Ŋibur. 10 - Ebaibul

¹ Nyepedorete Ŋikisila akitetem ŋakiro ŋun ejok. Erae ikes etorube ŋolo a ŋakiro a ŋuna ajokak a ŋuna epote rwanu. A ŋolokaru elemununuyo ŋamuronisya ŋunapei sek. Ikokinete nai tokona Ŋikisila ituruworete ŋituŋa ŋulu epote neni ka Akuj ŋulu iyookino aŋuna a ŋamuronisya a nu ai?

² Ani kerae kire kitesegunitetei jik anasecit kec ŋituŋa ŋulu elipete Akuj, pa keriŋa ikes eyenete atemar ikirae ŋikasecak, nabo keesikinito alemunun ŋamuronisya.

³ Nai akilo, itatamunito ŋamuronisya ŋun, ŋuna alemununuyo a ŋolokaru ŋituŋa ŋasecisya kec.

⁴ Anerae nyepedorete jik ŋaokot a ŋimoŋin ka ŋuna a ŋamee alemar ŋasecisya a ŋituŋa.

⁵ Aŋakiro a ŋun, abu Kristo ŋina aapuunia iŋes abunore nakwap tolimok Akuj tema, “Ibu iyoŋ nyicamak ŋamuronisya ka ŋainakineta, nai ibu ikiinak ayoŋ akuwan.

⁶ Nyilakara iyoŋ aŋuna a ŋibaren a ŋulu epeyete ŋituŋa a Namuroet aŋuna kon, kori a ŋainakineta a ŋuna elemarere ŋasecisya.

⁷ Abu nai ayoŋ otema, ‘Ee Akuj, ayoŋ lo, acamit akitiya ŋuna icamit iyoŋ, lopite ŋolo igiritere aŋuna kaŋ lokitaabo ŋolo a Ŋikisila.’ ”

⁸ Mono, abu Kristo tema, “Ibu iyoŋ nyicamak ŋamuronisya ka ŋainakineta, nyilakara iyoŋ aŋuna a ŋibaren a ŋulu epeyete ŋituŋa aŋuna kon a Namuroet, kori a ŋainakineta a ŋuna elemarere ŋasecisya.” Abu iŋes tolimu ŋun, tari daŋ kelemununuyo ŋamuronisya ŋun alopite a ŋolo ecamakinitotor Ŋikisila.

⁹ Tolimok nabo Yesu Akuj tema, “Ayoŋ lo, acamit akitiya ŋuna icamit iyoŋ.” Aŋun, adau Akuj alemar ŋamuronisya ŋuna ŋorok, ido elunyok amuronot a Kristo.

¹⁰ Aŋuna etiyaa Yesu Kristo ŋuna acamit Akuj iŋes kitiya, ikitesegun iwon anasecisya alotooma ainakin akeekuwan ainakinet apei ŋina itemokino jik.

¹¹ Itiyaete ŋisacaradotin daadaŋ ŋulu a Ŋiyudayan etic kec a ŋinakoloŋit, einanakinete Akuj ŋamuronisya ŋunapei sek ŋarwa ŋuna alalak. Kikote nen daŋ, nyelemarete ŋamuronisya ŋun ŋasecisya jik.

¹² Nai abu Kristo inak amuronot apei bon ŋina itemokino jik aŋuna a ŋasecisya; ido kiboikin lowae ŋolo aloteten Akuj.

¹³ Idarit tokona iŋes aina Akuj kiwuak ŋimoi keŋ kwap ŋakejen keŋ, toreu iŋes ikes.

¹⁴ Aŋuna ka amuronot ka apei, eturuwo iŋes ŋulu itesegunio anasecit ŋulu iyookino jik.

¹⁵ Ikiteyenikinit daŋ iwon Etau ŋolo Asegan ŋakiro ŋun. Mono, ebala,

¹⁶ “Ebala Ekapolon, erae tokona na Acamunet ŋina ikicamunor ayoŋ ka ikes alorwa a ŋulu eponito. Eteyenuni ayoŋ ikes Ŋikisila kaŋ anatameta kec, egirakini daŋ ikes lotai kec.”

¹⁷ Nabo ebala iŋes, “Nyatamuni nabo jik ŋasecisya kec ka ŋiticisyo kec ŋulu aronok.”

¹⁸ Aŋun nai, ani kedaun alemar ŋasecisya, nyiitana nabo ainakinet ace aŋuna a ŋasecisya.

Oapiyasi neni ka Akuj

¹⁹ Ŋikaitotoi, ikiya tokona iwon ka atitinyu ŋinalomaret Nakibois ŋina Asegan nooi aŋuna ka atwanare a ŋina a Yesu.

