Ŋiep. 3 - Ebaibul

Etic a Paulo alokidiŋ ŋituŋa ŋulu nyerae Ŋiyudayan

¹ Aŋakiro a ŋun, elipit ayoŋ Akuj, ayoŋ Paulo ŋolo arae emabus aŋuna ejaanakinia Yesu Kristo aŋuna kus a ŋulu nyirae Ŋiyudayan.

² Kire idaut iyes akiirar ebe adau Akuj ainakin ayoŋ ajokis keŋ akitiya etic keŋ lo aneni kus.

³ Arae nakitoodikinet abunio Akuj ekesileerek ayoŋ ŋakiro keŋ ŋuna imunono, ŋuna ŋoon sek abu ayoŋ egir euruwuaka.

⁴ Ani isyomete iyes ŋuna adau ayoŋ akigir, ipedorete ayenun epite ŋolo ayenunia ayoŋ ŋakiro ŋun, ŋuna imunono, ŋuna erae ŋuna a Kristo.

⁵ Koloŋ sek, pa alimokinitae ŋituŋa ŋakiro ŋuna imunono ŋun, nai tokona adau Akuj akitoodiun ikes alotooma Etau keŋ neni a ŋikiyakia keŋ a ŋulu ka Akuj ka neni a ŋikadwarak.

⁶ Ŋakiro ŋuna imunono ikes nu ebe, aŋuna a Ŋakiro a ŋuna Ajokak, amora ŋituŋa ŋulu nyerae Ŋiyudayan ka Ŋiyudayan ŋarereŋisyo ŋuna ka Akuj; eraakasi ikes ŋipei ka amora ŋakiikineta ŋuna abu Akuj kiik alotooma Yesu Kristo.

⁷ Aponi eketuruwor ayoŋ eketiyan ŋolo a Ŋakiro a ŋuna Ajokak alotooma ainakinet ŋina abu Akuj okoinak ayoŋ anajokis keŋ alotooma apedor keŋ ŋina itiyaa iŋes etic.

⁸ Arae neni kaŋ a ŋolo arae ecaryoit alotuŋa a daadaŋ a ŋulu ka Akuj aponi okoinakin ajokis ŋina limonokinet Ŋakiro ŋuna Ajokak neni a ŋulu nyerae Ŋiyudayan--ŋakiro ŋuna ka ajakaanut a Kristo a ŋina nyeŋicun etyae keŋ.

⁹ Aponi daŋ okinakin akisileerekin lotuŋa epite ŋolo itiyakinia Akuj ŋuna imunono ŋuna elosikinit iŋes. Abu Akuj, ŋina erae akasuban a ŋiboro daadaŋ kiwua ŋuna imunono ŋun ŋikaru daadaŋ ŋulu alunyarosi;

¹⁰ ikotere nai alotooma Ŋikristo toyenut ŋikepukak ka ŋapedorosyo ŋuna anakuj aosou ŋina ka Akuj alotooma ŋiboro daadaŋ.

¹¹ Abu Akuj kitiya ŋun ikwapei ayakar alosikinet keŋ ŋina a ŋikaru ka ŋikaru, ŋina ayakar iŋes alotooma Yesu Kristo Ekapolon yok.

¹² Alotooma akimorikina ka Kristo ka aŋuna ka anupit yok neni keŋ, ikipedori iwon aponare neni ka Akuj emam akuryanu ka ikiyakar akikinyomit.

¹³ Aŋun, ekemaimai nai ayoŋ iyes, nyijamakis aŋuna a ŋican a ŋulu aryamu ayoŋ aŋuna kus, a ŋulu erae aŋuna ka akitopolooro kus moi anakuj.

Amina ŋina a Kristo

¹⁴ Aŋakiro a ŋun, aryediki ayoŋ alokiŋaren Akuj Papa,

¹⁵ ŋolo erae neni keŋ eponitotor ŋikalya daadaŋ ŋulu anakuj ka ŋulu alokwap.

¹⁶ Elipenene ayoŋ neni ka Akuj ikiinak iyes anabaru a ŋina a ŋarereŋisyo keŋ apedor ŋina kicaset alotai kus alotooma Etau keŋ

¹⁷ ka elipenene ayoŋ Akuj kituruwo ŋitai kus neni iboiyo Kristo aŋuna ka anupit kus. Elipi ayoŋ atemar ibore daadaŋ ŋini itiyaete iyes, torae ŋini ebunit alotooma amina,

¹⁸ ikotere nai iyes kaapei ka ŋituŋa ŋulu ka Akuj daadaŋ iyakaunotor apedor ŋinayenunet epite ŋolo epoloo nooi amina ŋina a Kristo ŋina nyipimun.

¹⁹ Ee, elipi ayoŋ atemar toyenut iyes amina keŋ--tari pa kepedor ayenun iŋes nooi--ikotere nai kikwaanikinos iyes ka Akuj.

²⁰ Epedori Akuj akitiya alotooma yok ŋuna alalak nooi akilo daadaŋ ŋuna ikipedori iwon akilip iŋes kori ŋuna ikitami iwon atemar ikitiyakini. Itiyae iŋes ŋun anapedor a ŋina itiyae alotooma yok.

²¹ Toyai neni keŋ apolou aneni a Ŋikristo anakimorikina ka Yesu Kristo ananyameta a daadaŋ, ŋikaru ka ŋikaru! Amen.