Ŋibur. 8 - Ebaibul

Yesu iŋes erae Esacaradoti yok ŋolo Apolon nooi

¹ Akirot ŋina ikirworo iwon iŋes na: ikiyakar iwon Esacaradoti yok ŋolo Apolon nooi, ŋolo iboi alowae a ŋolo aloteten ke ekicoloŋ a ŋolo ka Akuj a ŋina etiron a ŋina anakuj.

² Itiyae iŋes etic ŋolo eraakar Esacaradoti ŋolo Apolon nooi anakibois a ŋina asegan nooi, erae nen tooma eema ŋolo a kire ŋolo aduki Ekapolon, meere ŋituŋa.

³ Eseununuyo ŋisacaradotin ŋulu Apolok nooi, ikotere einanakinete Akuj ŋainakineta ka ŋamuronisya. Ikwaŋinapei, itemokino Yesu daŋ Esacaradoti yok ŋolo Apolon nooi toyakar idiobore ŋini einakini.

⁴ Kerae toyai iŋes nakwap na, pa kerae iŋes esacaradoti, anerae eyakasi sek ŋisacaradotin, ŋulu einanakinete ŋainakineta ŋuna ecamito Ŋikisila a Ŋiyudayan.

⁵ Etic ŋolo eraakatar ikes ŋisacaradotin erae akituput ka erae daŋ etorube a ŋuna itiyao anakuj. Ikwaan ŋakiro ŋun ka ŋuna a Moses. Ani eapuuni iŋes adukokin eema ŋolo ka Acamunet, tolimok Akuj iŋes tema, “Kitiya ibore daadaŋ lopite ŋolo ikitoodikinitere iyoŋ alomoru.”

⁶ Nai tokona, ainakin Yesu etic ŋolo ke esacaradoti ŋolo epol nooi akilo. Nabo ikoŋinapei, erae Acamunet ŋina iloit--Acamunet ŋina eyaunitor iŋes akimorikina ŋina ka Akuj ka ŋituŋa, anerae itorunit nakiikineta ŋuna ajokak nooi akilo.

⁷ Ani kerae tomam ibore esecec a Nacamunet a ŋina ke ekiŋaren, pa kiitanitae nabo Acamunet ŋina a ŋaarei.

⁸ Nai ebala Akuj esecito ŋituŋa keŋ aŋina alimunio tema, “Epote ŋirwa ŋulu ikicamunor ayoŋ ka ŋituŋa a Isirael, ta ŋituŋa ŋulu ka ateker a Yuda a Nacamunet a ŋina Kitete.

⁹ Nyikokini Acamunet ŋin ŋina ikicamunor ayoŋ ka atapapaa kec akoloŋit ŋina arikitor ayoŋ ikes a ŋakan, oyau alo Ijipit. Pa apotu ikes torubakis iwuapito ŋakiro ŋuna ka Acamunet a ŋina abu ayoŋ ocamunotor ka ikes; aŋun, abu ayoŋ nyamitak ikes.

¹⁰ Tokona erae na Acamunet ŋina ikicamunor ayoŋ ka ŋituŋa a Isirael alorwa a ŋulu eponito: Ewuakini ayoŋ Ŋikisila kaŋ natameta kec, egirakini daŋ ikes lotai kec. Aruwor ayoŋ Akuj kec ka eruworosi ikes ŋituŋa kaŋ.

¹¹ Emamukaun ituŋanan ajokis ŋina ka akiitanit akitatam ituŋanan ŋini anakwap keŋ, kori emamukaun lokaato alimokin lokaato keŋ atemar, ‘Toyenu Ekapolon,’ anerae akayenunete ayoŋ ŋituŋa daadaŋ ŋulu arwok ka ŋulu caryo.

¹² Esyoni ayoŋ ŋaronisya kec, nabo nyatamuni ŋasecisya kec jik.”

¹³ Anakirworo ŋuna ka Acamunet a ŋina Kitete, itoodiunit Akuj atemar aŋoroton ŋina ke ekiŋaren; ibore nai ŋini aŋoroton ka elosi amojoŋiyar, erae ikaŋopiyaran.