna itiyaa ŋuna ecamito Ŋikisila.

¹⁷ Nai ikwaŋinapei ikiwaritor isua ŋulu ikirae Ŋiyudayan akiyookino alokiŋaren Akuj anakimorikina ka Kristo, ikicamunit atemar ikiryamun isua ikirae ŋikasecak, lopite ŋolopei eraakatar ŋulu nyerae Ŋiyudayan ŋikasecak. Apolou mono a ŋakiro a ŋun atemar ikisimukekinit Kristo iwon akisec a? Mam jik!

¹⁸ Ani kageik ayoŋ ayere nabo ŋipitesyo ŋulu a Ŋikisila a ŋulu aris ayoŋ kajamuwa, etoodiun nai ayoŋ bon arae ituŋanan ŋini asecan, abilibili Ŋikisila.

¹⁹ Nai tokona, alotooma ŋuna ikamunito Ŋikisila, ekoni ayoŋ ituŋanan ŋini etwanit--Ŋikisila ŋilopeyek etiyata ŋun--ikotere nai oyar ayoŋ aŋuna ka Akuj. Adaun akiar ayoŋ ka Kristo alomusalaba keŋ.

²⁰ Aŋun nai, nyarubakinit ayoŋ arae ŋolo ayari, nai Kristo eyari alotooma kaŋ. Akiyar kaŋ ŋina anakwap a na, ayari ananupit Lokoku ka Akuj, ŋolo abu okominak ayoŋ ka tojal akiyar keŋ aŋuna kaŋ.

²¹ Nyacakarit ayoŋ ajokis ŋina ka Akuj. Anerae ani kelimo Akuj atemar iyookino ituŋanan aŋuna a Ŋikisila, iŋes atemar kerae atwanare a Kristo akoŋinait.