Ŋakit. 3 - Ebaibul

Ŋakiro ŋuna ikilimokinitae akikinyomia ka akitopoloorya Akuj

¹ Ikaakoku, nyikimuryakis ŋakiro ŋuna eketatami ayoŋ iyoŋ, totamunite alotau kon ŋakiciketa kaŋ;

² anerae ikiinakinete ŋakiro ŋun iyoŋ akiyar ŋikaru ŋulu alalak ka ikiinakinete akitiya ŋinibore ejok.

³ Nyijamak amina ka akikinyoma, kitusub ikes eborosit ŋolo ebusan ŋolo inapit iyoŋ alodokole, kigirak ikes lotau kon.

⁴ Ani kitiya iyoŋ ŋun, iruwor iyoŋ ŋini ikipuritoe ka ikitojokitae aneni ka Akuj ka alotuŋa.

⁵ Kikinyom Ekapolon a etau kon a daadaŋ, nyiruwor ŋini ikinyomit ayenut kon a ilope.

⁶ Tocamunite Ekapolon alotooma daadaŋ ŋuna iwuapit iyoŋ, ikitoodikini Ekapolon iyoŋ erot ŋolo ejok.

⁷ Nyitusubana anakonyen kon ŋini ios; kitopoloorite Ekapolon ka toesik aronis.

⁸ Ikiinakinete ŋun iyoŋ araakau ŋini eŋale akuwan ka ŋini iryamunit agogoŋu a ŋinapaki anakuwan kon.

⁹ Kitopoloorite Ekapolon anainanakin iŋes ibore idio alobari kon, inanakini Ekapolon ŋaraito a ŋikinyom kon a daadaŋ.

¹⁰ Ŋun nai ilelebunotor ŋikinyom natukit kon todaun iwace iwuakino, ido ilelebun epiini napanya kon ŋuna ecuwanakinio.

¹¹ Ikaakoku, nyijamuwa ŋakiro ŋuna ebala Ekapolon iyoŋ nyitiya, kori nyikiup akiiranar ŋuna ikisicanere iyoŋ,

¹² anerae isirwori Ekapolon ŋini emina Ekapolon, ikotere toesik akitiya aronis, itiyae Ekapolon ŋun lopite ŋolo isirworya papa ikoku keŋ ŋini elakara papa keŋ aŋuna keŋ.

Ebari ŋolo a kire

¹³ Elakara ŋituŋa ŋulu eryamunete ŋakiro ŋuna ka aosou, elakara ŋituŋa ŋulu eryamunete ayenunun ŋakiro,

¹⁴ anerae ibore ŋini eryamuni ituŋanan anaosou, iloit tari aryamun esilipa. Iryamuni iyoŋ anaosou eropit ŋolo iloit tari aryamun egolid.

¹⁵ Ejok aosou nooi iloit tari ŋinapen ŋulu amilimilak, emam anibore a daadaŋ a ŋini iitanit ituŋanan epedoryo akisikwaan ka aosou.

¹⁶ Ikiinakini aosou iyoŋ akiyar ŋina aoyan, erae ekisil bon eryamuni ituŋanan iwuapit ŋuna ka aosou.

¹⁷ eryamuni ituŋanan alakara iwuapit ŋuna ka aosou erae ekisil bon eryamuni ituŋanan iwuapit ŋuna ka aosou.

¹⁸ Erae aosou ekitoe ŋolo ka akiyar aneni a ŋulu einakina neni ka aosou, eryamunete ŋulu einakina neni ka aosou ŋarereŋisyo.

Aosou ŋina asubia Akuj ibore daadaŋ

¹⁹ Abu Akuj anaosou keŋ tosub akwap, abu Akuj anayenut keŋ kiwuak kidiama;

²⁰ abu aosou ka Akuj kituruwo ŋaŋololin neni elelyaata ŋakipi ka kituruwo ŋidouwon neni eponianata ŋakipi kwap.

Aiuna ŋina a kire

²¹ Ikaakoku, nyimyek aosou epuripuriyar aneni kon, torubak iyakatar aosou ŋina ileere alotuŋa ka ayenut ibore ŋini ejok ka ŋini erono;

²² ikiinakinete iyoŋ aosou ka ayenut akiyar ka eruwor akiyar ŋin ŋina ikitalakarit iyoŋ ka ŋina ejok aneni kon;

²³ ŋun nai ilosyo iyoŋ alorotin kon emam ŋace, emam ibore ikigukini iyoŋ.

²⁴ Ani tari apaki ŋina iperyo iyoŋ, mam akuryanu eyakaun neni kon, ikibobokinete iyoŋ ŋajo nooi apaki ŋina iperyo iyoŋ.

²⁵ Nyikuryaniar aŋuna a ŋican a ŋulu epote pa sek etamakinitae atemar epote, kori aŋuna ka amunyaro a ŋina epyaari ŋulu aronok.

²⁶ Ikidari iyoŋ Ekapolon irae ŋini iuna, nyikicamakini iŋes iyoŋ toloma locan.

²⁷ Nyiŋer alimokin ŋuna ajokak neni a ŋulu iitanito akiirar ŋuna ajokak, kitiya ŋun neni kec erae kiyakar iyoŋ apedor alimokin ikes.

²⁸ Nyilimok ikidunyet kon ebe, “Ape mono, ido toboŋu ekaku, akainakini ayoŋ iyoŋ moi taparacu ibore ŋini ilipa iyoŋ.” Nai toyakar bo iyoŋ ibore ŋin apaki ŋinapei ŋin.

²⁹ Nyiye akitiya ŋuna aronok neni a ikidunyet kon a ŋini iboiyete ka iyoŋ irae ŋulu ikinyoma make.

³⁰ Nyiburata ka ituŋanan idio emam ŋakiro ŋuna emaikina iyes iburaata ka emam ŋuna aronok ŋuna itiyat ituŋanan ŋin neni kon;

³¹ Nyirakaaniar aŋuna a ŋiryenyaanotin, nyicamu akiwuap ŋuna itiyaete ikes;

³² anerae nyecamit Ekapolon ituŋanan ŋini itiyae asiilyo, nai eyai lotau a Ekapolon ituŋanan ŋini iyookino.

³³ Iceni Ekapolon ŋikalya a ŋulu aronok, nai iterereŋi ŋikalya a ŋulu iyookino.

³⁴ Itepegi Akuj ŋiketurok, nai itoodikini ajokis neni a ŋulu itiditeuna.

³⁵ Eryamunete ŋikaosok akitopolooro, nai erubakinete ŋileec iatasi neni a ŋibaŋaanotin.