Ŋiep. 6 - Ebaibul

Ŋidwe ka ŋikauruunak kec

¹ Ŋidwe, ikwapei iraakatar iyes ŋulu ke Ekapolon, topupete ŋikauruunak kus, anerae erae ŋun ŋuna itemokino iyes kitiyata.

² Ebala Akiciket ŋina esyaunan ŋina eyai akiikinet neni kus ebe, “Tokerite papa kon ka toto kon,

³ ikotere ejokyar akiyar kon, ido kiboi iyoŋ ŋikaru ŋulu alalak anakwap a na.”

⁴ Atapapa, nyitoŋoa ŋidwe kus; nai akilo, kitopoloutu ikes alopitesyo a ŋulu ajokak ka anakitatam ŋuna ke Ekapolon.

Ŋipi ka ŋikapolok kec

⁵ Ŋipi, topupete ŋikapolok kus ŋulu ka akwap a na anakuryanu ka anamaran ka kitiyata ŋun ka ainakina lopite ŋolopei itiyanakiniata iyes Kristo.

⁶ Kitiyata ŋun, meere apaki ŋina ikiteoto ikes iyes bon, anerae icamito iyes ikitojaka ikes iyes, nai kitiyata ka agogoŋu kus a daadaŋ, ŋuna ecamit Akuj ikwa ŋipi ŋulu a Kristo.

⁷ Kitiyata etic kus ikwapei ŋipi ilakara esibit itiyanakinete Ekapolon, meere ŋituŋa.

⁸ Toyenete atemar eropi Ekapolon ŋinituŋanan, kerae epito kori ŋini nyerae epito, aŋuna ke etic a ŋolo ajokan a ŋolo itiyae iŋes.

⁹ Ŋikapolok, totiŋito ŋipi kus ikwaŋinapei, lopite ŋolo ejok alokiŋaren Ekapolon; tojoŋoto akitukuryan ikes. Toyenete atemar iraakasi iyes ka ŋipi kus ŋulu ke Ekapolon a epei a ŋolo eyai nakuj, a ŋolo etubonokini ŋituŋa daadaŋ alopite a epei, emam atyakatyak.

Itemokino Ŋikristo kitijiyoto aronis

¹⁰ Ŋuna isidiyete, togogoŋioto anakimorina kus ka Ekapolon alotooma acamun iŋes ikitogogoŋ iyes ka agogoŋu keŋ a ŋina apolon.

¹¹ Tonapa ŋiboro daadaŋ ŋulu jiyet ŋulu ikiinakini Akuj iyes, ikotere nai ipedorete akitepeg, kipiyosi ŋakiro ŋuna aronok ŋuna ikilokitor Satan.

¹² Anerae meere ŋituŋa ejiyere iwon, nai ikijiye ka ŋikepukak, ŋapedorosyo ka ŋipyan ŋulu eya kidiama ŋulu epolokinito akwap na, alorwa a lu a ŋulu ikote akiryonut.

¹³ Aŋun, tonapa tokona ŋiboro daadaŋ ŋulu jiyet ŋulu ka Akuj! Ikotere nai ani edoluni akoloŋit ŋina aronon, topedosi akitepeg emoit anakitijiyore keŋ; tosodi ani kijiyoto tari neni eŋetakinor ejiye, kidoŋo iyes irae ŋulu ilout alojiye.

¹⁴ Aŋun, totenito: tonapa ŋakiro ŋuna a kire ikwa akoroba ŋina eenen nacirin kus; tonapa akiyookino ikwa arapet

¹⁵ ka tonapa ikwa ŋamuk ekibure ŋolo ka alimonokin Ŋakiro ŋuna Ajokak ŋuna ke ekisil a ŋolo ka Akuj.

¹⁶ Ŋapakio daadaŋ, totiŋito anupit ikwa aupal; anerae iŋes ipedoryata iyes akituduŋeo ŋimalyo ŋulu eriraete ŋulu egumunit ŋolo Aronon--Satan.

¹⁷ Tocamutu aiuno ikwa akopiya ŋina iuryarit akou nyewana; totiŋa ikwa atum akirot ka Akuj, ŋina ikiinakini iyes Etau ŋolo ka Akuj.

¹⁸ Kitiyata ŋun daadaŋ alotooma akilip, iŋitasi akiŋarakino aneni ka Akuj. Kilipeneneete ŋapakio daadaŋ anapedor a ŋina ke Etau a ŋolo ka Akuj. Totenito, nyijamakis akilipanakin jwi jwi ŋituŋa ŋulu ka Akuj daadaŋ.

¹⁹ Kilipanakinetei ayoŋ daŋ, ikotere okoinak Akuj akirot ŋina iyookino ayoŋ erwor; ikotere nai erwor emam akuryanu, ido etaanyu ŋituŋa akimunono ŋina a Ŋakiro a ŋuna Ajokak.

²⁰ Tari tokona kayai mabus, eriŋa arae ekiyakia aŋuna a Ŋakiro a ŋuna Ajokak. Kilipeneneete ikotere erwor Ŋakiro ŋuna Ajokak emam akuryanu, ikwapei itemokino erworya.

Ŋimalasyo ŋulu esidyok

²¹ Ikilimokini iyes Tuciko, ŋakiro daadaŋ ŋuna akatapito ayoŋ, ikotere toyenut iyes epite ŋolo ayakar ayoŋ. Erae iŋes lokaato ŋolo minat alotooma Ekapolon, ŋolo erae eketiyan ŋolo ikinyomitae isua.

²² Ŋakiro ŋun ikes eyakuunitor ayoŋ iŋes neni kus, alimokin iyes epite ŋolo iboiyere isua, ikotere nai ikisimukekis iyes ŋun.

²³ Toyai neni a ŋikaitotoi a daadaŋ alotooma Kristo ekisil ka amina ta anupit aneni ka Akuj Papa ka aneni ke Ekapolon Yesu Kristo.

²⁴ Toyai ajokis ŋina ka Akuj neni a daadaŋ a ŋulu eminasi Ekapolon yok Yesu Kristo alotooma amina ŋina nyedaun.