Ŋakit. 6 - Ebaibul

Ŋakiro ŋuna itiyasi ŋuna ikilimokinitae akiwuap

¹ Ikaakoku, ani kiikinit iyoŋ akitac eden ŋolo idenitor ikidunyet kon ituŋanan ice, ani kiikina iyoŋ ka ituŋanan ice,

² ani kikikamunito iyoŋ ŋakiro ŋuna ibu iyoŋ tolimu, ani keruworo ŋuna kon ŋakiro ŋuna ibu iyoŋ kiik ŋice,

³ kitiya nai nu ikaakoku toiunia akiyar kon, anerae ikireik tokona iyoŋ ikidunyet kon ŋakiro keŋ, ape atipei neni a ikidunyet kon todyek iŋes ikisyon iyoŋ anakiro a ŋuna ibu iyoŋ kiik iŋes.

⁴ Nyicamu ŋajo epote neni kon, nyicamu ŋajo kimukumukut anakonyen kon,

⁵ toiu akiyar kon lopite ŋolo eemya agete toiu akiyar keŋ aneni a ekerikan, toiu akiyar kon lopite ŋolo epororya ikenyit anakan a ekekaman ŋikeny.

⁶ Iyoŋ ikalanyanot ape mono neni elomunitor ekatapan; totamatama mono iyoŋ epite ŋolo itiyaata anakiyar kec, ikiinakini nen iyoŋ aruwor ŋini ios.

⁷ Tari kemamukar ekatapan erwosit, ekarikon, kori ekepukan,

⁸ Idyasi akimuj keŋ nakamu erae ŋin apaki ŋina elemya iŋes tocunak akimuj keŋ.

⁹ Okoe ikalanyanot, apaki ŋina etya ai iayi iyoŋ iperi? Ori mono inyounio iyoŋ anajo kon?

¹⁰ Ibala iyoŋ ebe, “Okoe ojotoor mono iwadio, kerae okopu ŋajo ŋadi, kerae obilak ŋakan iwadio eeŋu.”

¹¹ Nai ebuni akulyako neni kon ikwa ekokolan, ebuni akicana ŋinibore neni kon lopite ŋolo ebunio ituŋanan ŋini eyakar ŋiboro ŋulujiet akisiiryakin iyoŋ.

¹² Irimit ekasyaat ka ekaronon irworo ŋakiro ŋuna erae alyokonu,

¹³ irimit iŋes eŋoleŋole ka eniemi akitiya aronis. irimit iŋes edodanari ŋimoyo keŋ,

¹⁴ ileleba ŋileec lotau keŋ ka etuki a ŋinapaki akitiya aronis, isyaanakini a ŋinapaki akisigurokin ŋituŋa.

¹⁵ Ituŋanan ŋini itiyae ŋun, eryamuni ŋican atipei, inyasun nooi nyepedoryo nabo akisirworiun.

¹⁶ Eyakasi ŋiboro ŋikanikapei ŋulu nyecamit Ekapolon, eyakasi ŋikanikaarei ŋulu erae asiilyo aneni keŋ.

¹⁷ Ŋul ikes lu: Ŋituŋa ŋulu etakanete anakonyen kec itopolooro bon nooi, ŋituŋa ŋulu irworosi alyokonu, ŋituŋa ŋulu earete ŋituŋa ŋulu emam aronis itiyato,

¹⁸ ŋituŋa ŋulu etukete alotai kec akitiya aronis, ŋituŋa ŋulu iburiburete akiem akitiya aronis,

¹⁹ ŋisuudae ŋulu irworosi alyokonu ka ŋituŋa ŋulu isyaanakinete egurigur alokal.

²⁰ Ikaakoku, kiwuap ŋakiro ŋuna ikicik iyoŋ papa kon, nyimyek ŋakiro ŋuna ikitatam toto kon iyoŋ.

²¹ Kiricak ŋakiro ŋun alotau kon a ŋinakoloŋit; kitusub ikes ibore ŋini inapit iyoŋ alodokole kon.

²² Ikitenete ikes iyoŋ apaki ŋina ilosyo; ikidarete ikes iyoŋ apaki ŋina iperyo ka ikisirworete ikes iyoŋ apaki ŋina ikenyunia.

²³ Erae ŋakiciketa ŋun etaa aneni kon ka erae ŋakitatameta ŋun akica aneni kon erae ŋuna ebookoi iyoŋ toesik ŋuna ikitatamete epite ŋolo emaikina iyoŋ toyarya.

²⁴ Erae ŋun ŋuna ikiunete iyoŋ anaberu a ŋina amalaanan, erae ŋun ŋuna ikiunete iyoŋ anakiro a ŋuna abobok a ŋuna irworo akaloman.

²⁵ Nyicamu etau kon etemari ibus akaloman ŋin, nyicamu akibuses a ŋakiir keŋ ikisupari iyoŋ.

²⁶ Epedori ekile akipaŋgaun amalaat a ŋisiliŋa a ŋulu etya ŋulu egyelere amukat, nai epedori akaloman akitasalun akiyar a ekile a ŋolo aloma ka iŋes.

²⁷ Epedori mono ituŋanan akiwuakin akim namuroi keŋ, ido nyenom akim ŋin ŋilowi keŋ a?

²⁸ Kori epedori mono ituŋanan akipuda emam ŋamuk ŋatotol ŋuna eriraete, ido nyenoma ŋatotol ŋun nenidapal a ŋakejen keŋ a?

²⁹ Ikokinete ŋakiro nenipei nen aneni a ituŋanan a ŋini elomi aberu a ikidunyet keŋ; mam ituŋanan ŋini ani keloma ka aberu a ŋinice nyisicani.

³⁰ Nyeminasi ŋituŋa akiwarit ekokolan erae kelema akimuj kimuj aŋuna enyamitor iŋes akoro.

³¹ Nai ani kikamun iŋes, iatakini iŋes ŋice ŋikanikaarei nibore ŋini alemarit iŋes, etwaniyari iŋes ibore daadaŋ ŋini sek ayakar iŋes kai keŋ.

³² Ebaŋaana ituŋanan ŋini elosi akilom aberu a ŋinice, ituŋanan ŋini itiyae ŋun, eaunit atwanare nakuwan keŋ.

³³ Eryamuni iŋes ŋajemei ka mam ituŋanan ikinyomi iŋes, nyimuryakini ŋituŋa aronis ŋina itiyae iŋes.

³⁴ Aŋuna sek ilelebar alilit ka aŋoit lokile a aberu a ŋina abu tolom, nyisyoni iŋes ekaloman ŋol apaki ŋina inyaŋarya ŋuna abu ekaloman kitiya.

³⁵ Nyecamuni iŋes atemar okoinakin ibore idio aŋuna alomia aberu keŋ; eŋeri iŋes tari ŋakaluŋuluŋui tari kelalak nooi daŋ.