Ŋakit. 22 - Ebaibul

¹ Ejok anyarit ekiro kon a ŋakiro a ŋuna ajokak akilo anyarit aŋuna ibaritor iyoŋ, ido ejok araakau ŋini ijok alotuŋa akilo tari esilipa, kori egolid.

² Erae nu ŋuna eyakatar ŋikabarak ka ŋikulyak: Ekapolon iŋes erae ekasuban kec a daadaŋ.

³ Epatana ŋikaosok ayenun atyonis ebunit, ido toŋopa nai erubanakinete ŋibaŋaanotin itiyaete pa eyenete atyonis ŋina ebunit, ido elomanarete locan.

⁴ Eropit ŋolo einakini Ekapolon ŋulu itiditeuna bon ka ŋulu itopoloorito Ekapolon, iŋes ebari ka akitopolooro ta kiyar.

⁵ Elalak ŋatyokisyo ka ŋaloketa anakiro a ŋuna iwuapito ŋulu aronok, nai iŋes ŋini iyokiunit akiyar keŋ, iboi erae ŋini elwana anakiro a ŋun.

⁶ Kitatam ikoku eriŋa edit akiwuap ŋuna iyookino, ikotere ani epolouni, nyimyek akiwuapit ŋun.

⁷ Epolokinito ŋikabarak ŋikulyakanotin, ido erae ŋikedeniok ŋiboro ŋipi a ŋulu ideniyoto ikes ŋiboro.

⁸ Ani kitiyae ituŋanan ŋakiro ŋuna nyiyookino, elomunete ŋican anakiro a ŋun, ido itasalunete ŋatyokisyo ŋun ŋakiro ŋuna isicanitor ituŋanan ŋin ŋuluce.

⁹ Eryamuni ituŋanan ŋini emorete ka ŋuluce ŋiboro ŋulu eyakar arereŋu, anerae emorete iŋes ka ŋikulyakanotin akimuj keŋ.

¹⁰ Kirita aneni kus ituŋanan ŋini ikijamuwarit, iŋes edaunor egurigur, ebura ka edaun akiyenya.

¹¹ Ani kimina iyoŋ araakau ŋini ijok alotau ka ŋini irworo ŋakiro ŋuna ajokak, iruwor iyoŋ ekone a erwosit.

¹² Erae acamit ŋina a Ekapolon aanyun atemar irworo ituŋanan ŋakiro ŋuna ka aosou, nai eŋerit Ekapolon akiiranar ŋakiro ŋuna irworo ituŋanan ŋini nyikinyoma.

¹³ Ebala ituŋanan ŋini ekalanyana ebe, “Eyai eŋatuny kiŋa!” kori ebala, “Akaarete ayoŋ ŋituŋa kaloma kiŋa!”

¹⁴ Erae ŋakiro a aberu a ŋina emalaana akipany ŋina ecukul nooi, ituŋanan daadaŋ ŋini elomari nanyunyura ŋina a Ekapolon elomari nakiro a aberu a ŋin.

¹⁵ Itiyae ikoku ŋakiro ŋuna ka abaŋao aŋuna ebaŋaania iŋes, nai ani kedai ikoku, edaun akitiya ŋuna ka abaŋao aneni keŋ.

¹⁶ Ituŋanan ŋini edemanari ŋikulyak ŋiboro kec aŋuna ka abarya ka ŋini einanakini ŋikabarak ŋiboro keŋ, eruwor ŋul daadaŋ ŋikulyakanotin.

Ŋakiro ŋuna erworosi ŋikaosok

¹⁷ Topupok, ido eketatami ayoŋ iyoŋ ŋakiro ŋuna adaut ŋikaosok akirwor, inakin bon alotau kon akiirar ŋakiro ŋuna etatami ayoŋ.

¹⁸ Eruwor ŋakiro ŋun ŋuna ikitalakarete iyoŋ erae kiric iyoŋ ikes alotau kon, ikiŋarakinete ikes iyoŋ erae kepatana iyoŋ alimunun ikes.

¹⁹ Kitiya ŋun, ikotere nai iyoŋ ikinyomi Ekapolon, adau ayoŋ akiteyenikin iyoŋ ŋakiro ŋun nakoloŋit na, kire jik eketeyenik ayoŋ iyoŋ.

²⁰ Adau ayoŋ akigir aŋuna kon ŋakiro ŋatomoniuni ŋuna irworosi ŋituŋa, aŋuna ka akitatamya ka ŋuna ka aosou;

²¹ aŋuna ka akitoodikinia iyoŋ ŋuna iyookino ka ŋuna a kire, ikotere nai iyoŋ inyakari ŋakiro ŋuna a kire neni a ituŋanan a ŋini ikiyaki iyoŋ.

Ŋakiro ŋuna erworosi ŋikaosok ikes nu

²² Nyidemanari ŋikulyak ŋiboro kec, anerae ekulyakaka ikes, kori nyiryamu apaki ŋina itoroniyarya a loikiko ituŋanan ŋini emam epite ŋolo eiunor bon.

²³ Ekapolon iŋes emaikina totub ŋakiro a ituŋanan a ŋini emam epite ŋolo eiunor bon; ido elemari Ekapolon akiyar a ŋini ecamit alemar akiyar a ituŋanan a ŋini emam epite ŋolo eiunor bon.

²⁴ Nyicamu aruwor ekone a ituŋanan a ŋini enyunyurana, nyicamu arukit ka ituŋanan idio ŋini eŋoana,

²⁵ acepaki ipedori iyoŋ akisisaun ŋipitesyo keŋ, ido toloma nakiro ŋuna nyepatana iyoŋ akiŋer.

²⁶ Nyiruwor ŋini iianakini akitac ŋidenio a ŋituŋa a ŋuluce, nyiruwor ŋini iwoenakini akitac ŋituŋa ŋuluce ibore ŋini ebookoi ikes totaca.

²⁷ Ani kemam iyoŋ ibore ŋini itaca ibore a ituŋanan, epedoryo alemar ekitaada kon alokwap kon.

²⁸ Nyilemanari ibore ŋini keberakinoi koloŋ akipimia ekukoru ŋolo a ŋalup, ŋini acepaki erae papa kon kiwuakini nen.

²⁹ Ianyunit mono iyoŋ ituŋanan ŋini epiiryana alotic keŋ a? Eruwor ituŋanan ŋini ikoni nen ŋini itiyae neni a ŋirwosi, nyiruwor ituŋanan ŋini ikoni nen ŋini itiyae neni a ŋituŋa car.