Ŋibur. 7 - Ebaibul

Esacaradoti ŋolo anyaritae Melekisedek

¹ Arae Melekisedek erwosit ŋolo ke etaun a ŋolo a Salem, torae daŋ esacaradoti ŋolo ka Akuj a ŋina alokidiama nooi. Ani eboŋuni Aburaam alojiye a ŋolo elounia ŋirwosi ŋiomwon, kiryamun iŋes ka Melekisedek ŋolo abu kiterereŋ iŋes.

² Inak Aburaam iŋes atutubet apei anatomon aloboro a daadaŋ a ŋulu aŋatuni iŋes. (Apolou ŋina ke ekiro a Melekisedek iŋes atemar, “Erwosit ŋolo ka akiyookino;” nabo ikwapei araakar iŋes erwosit ŋolo a Salem, apolou ŋina ke ekiro keŋ ace iŋes atemar, “Erwosit ŋolo ke ekisil.” )

³ Emam ŋuna igiritae aŋuna a papa kori a toto kori ŋiyeneta a Melekisedek; emam tari ŋuna igiritae aŋuna ka akidouno keŋ kori ŋuna ka atwanare keŋ. Ikoni iŋes Lokoku ka Akuj; erubakini iŋes erae esacaradoti jik.

⁴ Toanyutu mono iyes epite ŋolo etopolooritere Melekisedek nooi, anerae Aburaam daŋ papaa yok ŋolo ayenen nooi, abu inak iŋes atutubet apei anatomon aloboro a daadaŋ a ŋulu aŋatuni iŋes alojiye.

⁵ Ŋipapae a Lepi ŋulu arae ŋisacaradotin ikes elimokinitae alotooma Ŋikisila a Moses atemar itemokino tocunanakinete ŋatutubeta ŋapeipei anatomon aneni a ŋituŋa a Isirael, iŋes atemar aneni a ŋituŋa a ŋulu ka akwap kec; tari daŋ kerae ŋituŋa ŋul ŋipapae ka Aburaam.

⁶ Pa arae Melekisedek lopapait a Lepi; nai kikote neni daŋ, abu tocun atutubet apei anatomon aneni ka Aburaam, ido abu iŋes kiterereŋ Aburaam, ŋolo abu toryamu ŋakiikineta ŋuna ka Akuj.

⁷ Emam aŋayaŋayat, ileerete ŋakiro ŋun ebe ŋini iterereŋi ŋinice epol akilo ŋini iterereŋio.

⁸ Acunanakinete ŋisacaradotin ŋulu arae ŋipapae a Lepi ŋatutubeta ŋapeipei anatomon ikwapei ŋituŋa ŋulu etwakete, nai acuni Melekisedek atutubet apei anatomon ikwapei ituŋanan ŋini erubakini eyari lopite ŋolo iteyenunitotor Ŋakigireta.

⁹ Apolou a ŋakiro a ŋun iŋes atemar, ani einakini Aburaam atutubet apei anatomon neni a Melekisedek, abu Lepi daŋ, ŋolo acunanakinete ŋipapae keŋ ŋatubeta ŋapeipei anatomon alotuŋa a Isirael, inak Melekisedek.

¹⁰ Tari ŋina ariŋaakar Lepi nyidouno, ikitemari ayai iŋes tooma akuwan ŋina a papaa keŋ Aburaam ŋina eryamunotor Melekisedek ka iŋes.

¹¹ Abu Akuj inak ŋituŋa a Isirael Ŋikisila aŋuna a ŋisacaradotin a ŋulu anateker a Lepi. Kerae koloŋ tojok nooi etic ŋolo a ŋisacaradotin a ŋul, kemam akiitanit esacaradoti ece ebuni alopite a ŋolo a Melekisedek, meere alopite a ŋolo ka Aron.

¹² Anerae ani kiloci ŋisacaradotin, itemokino kilocoi Ŋikisila daŋ.

¹³ Kire, Ekapolon yok ŋolo elimunitoe anakiro a ŋun, erae ŋolo anateker ka ace; emam ituŋanan ice ŋini anateker keŋ arae esacaradoti.

