Ŋakit. 30 - Ebaibul

ŋakiro ŋuna erworo Agur

¹ Erae nu ŋakiro ŋuna erworo Agur lokoku a Yake. Ebala ituŋanan ebe, “Okoe Akuj, apapanu ayoŋ, okoe Akuj apapanu ayoŋ, alipite mono apedorya ayoŋ akilounia ŋican kaŋ?

² Ayoŋ abaŋaana nooi alotuŋa a daadaŋ; amamukar ayoŋ ayenut ŋina eyakar ituŋanan.

³ Nyeyenuna ayoŋ ŋakiro ŋuna ka aosou, nyayeni ayoŋ tari ŋakiro ka Akuj a ŋina asegan.

⁴ Ŋae mono alosit kidiama nakuj, ido toboŋu? Ŋae mono eriraunit ekuwuam tobun anakan? Ŋae mono aokunit ŋakipi a elou keŋ? Ŋae iwuakinit ŋakisaleta ŋuna ka akwap? Ŋae ekiro keŋ? Ŋae ekiro alokoku keŋ? Tolimokinae ayoŋ erae kiyenete!

⁵ Isiyoonokini Akuj ŋakiro keŋ daadaŋ; erae Akuj aupal a daadaŋ a ŋulu elosete aiuno neni keŋ.

⁶ Nyiatak ŋakiro ŋace nakiro nu; ani kiatak ituŋanan, epedori Akuj akitoŋo iŋes kisileereu alyokonu a ituŋanan a ŋin.

⁷ Okoe Ekapolon, ŋakiro ŋaarei bon ekeŋisit ayoŋ iyoŋ; nyiŋer ainakin ayoŋ ŋakiro nu eriŋa ayoŋ nyetwana,

⁸ kiuryarae ayoŋ nyaruwor ŋini alyokono, ido nyikituruwo ayoŋ ŋini akulyakana, kori ŋini abarit nai inakinae ayoŋ akimuj ŋina eitanit a ŋinakoloŋit.

⁹ Acepaki apedori ayoŋ akiŋer iyoŋ erae karyamu akimuj ŋina alalan nooi, ido otema, ‘Ekapolon mono ŋae?’ kori apedori ayoŋ aruwor ikulyakit, ido okoko, ojoŋo akitopoloorit ekiro ŋolo ka Akuj kaŋ.

¹⁰ Nyiyanyi eketiyan aneni eyai ekapolon keŋ, epedori eketiyan ŋol akigworonokin iyoŋ, ido toryamu iyoŋ ŋican a ŋakiro a ŋun.

¹¹ Eyakasi ŋituŋa ŋulu eminasi akicen atapapa kec, ido nyegasete toryamut atatoto kec arereŋu.

¹² Eyakasi ŋituŋa ŋulu itojokasi alorwor kec, nai nyikoŋorito ikes akitiya aronis.

¹³ Eyakasi ŋituŋa ŋulu etamete atemar ikijokak nooi, okoe etya ajokis ŋina etamete ikes atemar ikijokak ai!

¹⁴ Eyakasi ŋituŋa ŋulu eryenyanikinito ŋikulyakanotin ka ŋulu a ŋican anakidem ŋiboro kec, ido erae ŋol epite ŋolo eryamunitotor ikes ibore ŋini eyaryata.

¹⁵ Eyakar ediket ŋitak ŋiarei ŋulu igworosi ebasi, ‘Inakinae, inakinae.’ Eyakasi ŋiboorei ŋiuni ŋulu nyimwokeneneete; eyakasi ŋiboorei ŋiomwon ŋulu eriŋa nyetemara ‘Etemokin’:

¹⁶ Akibois ŋina a ŋikatwak, akook ŋina nyidoe, ŋalup ŋuna nyeupeneneete ŋakipi ka akim.

¹⁷ Ituŋanan ŋini ite papa keŋ ejamuwarit, ido tojamuwarite akiwuap ŋakiro a toto keŋ, editarete ŋikurukwa ŋakonyen keŋ anakadipaalat, enyamete ŋataruk akuwan keŋ.

¹⁸ Eyakasi ŋiboorei ŋiuni ŋulu akanirarito ayoŋ nooi; eyakasi ŋiomwon ŋulu nyayeni ayoŋ:

¹⁹ Epite ŋolo eporyo egole alokidiama, epite ŋolo elosyo emun anataaba, epite ŋolo iyooror ameeli ananamio neni elosi ka epite ŋolo eminakinotor edya ka apese.

²⁰ Erae lu ŋipitesyo ŋulu ka akaloman: Ani imuji iŋes, eninae akituk jik ido ebala, ‘Mam ibore ŋini aronon ŋini etiyat ayoŋ.’

²¹ Eyakasi ŋiboorei ŋiuni ŋulu itamaranete akwap, eyakasi ŋiomwon ŋulu nyepedori akwap akidaŋidaŋ ŋakiro kec:

²² Eketiyan ŋolo eruwor erwosit, ibaŋaanot ŋini eyakar akimuj ŋina alalan,

²³ aberu ŋina sek emam ituŋanan ecamit akiit, ido kiitae ekaku ka aketiyan ŋina iritari akapolon keŋ kilunyokin iŋes neni sek ayai akapolon keŋ.

²⁴ Eyakasi ŋiboorei ŋiomwon ŋulu edisyak anakwap, nai eosok ikes nooi:

²⁵ Erae ekatapan ŋisubuna ŋulu edit agogoŋu, nai idyasete ikes akimuj kec nakamu;

²⁶ erae ŋadukae ŋisubuna ŋulu edit agogoŋu, nai epedorito akiduk ŋakais kec natabab;

²⁷ erae emaase ŋisubuna ŋulu emam ekepukan, nai elosete kaapei a ŋatukon.

²⁸ Epedori ituŋanan akikamun agereger ka akan, nai iboiyete ŋageregerya anakais a ŋirwosi.

²⁹ Eyakasi ŋisubuna ŋiuni ŋulu ikinirarete elosete, eyakasi ŋiomwon ŋulu ikinirari apolou kec:

³⁰ Eŋatuny ŋolo erae iŋes egogoŋ alotyaŋ a ŋulu ka ariet a daadaŋ, ido nyekerit eŋatuny etyaŋ edio;

³¹ ekokorooit ŋolo ereit ŋuluce, ekoroe ŋolo ereit ŋuluce ka erwosit ŋolo elosi alokiŋaren ŋituŋa keŋ.

³² Ani kidaunit iyoŋ akitiya ŋuna ka abaŋao, kidaunit akitopolooro bon, kori ani kidaunit ayere akitiya aronis, tobun a akan akituk kon, togeu atatamatam.

³³ Ani kibuka iyoŋ ŋakile, erotuni akimyet, ani kinaŋ iyoŋ ituŋanan lokumes ibuyete ŋikumes, ani kiyau iyoŋ egurigur kitoŋo ŋinice, ilomari iyoŋ locan.”