Ŋibur. 5 - Ebaibul

¹ Esacaradoti daadaŋ ŋolo Apolon nooi, eseununui Akuj alokidiŋ ŋituŋa keŋ, ikotere itiyae etic ka Akuj aŋuna a ŋituŋa; inak ŋainakineta ka ŋamuronisya aŋuna a ŋasecisya.

² Ikwaŋinapei epalagia iŋes daŋ alotau, epataniar iŋes aneni a ŋulu edyakanarete, anerae emam ŋuna eyenete.

³ Ido aŋuna epalagia iŋes daŋ, itemokino inak ŋamuronisya aŋuna a ŋasecisya keŋ, meere aŋuna a ŋasecisya a ŋituŋa bon.

⁴ Nyeseun ituŋanan bon tema apoloor iŋes oruwor Esacaradoti ŋolo Apolon nooi. Akuj bon enyarae ituŋanan kituruwo Esacaradoti ŋolo Apolon nooi--ikwapei anyaraa koloŋ Aron.

⁵ Ikwaŋinapei, abu Kristo nyitopoloor bon kituruwor Esacaradoti ŋolo Apolon nooi. Akuj alope alimokini iŋes atemar, “Irae iyoŋ Lokoku kaŋ, aruwor ayoŋ papa kon nakuwar na.”

⁶ Tolimu nabo Akuj ŋuna igiritae iwace tema, “Irae iyoŋ Esacaradoti ŋoloruba, lopite ŋolo ke esacaradoti a ŋolo anyaritae Melekisedek.”

⁷ Ani eriŋa Yesu eyari anakwap, elipenene, todyekitoi a etoil a ŋolo apolon, kigwori daŋ neni ka Akuj a ŋina eyakar apedor aiun iŋes anatwanare. Ikwapei araakar iŋes ŋolo ainakina neni ka Akuj, abu Akuj kiira ŋakiro keŋ.

⁸ Nabo tari kerae iŋes Lokoku ka Akuj, abu toyenu anaryamun ŋican apolou ŋina ka akerit Akuj.

⁹ Ani kituruwor iŋes ŋolo iyookino kire, abu toruwor ŋolo eyauni aiuno ŋina nyedaun neni a ŋulu daadaŋ ekerito iŋes;

¹⁰ ka abu Akuj tolimu atemar erae iŋes Esacaradoti ŋolo Apolon nooi, lopite ŋolo ke Esacaradoti a ŋolo anyaritae Melekisedek.

Nyiŋero anupit kus

¹¹ Eya ŋakiro ŋuna alalak ŋuna itemokino isua tolimoroe anakiro a ŋun, nai etyono akiteyenun iyes, anerae ibaŋaaketa iyes.

¹² Kire, etemokino iyes tokona toraakas ŋiketatamak, nai iitanito nabo iyes akitatamo ŋakiro ŋuna egeunio akitatam anakiro ka Akuj. Ikokis iyes ŋidwe; akilo akinyam akimuj, eriŋa iitanito akinak.

¹³ Ituŋanan daadaŋ ŋini eriŋa enaki erae ikoku, nyeyeni ŋakiro ŋuna ka akiyookino a ŋina ka Akuj.

¹⁴ Nai erae akimuj ŋina nyamat ŋina a ŋituŋa a ŋulu apolok, a ŋulu ayenut anakitiya epite ŋolo etyaketa ŋakiro ŋuna ajokak ka ŋuna aronok.