¹⁴ Eyenio daadaŋ atemar edounio iŋes erae ŋolo anateker a ŋina a Yuda; pa alimunit Moses ateker na apaki ŋina erworor ŋakiro ŋuna a ŋisacaradotin.

Esacaradoti ŋolo ikwaan ka Melekisedek

¹⁵ Ileereunete ŋakiro ŋuna ebunio esacaradoti ece ŋolo ikwaan nooi ka Melekisedek.

¹⁶ Pa abu iŋes toruwor esacaradoti alopite a ŋolo acamakinitotor Ŋikisila aŋuna ka ateker keŋ, nai abu toruwor esacaradoti aŋuna ka apedor a ŋina ka akiyar a ŋina nyedaun.

¹⁷ Anerae iteyenunito Ŋakigireta atemar, “Irae iyoŋ esacaradoti ŋoloruba, lopite ŋolo ke esacaradoti a ŋolo anyaritae Melekisedek.”

¹⁸ Aŋun, ekisar ekisil ŋoloŋorot, anerae emam ibore ŋini ikitaanyu ka erae ekoŋinait;

¹⁹ amam ibore ŋini apotu Ŋikisila ŋulu a Moses kisiyookis kire. Nai tokona ikianyu iwon akigeno ŋina ajokan adepar ŋina ikiyauni iwon diyete Akuj.

²⁰ Nabo daŋ, eyai akikoŋiet ŋina ka Akuj aŋuna ka akigeno a ŋin. Abu Akuj nyituruwo ŋiletok a Lepi ŋisacaradotin anakikoŋiet;

²¹ nai abu Yesu toruwor esacaradoti, aŋuna ekoŋio Akuj neni keŋ kire tema, “Ayoŋ Ekapolon elope ekoŋ, nyilocokin ŋatameta kaŋ: ‘Irae iyoŋ esacaradoti ŋoloruba.’ ”

²² Alotooma ŋakiro ŋuna egelegelya ŋun, ikiinak Yesu iwon ŋuna itoodiunito atemar erae na Acamunet ŋina ejok adepar.

²³ Eya nabo ŋakiro ŋace ŋuna egelaaka; alalak ŋisacaradotin ŋulu a koloŋ, anerae pa apedorete ikes arubakin itiyaete etic kec aŋuna atwakeneniata.

²⁴ Nai nyikwaan Yesu ka ikes, eyari iŋes jik, nabo erae iŋes esacaradoti ŋoloruba.

²⁵ Aŋun nai, epedori iŋes jik tokona ka jwi jwi aiun ŋulu daadaŋ epote neni ka Akuj itorunito neni keŋ, anerae eyari iŋes jik, ilipenene Akuj aŋuna a ŋituŋa a ŋul.

²⁶ Yesu nai erae Esacaradoti yok ŋolo Apolon nooi, ŋolo ikitemokino iwon anakiitanit a daadaŋ. Eseg iŋes alotau, emam asecit ka emam ŋuna inyasito iŋes; etyakaritae iŋes alokasecak ka ekyaar iŋes kidiama nakuj.

²⁷ Nyikwaan iŋes ka ŋisacaradotin ŋulu apolok nooi ŋuluce; nyiitana iŋes ainanakin ŋamuronisya neni ka Akuj a ŋinakoloŋit, mono, aŋuna a ŋasecisya keŋ ka aŋuna a ŋasecisya a ŋulucetuŋa, anerae apaki ŋina ainakinia akuwan keŋ, abu inak amuronot apeiinakinet ŋina itemokino jik.

²⁸ A Lokisila a Moses, aseununuyo ŋikilyok ŋulu apalag alotai aruwor ŋisacaradotin ŋulu Apolok nooi; nai anakiikinet a ŋina ka Akuj a ŋina elimunitoe anakikoŋiet a ŋina abuni eriŋa Ŋikisila, aponi toseunae Lokoku ka Akuj ŋolo aponi kituruworoe ŋolo iyookino kire ŋikaru ka ŋikaru.