Ŋakit. 9 - Ebaibul

Anyaritoi ŋina ka aosou

¹ Adau aosou akiduk akai keŋ, adau akitiyaun ŋipirin ŋikanikaarei aŋuna ka akai a ŋin.

² Aar iŋes ŋibaren keŋ aŋuna a ŋasuban ka adau akigur epiini keŋ, adau daŋ aosou akitemokin emesa ŋolo ka akimuj keŋ.

³ Eakiya iŋes ŋaketiyak keŋ ka enyara iŋes, enyarit iŋes ŋituŋa ŋulu iboiyete anakiboisyo a ŋuna aoyak alotaun ebala,

⁴ “Tolomutu tooma iyes ŋulu irae ŋibaŋaanotin!” Ebala aosou neni a ŋibaŋaanotin ebe,

⁵ “Potu kimuja akimuj kaŋ ka tomata epiini ŋolo adau ayoŋ akigur.

⁶ Toesikisi abaŋao kus, ikotere iyarete, kiboiyoto irae ŋulu iyakatar ayenut.”

Ŋakiro ŋuna a kire ŋuna a daadaŋ

⁷ Ituŋanan daadaŋ ŋini ecamit akisirworiun ŋini ejamuwarit ŋuluce, eryamuni emoronit, ituŋanan daadaŋ ŋini elimokini ŋini itiyae aronis aesikin aronis, eryamuni awano.

⁸ Akiman bon ikimani iyoŋ ituŋanan ŋini ejamuwarit ŋuluce kilimok iyoŋ iŋes aesikin ajamuwarit ŋuluce; ikiminakini iyoŋ ituŋanan ŋini aoson kilimok iyoŋ iŋes aesikin aronis.

⁹ Kitatam ŋituŋa ŋulu aosok, eosokyoto ikes nabo nooi; kitatam ŋituŋa ŋulu iyookino, eryamunete ikes ŋuna kitiya anakiro a ŋuna itatami iyoŋ ikes.

¹⁰ Erae akitopoloorit Ekapolon akisyakinet ŋina ka aosou, erae ayenut iŋes ŋolo Asegan ayakau ka ayenut.

¹¹ Aosou iŋes iatakini ŋirwa ŋulu ka akiyar kon, iatakinio nakiyar kon ŋikaru ŋice.

¹² Ani kios iyoŋ, ikiteryamuni iyoŋ aosou ŋuna icamit; ani kirae iyoŋ ŋini ijamuwarit ŋakiro, iyoŋ ilope iryamuni ŋican.

Anyaritoi ka akiikinet ŋina ka abaŋao

¹³ Emina aberu ŋinabaŋaanot acela nooi irworo; erae iŋes abaŋaanot ŋina emam ibore eyeni.

¹⁴ Emina iŋes akiboi alopuke a akai keŋ, emina iŋes akiboiyonokin lokicoloŋo ŋulu eya neni ikeuna nooi alotaun,

¹⁵ emina iŋes anyarit a nen ŋituŋa ŋulu itorete nen, ŋituŋa ŋulu ecamito alunyar a nen elosete.

¹⁶ Ebala iŋes enyarit ikes ebe, “Tolomutu tooma iyes ŋulu irae ŋibaŋaanotin!” Ebala iŋes neni a ŋibaŋaanotin ebe,

¹⁷ “Ebobok ŋakipi ŋuna ekokounitae, ebobo nooi akimuj ŋina imujo pa eyenete ŋituŋa ŋuluce.”

¹⁸ Nai nyeyeni iŋes atemar eyakasi ŋitai a ŋikatwak nen, nyeyeni iŋes atemar eyakasi ŋipeyok keŋ nauwat ŋina ka akibois a ŋikatwak.