Ŋakit. 19 - Ebaibul

¹ Ejok araakau ŋini ijok ŋini irworo ŋuna a kire, akilo araakau ŋini ibaŋaana ŋini irworo alyokonu.

² Nyejok akiitanit ibore tomam bo aosou iyakar, ituŋanan ŋini iburiburi akitiya ŋinibore, eryamuni ŋican.

³ Epedori abaŋao akinyasun ibaŋaanot, nai epedori ibaŋaanot ŋin atemar Ekapolon akacaka.

⁴ Einakini ebari ituŋanan ŋikonei ŋulu alalak, nai imyanakinete ŋikonei ŋikulyak.

⁵ Nyebucanar esuuda ŋolo alyokonon, nyisicana ido nyimyekinio ituŋanan ŋini alyokonon tolot nyisicana.

⁶ Iitanito ŋituŋa ŋulu alalak aryamun ajokis aneni a ŋituŋa a ŋulu erae ŋikapolok, ido erae ŋinituŋanan ekone a ŋini einanakini ŋuluce ŋainakineta.

⁷ Ani kimanito tari ŋiyeneta a ŋikulyak ŋikulyak, etya nai ai epite ŋolo eŋeritotor tari ŋikonei kec ikes!

⁸ Erae aryamun aosou amina akuwan kon a ilope, erae arubakin iyakar ayenut akitiya ŋinibore ejok.

⁹ Nyebucar esuuda ŋolo alyokonon nyisicana, ido etwani ituŋanan ŋini irworo alyokonu.

¹⁰ Nyejok ituŋanan ŋini ebaŋaana iboi erae ŋini eyakar ibore daadaŋ ŋini ecamit iŋes, nyejok nabo jik epito erae ekepukan a ikoku a erwosit.

¹¹ Nyeŋoyenene atipei ituŋanan ŋini eyakar aosou, erae akiyookino a ituŋanan a ŋin ibore ŋini einakini iŋes ajamakin ŋakiro ŋuna itoŋoitere.

¹² Ikoni aŋoit a erwosit neni irurumaa eŋatuny, nai ikoni ajokis keŋ ŋakopi alonya.

¹³ Erae ikoku ŋini ebaŋaana ikenyasunan papa keŋ, ikoni aberu ŋina iburae a ŋinapaki akiru ŋina icipicipi a ŋinapaki.

¹⁴ Erae akai ka ebari ŋiboro ŋulu irumeneneo aneni a ŋikauruunak, nai eryamuni ituŋanan aberu ŋina arimaanan aneni a Ekapolon.

¹⁵ Eauni akalanyo neni a ituŋanan ŋajo ŋuna apotyok, epedori akoro aŋedar ituŋanan ŋini nyitiyae.

¹⁶ Ituŋanan ŋini iwuapit ŋakiciket eyari, ituŋanan ŋini nyemitakini ŋuna ka akiyar keŋ etwani.

¹⁷ Ituŋanan ŋini erimaana aneni a ŋikulyak, einanakini ŋiboro keŋ neni a Ekapolon tari kerae ŋikulyak ijanarete, ido einakinio nabo ituŋanan ŋin eropit ŋolo alalan.

¹⁸ Toramenenee ikoku kon eriŋa edit eyakar apaki ŋina epedorya ayenun ka akiirar ŋakiro, nyiwuak lotau kon atemar ketwana daŋ, nyamisit ayoŋ.

¹⁹ Ituŋanan ŋini eryenyaana ka toŋoana atipei, eryamuni ŋican aŋuna ka aryenyeo ka aŋoanu keŋ, ani kiu iyoŋ ituŋanan ŋin alocan, emaikina toiu nabo.

²⁰ Tocamu ŋakiro ŋuna ajokak ŋuna ikilimokinio ka tocamu ŋakiro ŋuna ajokak ŋuna ikitatamio, ikotere iyoŋ iryamuni aosou ŋina iyarya alorwa a ŋulu alokiŋaren.

²¹ Epedori ituŋanan ayere anatameta keŋ akitiya ŋakiro ŋuna alalak, nai erae ŋuna ecamit Ekapolon ikes bon itiyakin.

²² Ibore ŋini iitana aneni a ituŋanan iŋes amina, ido ejok araakau ikulyakit akilo araakau ikalyokonon.

²³ Erae akitopoloorit Ekapolon akiyar kire jik, ani kileleba neni a ituŋanan akitopoloorit Ekapolon, erae ituŋanan ŋin ŋini eiuna, emam nabo ŋican eryamuni iŋes.

²⁴ Etic a ituŋanan a ŋini ekalanyana akidokinit akan neni eyai akimuj, nyelemununui tari akan a nen kiwuak akimuj nakituk.

²⁵ Emaikina kisicanae ituŋanan ŋini iturono, ikotere nai ŋibaŋaanotin eyenunete ŋuna kitiya. Ani kisicani ŋikaosok, iirarete ka eyenunete ŋace ŋuna ka aosou.

²⁶ Ikoku ŋini eryanyaana neni a papa keŋ, ido kirita toto keŋ alore, erae ikoku ŋini eauni ŋileec ka egurigur.

²⁷ Ikaakoku, ani kiŋer iyoŋ akipup ŋakiro ŋuna ajokak ŋuna ikitatamio, edaun iyoŋ epite ŋolo iyenunia ŋakiro ŋuna ka aosou.

²⁸ Ejamuwarit esuuda ŋolo nyiyookino ŋakiro ŋuna iyookino, ido ebobokinit ŋulu aronok akirworo ŋakiro ŋuna aronok.

²⁹ Itemokinitoe sek akisicanet aŋuna a ŋulu ejamuwarito akiyookino, ido itemokinitoe sek adaset tonom ŋakausinei a ŋibaŋaanotin.