²⁰ Ikiŋak iŋes iwon erot ŋolokitete, ŋolo erae ŋolo ka akiyar, alomarya yaaye anaŋga. Erae anaŋga ŋin akeekuwan ke elope.

²¹ Ikiyakar iwon Esacaradoti ŋolo Apolon nooi ŋolo epolokinit ekal ŋolo ka Akuj.

²² Aŋun, oapiyasi neni ka Akuj a ŋitai a ŋulu iwuapito ŋuna a kire ka ananupit a ŋina egogoŋ; nabo a ŋitai a ŋulu iteseguna anasecisya ka ŋawat ŋuna adaun akilotar a ŋakipi a ŋuna asegak.

²³ Orubakisi ikiya nakigeno ŋina ikilimorit iwon, tomam aŋayaŋayat, anerae Akuj ŋina adau akiikin iwon, erae ŋina ikinyoma.

²⁴ Ewara epite ŋolo ikisimukekinor iwon make, ominakisi ŋuluce ka etiyata ŋuna ajokak.

²⁵ Nyikipalik acunanakin iwapei ikwaŋina apalikiniata ŋice. Nai orubakisi ikisimukekina make, nooi anapaki a na a ŋina aapuunia Akoloŋit ŋina ke Ekapolon.

²⁶ Emam nabo amuronot ace ŋina elemari ŋasecisya erae kikiredak iwon ikirubakinit ikisecenene, tari kedaun akiteyenikin iwon ŋakiro ŋuna a kire.

²⁷ Akilo, ŋuna tokona idoŋit iŋes akidarun alokabule Akoloŋit ŋina ka Atubokino ka akim ŋina amwanan nooi ŋina enyamuwari ŋulu itepegete Akuj.

²⁸ Ituŋanan daadaŋ ŋini abil Ŋikisila a Moses, earyo emam akisyon, erae kelimut ŋisuudae ŋiarei kori ŋiuni atemar esecit iŋes.

²⁹ Ikokini nai ai ituŋanan ŋini ejamuwarit Lokoku ka Akuj? Ŋini itusubunit koŋin ŋaokot ŋuna ka Acamunet a ŋina ka Akuj ŋuna etesegunere iŋes anasecisya, ŋini nabo iyanyi Etau ŋolo etoodikini ajokis neni keŋ? Totama mono iyes, etya ai akisicanet ŋina eryamuni ituŋanan ŋin!

³⁰ Anerae ikiyeni iwon atemar abu Akuj tema, “Erae akinyaŋanar ŋina kaŋ; ayoŋ elope enyaŋari” ka nabo abala, “Etubokini Ekapolon ŋituŋa keŋ.”

³¹ Erae ibore ŋini kerer nooi akimin nakan ka Akuj a ŋina eyari!

³² Totamutu ŋuna koloŋ apotu kitiyakin neni kus. Alorwa a ŋul, kidaut iyes ayenun ŋakiro ŋuna ka Akuj ipotu iyes toryamut ŋican ŋulu alalak, nai tari kikote nen, ipotu nyijamakis.

³³ Ipotu iyes a ŋacepakio toruworos ŋulu ikiyanyo ka itobolyare alokiŋaren ŋituŋa ka a ŋacepakio ipotu totenito akimorikin ka ŋulu etiyanakinio neni kec ikwaŋinapei.

³⁴ Ipotu iyes tomora ka ŋulu aya mabus ŋican kec, ipotu daŋ tocamut ka alelyan eŋataryo ŋiboro kus, aŋuna iyeniata iyes atemar iyakatar ŋiboro ŋulu ajokak akilo, ŋulu eroparete.

³⁵ Aŋun, nyijamakis atitinyikinit kus ŋina ikiteryamuni iyes eropit ŋolo apolon.

³⁶ Itemokino totitinyikis, ikotere itiyaete ŋuna ecamit Akuj, ido tocamut ŋuna ikiikinit iŋes.

³⁷ Anerae egiritae Nakigireta atemar ebala Akuj, “Idoŋit apaki adio cici tosodi bu ŋolo itemokino bu, nyedidi iŋes.

³⁸ Aŋun, iŋes ŋini iyookino aŋuna akanupitor ayoŋ, eyari, nai iŋes ŋini ikutukutoori, nyakajoikinete ayoŋ ŋakiro keŋ.”

³⁹ Meere iwon ŋituŋa ŋulu ikikutukutoori, ido omunyaros, nai ikirae iwon ŋulu ikinupit, ido oiunos.