Ŋakit. 17 - Ebaibul

¹ Ejok akibaŋ akimuj toyakar ca iyoŋ akinapakina anatameta kon, akilo iyoŋ akinumunum ŋasuban toyakar egurigur lokal kon.

² Epedori ipito ŋini itiyae ka aosou apolokin ikoku a ekapolon keŋ ŋini itiyae ŋakiro ŋuna a ŋileec, ido epedori akityak ka ŋidwe a ekapolon keŋ ŋiboro a ekapolon a ŋol.

³ Eliyo esilipa ka egolid anibore a ŋini ipoere ikes alokitet tojokyata, nai Ekapolon iŋes elii ŋitai a ŋituŋa tojokyata.

⁴ Ebobokinit ituŋanan ŋini itiyae aronis akipup ŋakiro ŋuna irworosi ŋituŋa ŋulu aronok, ebobokinit ŋikalyokonok apupokin ejok ŋakiro ŋuna irworosi ŋituŋa ŋulu aronok.

⁵ Ituŋanan ŋini ejamuwarit ŋikulyak, iyanyi Akuj ŋina asubuni ŋikulyak, ituŋanan ŋini elakara eryamunete ŋituŋa ŋican, emaikina kisicanae.

⁶ Elakara nooi ituŋanan erae kiboi kiŋolik ŋipapae keŋ, elakara nooi ŋidwe erae keyakatar ŋikauruunak kec.

⁷ Ani kirwor ituŋanan ŋakiro ŋuna ajokak, mam apei daŋ ŋina ejoikini ŋibaŋaanotin, nyemaikina ŋikapolok irworosi alyokonu.

⁸ Alotuŋa a ŋulu einanakinete ŋakaluŋuluŋui, ikwaan akaluŋuluŋut ka ekitoe ŋolo ekokoyere ŋiboro alotuŋa a ŋuluce, neni daadaŋ elosi ituŋanan ŋini isitiyae akaluŋuluŋut, nyipiyori aryamun ŋuna ecamit.

⁹ Ituŋanan ŋini isyoni ŋinice anakiro a ŋuna abu todyeka, itopoloe ituŋanan ŋin aminanar, nai ituŋanan ŋini erubakini jik isiburae ŋinice elimununui ŋakiro ŋuna alunyar, eauni ituŋanan ŋin, atyaka iŋes ka ŋirukitos keŋ.

¹⁰ Ituŋanan ŋini eyakar ayenut, isirworiuni akirot apei bon ŋina elimokinio iŋes ikotere toesik akitiya aronis, akilo ebaŋ ŋolo idico tari ŋakidicet amiat kiira nai ŋakiro.

¹¹ Ituŋanan ŋini aronon, iwarit a ŋinapaki egurigur, nai iakikinio ituŋanan ŋin ekiyakiya ŋolo nyikisyoni.

¹² Ejok ajiore ka ityaŋ ŋini adedeŋan ŋini ikibenyuni aŋuna edemaritere iŋes ŋitak keŋ, akilo ajiore ka ibaŋaanot aŋuna ka abaŋao keŋ.

¹³ Ani kitiyae ituŋanan aronis neni a ŋulu itiyaete ajokis neni keŋ, nyiyotokini aronis alotuŋa a ituŋanan a ŋin.

¹⁴ Ikoni akisyakin ebura apunor ŋakipi anamatata, aŋun, tojoