Ŋigal. 1 - Ebaibul

Emalas

¹ Ayoŋ Paulo ekiyakia egirit abaruwa na. Meere ŋituŋa ekeyakito ayoŋ kori meere lotuŋa itorunit anyarao kaŋ, nai itorunit neni a Yesu Kristo ka neni ka Akuj Papa, ŋolo abu kiteyaru Yesu alokatwak.

² Ayoŋ ka ŋikaitotoi daadaŋ ŋulu eyakasi ne, ikiyakuunit ŋimalasyo neni a ŋatukon a Ŋikristo anakwap a Galatia.

³ Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

⁴ Abu Kristo tojal akiyar keŋ, ikotere isyoniyo ŋasecisya yok, ido itolacak iwon anakwap a na a ŋina ipukat ŋolo Aronon. Arae ŋin acamit ŋina ka Akuj Papa yok.

⁵ Toyai neni ka Akuj apolou ŋina nyedaun ŋikaru ka ŋikaru! Amen.

Emam Ŋakiro ŋuna Ajokak ŋace

⁶ Aumokinit ayoŋ aŋuna kus! Alotooma apaki ŋina auruwuanan, iesikis iyes Akuj ŋina abu ikinyarau iyes aŋuna ka ajokis a Kristo ka icamut Ŋakiro ŋuna Ajokak ŋace!

⁷ Nai kire, emam Ŋakiro “Ŋuna Ajokak ŋace;” ŋituŋa ŋice bon ŋulu ikicanito iyes eyakasi, ŋulu ikatakinito akijulakin Ŋakiro ŋuna Ajokak ŋuna a Kristo.

⁸ Nai tari kerae isua kori emalaika ŋolo anakuj ikilimonokini iyes ŋakiro ŋace ŋuna ebookoi ebe erae Ŋakiro ŋuna Ajokak, ŋuna nyikote ŋuna aponi isua ikilimonokin iyes, itemokino toruwor iŋes ŋini ilamam!

⁹ Aris paaran isua kelimun ka alimuni nu nabo tokona: ani kikilimonok iyes idiotuŋanan ŋakiro ŋace ŋuna ebookoi ebe erae Ŋakiro ŋuna Ajokak, ŋuna nyikote ŋuna idaut iyes acamun, itemokino toruwor iŋes ŋini ilamam!

¹⁰ Alimunit mono ayoŋ ŋun aŋuna ka akitalakar ŋituŋa a? Mam jik! Akitalakar Akuj iŋes acamit ayoŋ! Kire meere akitojoka alotuŋa acamit ayoŋ! Kerae toriŋa ayoŋ ewarit ŋun, pa karae ayoŋ eketiyan a Kristo.

Epite ŋolo aruworor Paulo ekiyakia

¹¹ Ŋikaitotoi kaŋ, acamit ayoŋ iyes toyenut kire atemar meere lotuŋa itorunito Ŋakiro ŋuna Ajokak ŋuna abu ayoŋ okolimok iyes.

¹² Pa aryamuni ayoŋ ikes aneni a idiotuŋanan kori pa abu idiotuŋanan eketatamik ayoŋ ŋakiro ŋun. Arae Yesu Kristo elope iŋes abu totakanu neni kaŋ, eketeyenik ayoŋ ŋakiro ŋun.

¹³ Ipotu iyes kiirasi epite ŋolo ayakar akiyar kaŋ paaran apaki ŋina ewuapitor ayoŋ edin ŋolo a Ŋiyudayan, epite ŋolo esicanenea ayoŋ ka aryenyeo atukot ŋina a Ŋikristo ŋina ka Akuj ka ekatak akielar iŋes.

¹⁴ Eloit paaran ayoŋ Ŋiyudayan ŋulu alalak ŋulu arae ŋikesa kaŋ alotooma akitiya ŋuna ke edin a Ŋiyudayan, ka ewuapit ayoŋ ka alelakinit ŋitalyo ŋulu atapapaa kosi.

^15-16 Nai abu Akuj tolakar okoseu ayoŋ eriŋa tari nyidouno, okonyar ayoŋ anajokis keŋ akitiyanakin iŋes. Abu iŋes eketoodik ayoŋ Lokoku keŋ, ikotere olimonok Ŋakiro ŋuna Ajokak ŋuna ikamunito iŋes lotuŋa ŋulu nyerae Ŋiyudayan. Apaki ŋina atakanuniata ŋun, abu ayoŋ nyecanican apaki alosit neni a idiotuŋanan aryamun ŋakiro ŋuna eŋarakinak;

¹⁷ kori daŋ nyeloto Yerusalem aanyun ŋulu apotu toruworos ŋikiyakia eriŋa ayoŋ. Nai abu atipei olot Arabia, ido oboŋu nai Damasko.

¹⁸ Arae ekaku, kelunyar ŋikaru ŋiuni iŋes abunio ayoŋ olot Yerusalem aanyun Petero, eboiyoto ka iŋes ŋisabito ŋiarei.

¹⁹ Nai emam ekiyakia ece ŋolo abu ayoŋ oanyu a nen, mati Yakobo lokaato ke Ekapolon Yesu.

²⁰ Iyookino ŋakiro nu ŋuna egiri ayoŋ. Eyeni Akuj atemar nyerworo ayoŋ alyokonu!

²¹ Ekaku, abu olot nakwapin ŋuna eyakasi Siria ka Cilicia.

²² Ŋirwa ŋul, pa akayenete ayoŋ ŋatukon a Ŋikristo anakwap a Yudeya.

²³ Arae ŋuna bon ayenete ikes ŋuna alimonokinete ŋuluce ikes ebe, “Ekile ŋolo paaran ikisicanit iwon, elimonokini tokona Ŋakiro ŋuna Ajokak ŋuna a Yesu, ŋunapei paaran ekatakinit iŋes akinyasun”.

²⁴ Aŋun, apotu ikes kipuro Akuj, aŋuna abu iŋes kitiya neni kaŋ.