Ŋakit. 7 - EbaibulAlyokonu ŋina ikisuparya amalao 1 Ikaakoku kiwuap ŋakiro kaŋ, kiwuak ŋakiciketa kaŋ lotau kon. 2 Kiwuap ŋakiciketa kaŋ, ikotere iyari, kiwuap ŋuna eketatam ayoŋ iyoŋ lopite ŋolo iyokiunitor iyoŋ akoŋu kon nyewana. 3 Kiwuap ŋakiro kaŋ ŋapakio daadaŋ, kigirak ŋun lotau kon. 4 Kiwuak aosou lotau kon erae nakaato kon, kiwuak ayenut lotau kon erae ekone kon ŋolominat. 5 Ikiuryarete ikes iyoŋ anamalaae, ikiuryarete ikes iyoŋ anakalomak a ŋuna itoboboto ŋakiro a ŋun. 6 Apeikoloŋit ayai ayoŋ kai kaŋ, abu oripiya kiŋa alodirisa, 7 abu eŋolik ŋisorok ŋulu emam ŋakiro eyenete, abu ayoŋ eŋolik alokidiŋ ŋisorok ŋul esorokit epei ŋolo pa ayeni ŋuna etiyae. 8 Alosi iŋes alorot a ŋolo a etaun, alokoona a ŋolo ayai diyete akai ŋina eboiyo aberu ace, alosi iŋes lowae ŋolo ayai akai a aberu a ŋin, 9 arae ŋisaae ŋul ŋulu ke eboŋ ŋulu edoiyorya akoloŋ ŋisaae ŋulu ka akuwar ŋulu iryonunia akwap. 10 Abu nai aberu bu akisiryam iŋes, anapit aberu ŋin ŋilowi lopite ŋolo enapyata ŋamalaae ka aye alotau keŋ amodiyar esorokit ŋol. 11 Arae iŋes aberu ŋina atitiny ŋina pa erumito ŋileec; erimit iŋes jik pa eboiyonokin lore keŋ, 12 ayai iŋes apaki ace lorot ŋolo ke etaun ka apaki ace nalapatu ŋina eboiyoto ŋituŋa alotaun, amina iŋes awoenen alokoonae a erot idarit ŋinimodiyara. 13 Abu aberu ŋin totunakin esorokit ŋol tonu, kitek aberu ŋin esorokit ŋolo a ŋakonyen a ŋuna ikisuparete tema neni keŋ, 14 “Ikiyakar ayoŋ kai kaŋ amuronot ŋina a ekisil, esiyookini ayoŋ nakoloŋit na ŋuna adau akikoŋ. 15 Aŋun, abu tokona ayoŋ ne akisiryam iyoŋ, ekewarit ayoŋ iyoŋ ekeitanit nooi, ido adau aryamun iyoŋ! 16 Apesit ayoŋ ekitaada kaŋ ejok nooi, a ŋanaŋgae a ŋuna amilimilak a ŋuna eaunitae alo Ijipit. 17 Etukukuny ayoŋ ekitaada kaŋ a eminae a ŋolo akukunyon ka akimyet a ŋina akukunyon ta a ekitoe a ŋolo enyaritae einamon. 18 Bua orukosi opero kaapei ikiminin akitodol taparacu; bua etalakasi ŋawat yok ikiminin. 19 Emam lokile kaŋ alore; elosit iŋes neni alwanan. 20 Abu iŋes ya ekikapu keŋ kilelebik ŋisiliŋa, nyeboŋuni iŋes lore atipei akitodol ŋina edolyoto ŋisabito ŋiarei.” 21 Abu nai aberu ŋin kimaimaa esorokit ŋol a ŋakiro keŋ a ŋuna abobok a ŋun, kisupa iŋes a erwor keŋ a ŋolo abobon a ŋol. 22 Abu esorokit ŋol kiwuapak aberu ŋin atipei, abu iŋes kiwuapak aberu ŋin esibit emoŋ ŋolo erikoryo akiŋol, kori esibit atili ŋina ecak atacit ŋina elokitere auno, 23 ŋina ikamuni iŋes togumere a ekaleŋeleŋet lotau. Alosi esorokit ŋol nen esibit ikenyit ŋini ikomae neni eyai atawuatat, pa ayeni iŋes atemar emunaari aberu ŋin akiyar keŋ. 24 Nai tokona ŋidwe kaŋ, kiirasi ŋakiro kaŋ, topupokisi ejok ŋakiro ŋuna erworo ayoŋ. 25 Nyicamakis ŋitai kus ikibatarete iyes nyiwuapa ŋuna a aberu a ŋin; nyioliyosi nyiwuapakis ŋuna etiyae aberu ŋin. 26 Elalak ŋikilyok ŋulu eturuwo aberu ŋin ŋicaryo, aridaiya iŋes ŋikilyok ŋulu alalak ŋulu nyimarun. 27 Erae akai keŋ erot ŋolo elosere nakibois a ŋikatwak, erae erot ŋolo euruwuana atuboror natwanare. |
Ngakarimojong Interconfessional Bible © Bible Society of Uganda, 2008.
Bible Society of Uganda