Ŋibur. 12 - Ebaibul

Akuj Papa yok

¹ Ikwaŋina nai ikiyakar iwon daŋ ŋisuudae ŋulu alalak, itemokino iwon ojala ibore daadaŋ ŋini ikitukuruworit iwon ka ojala asecit daadaŋ ŋina imiidikina neni yok, oema tokona ikiŋirikinit akerit ŋina eyai kiŋaren yok.

² Orubakisi ikite Yesu ŋolo erae neni keŋ ebunitor anupit yok daadaŋ, ŋolo ilelebikini anupit yok. Abu iŋes todaŋ atwanare alomusalaba, nyemitak ŋileec, anerae apol alelyan ŋina edarit iŋes. Iboi tokona alowae a ŋolo aloteten ekicoloŋ ŋolo ka Akuj.

³ Totamatamata epite ŋolo abunio iŋes todaŋia amoitanut a ŋikasecak, ikotere nyikiup, ido itokadak.

⁴ Alotooma ejiye kus ka asecit, eriŋa iyes nyejiyo akitodol natwanare.

⁵ Ikimuryakis mono iyes ŋakiro ŋuna irworo Akuj neni kus ikitumunikinit ikwapei ŋidwe keŋ a? “Lokoku, nyimenit akisicanet ŋina ikisicania Ekapolon iyoŋ, kiurya nyikikadak ikibuŋae iŋes iyoŋ.

⁶ Anerae ituŋanan ŋini emina Ekapolon, iŋes pei ebuni Ekapolon akisican. Ibuŋae ŋini daadaŋ ecamuni iŋes araakau ikoku keŋ.”

⁷ Aŋun, todaŋa ŋakisicaneta ŋun ikwapei akitatamet. Itoodiunito ikes atemar ikimarit Akuj iyes irae ŋidwe keŋ. Eyai mono lokoku ŋolo nyisicanene papa keŋ a?

⁸ Ani pa kikisicani iyes ikwapei ŋikeedwe ŋuluce daadaŋ, akeepolou atemar meere iyes ŋidwe keŋ ŋulu a kire, nai ŋulu ka akero.

⁹ Atapapa yok ŋulu ikiuruunete iwon, ikisicanete ikes iwon, ido okera iwon ikes. Etya nai ai akerit ŋina itemokino iwon okeritotor Papa yok ŋolo eyai nakuj, ikotere oyara!

¹⁰ Apotu atapapa yok ikisican iwon apaki ŋina euruwuana alopite a ŋolo ayenete ikes, nai ikisicani Akuj iwon aŋuna ka akiŋarakin iwon, ikotere kikwaanikinos ŋipitesyo yok ka ŋulu keŋ.

¹¹ Apaki daadaŋ ŋina ikisicanere iwon, etakani aneni yok erae ibore ŋini ikisiyaloloŋi, meere ŋini ikitalakari. Nai ekaku keŋ, eryamunete ŋulu daadaŋ abu akisicanet ŋin kitatam ekisil ka akiyookino.

Ŋakitatameta ka ŋakicikakineta

¹² Kikeutu nai tokona ŋakan kus ŋuna eupit ka kitogogoŋo ŋakuŋin kus ŋuna emaranete!

¹³ Kisidiiryata ŋirotin, ikotere nyilenyar ŋakejen kus ŋuna sek eŋwalito, nai toruworos ŋuna itaŋaleunio.

¹⁴ Toŋirikisi akisil ka ŋinituŋanan daadaŋ ka toŋirikisi akiboi anakiyar a ŋina Asegan, anerae emam ituŋanan eanyuwari Ekapolon emam ŋun.

¹⁵ Tocoito nyiboŋosi anajokis a ŋina ka Akuj. Nyitemokino idio kus ikokini ekitoe ŋolo erono adwaris keŋ, ido yau ŋican ka tomunaiya ŋikalalak.

¹⁶ Nyitemokino idio kus eruwor ŋini emalaana kori ŋini ejamuwarit Akuj, ikwa Esau ŋolo abu kisyeca anakimujet ka apei bon apolou ŋina araakar iŋes esapat ŋolo kiyae.

¹⁷ Iyenete iyes kire atemar ekaku a ŋun, abu iŋes kiitan aryamun arereŋu aneni a papa keŋ; nai aponi toŋeroe iŋes, anerae pa apedorit iŋes aryamun epite ŋolokilocokinet ŋuna sek aris iŋes kitiya, tari ŋina abunio iŋes kikalounio iwarit akilocokin.

¹⁸ Nyiponito iyes lomoru ŋolo etakani ikwaŋina koloŋ aponiata ŋituŋa ŋulu a Isirael; apotu ikes potu lomoru ŋolo enyaritae Sinai, ŋolo anepya akim, ŋolo ayai akiryonut ka akiyaloloŋ ta ekuwuam ŋolo anyunyura.

¹⁹ Ayai daŋ nen eruye ŋolo ka arupepe ka ecelet ece ŋolo ke etoil. Ani iirarete ŋituŋa etoil ŋol, todyeka atemar nyiirasi nabo etoil ece;

²⁰ anerae pa acamunito ikes akirot ŋina alimunitoe ebe, “Ani tari kerae etyaŋ etapi emoru, itemokino tocakae a ŋamoru.”

²¹ Kire, ŋuna apotu totakanikis neni kec, arae ŋuna etubulok nooi; aŋun, abu Moses tolimu tema, “Amarani ayoŋ alokabule!”

²² Nai ipotu iyes lomoru ŋolo enyaritae Sion, lotaun ŋolo apolon ŋolo ka Akuj a ŋina eyari, Yerusalem ŋolo anakuj, ŋolo eya ŋimalaikan ŋulu alalak.

²³ Ipotu iyes nacunakina ŋina ka alakara ŋina a ŋidwe a ŋulu ka Akuj a ŋulu kiyae, a ŋulu igiritae ŋirorwa kec nakuj. Ipotu iyes neni ka Akuj a ŋina erae akatubon a ŋituŋa a daadaŋ ka neni a ŋitai a ŋituŋa a ŋulu iyookino, a ŋulu aponi kituruworoe ŋulu asegak jik.

²⁴ Arae neni a Yesu iponito iyes, ŋolo abu kitemok Acamunet ŋina Kitete ka anaokot a ŋuna etesegunak anasecisya, ŋuna eyai apolou nooi akilo ŋuna ka Abel.

²⁵ Tocoito iŋerete akiirar ŋakiro a ŋolo irworo. Ani nai pa kebucara Ŋisirael anatubokino apaki ŋina aŋeryoto ŋakiro a ŋolo eciki ikes anakwap, ikibucar nai iwon ikwaani, erae kikiŋer iŋes ŋolo ikiciki iwon anakuj?

²⁶ Abu etoil keŋ kitamaranik akwap apaki ŋin, nai tokona adau iŋes akiikin ebe, “Etamaranikini nabo ayoŋ akwap apeikitamaranikinet; nai meere akwap bon, nai nakuj daŋ.”

²⁷ Isileereunito ŋakiro ŋuna ebookoi “Apeikitamaranikinet” ebe itamaranikinio ka elemaryo ŋisubuna daadaŋ, ikotere nai idoŋi ibore daadaŋ ŋini nyepedoryo akitamaranikin.

²⁸ Aŋun, itemokino iwon olakara, anerae Apukan ŋina eryamunio iwon erae ŋina nyepedoryo akitamaranikin. Itemokino iwon olakaros elipa Akuj alopite a ŋolo italakari iŋes, alotooma akitiditeuna ka akerit,

²⁹ anerae ikwaan Akuj yok ka akim ŋina ikinyamuwari.