Ŋakit. 18 - Ebaibul

¹ Ituŋanan ŋini nyerukito ka ŋuluce emisit ŋuna keŋ bon a ilope, itoodiunit iŋes atemar eŋerit ŋuna eyenete ŋituŋa ŋuluce atemar iyookino.

² Emam ajokis aneni a ibaŋaanot aryamun ayenut nai ecamit iŋes akitoodiunit atemar eos iŋes.

³ Ani keruwor ituŋanan ŋini erono, eruwor daŋ iŋes ŋini ejamuwarit ŋuluce, ani keruwor ituŋanan ŋini nyitopolooritae, eruwor daŋ iŋes ŋini nyejok.

⁴ Epedorete ŋakiro ŋuna irworo ituŋanan aruwor akisyakinet ŋina ka aosou, ikwaan eitanit ŋolo ka aosou ka ayonae ŋina elelyaata ŋakipi.

⁵ Nyiyookino ariit ka ŋituŋa ŋulu iilit aŋuna ka asecit, kori akitukuruwor ituŋanan ŋini emam aronis itiyat aryamun akiyookino.

⁶ Epedorete ŋakiro a ibaŋaanot ayaun ejie, epedorete ŋakiro a ibaŋaanot ayaun akibuŋao,

⁷ ŋakiro ŋuna irworosi ŋibaŋaanotin, ikes pei inyasunete ŋibaŋaanotin, ŋakiro ŋuna irworosi ŋibaŋaanotin ikes pei ikamunete ŋibaŋaanotin.

⁸ Ŋakiro ŋuna iŋaiŋaatar ŋituŋa irworotor ŋuluce, ebobok ikwaan ka amugati ŋina eyai esukari ebob nooi akiirar ŋakiro ŋun, ido italakarete akuwan.

⁹ Ituŋanan ŋini ejamaana alotic, erae iyenet a ituŋanan a ŋini emunaanari.

¹⁰ Eyai agogoŋu ŋina apolon nooi lokiro ŋolo a Ekapolon, ekerete ŋulu iyookino lokiro a Ekapolon, ido eiuna.

¹¹ Ikwaan ebari aneni a ŋikabarak ka etaun ŋolo egogoŋ aŋuna edukukio ejok, anatameta kec, ikwaan ebari kec ka ŋarwatatain a etaun ŋuna aoyak.

¹² Ani eriŋa ituŋanan nyemunaara, ileleba akituro lotau keŋ, nai akitiditeuna mono emaikina eyakar ituŋanan eriŋa nyitopolooro.

¹³ Ani keboŋoki ituŋanan ŋakiro eriŋa nyiirara ejok. erae ŋin abaŋao keŋ ka erae ŋileec aneni keŋ.

¹⁴ Ituŋanan ŋini nyiyaloloŋi aŋuna edyakar, epedori atitinyikin edeke, nai ani kipyeda bon ituŋanan ŋini edyeka, adau akigeno keŋ ŋina ka aŋaleun adaun.

¹⁵ Epedori ituŋanan ŋini apiiryanan aryamun aosou, ido iwarit ituŋanan ŋini eos akiirar ŋakiro ŋuna ka aosou.

¹⁶ Eŋae ainakinet neni itori ituŋanan ŋini einanakini, ido itodoli ainakinet ituŋanan neni eyai ituŋanan ŋini apolon nooi.

¹⁷ Etakanete ŋakiro ŋuna elimuni ituŋanan ŋini isyauni akisitakin ŋinice esibit iyookino, akitodol ŋina irworikinia ŋini isitakinitae, iŋes nai eyenunere ŋuna a kire.

¹⁸ Erae akilam ŋiboro akitub ŋakiro ŋuna iburaata ŋituŋa, erae epite ŋolo etyakere ŋituŋa ŋulu nyepatana akitub ebura kec.

¹⁹ Kiŋarak ŋiyeneta kon, ikiunete ikes iyoŋ lopite ŋolo eiunia arwatata ŋina agogoŋon ŋituŋa alotaun, nai ani kiburaete iyoŋ ka ikes, ikigolorete ikes iyoŋ anakibois kec.

²⁰ Epwatari ituŋanan anakiro a ŋuna irworo iŋes, imwoni ituŋanan anakiro a ŋuna irworo iŋes.

²¹ Epedorete ŋakiro ŋuna irworo ituŋanan aiun akiyar keŋ kori amunaar akiyar keŋ, aŋun, emaikina ituŋanan tocamu ŋatyokisyo ŋuna epote neni keŋ aŋuna a erwor keŋ.

²² Ituŋanan ŋini eyakar aberu, ayakaunor ibore ŋini ajokan, ido eryamuni ajokis aneni a Ekapolon.

²³ Ani irworosi ŋikulyak, ilipasi akiŋarakino pa eryenyaaka nai ani eboŋonokinete ŋikabarak ikes ŋakiro, eryenyaaka.

²⁴ Nyerubanakini akoneo a ŋikonei a ŋice, nai eminin ŋikonei ŋice akilo tari amina ŋina eyakatar ŋiyeneta.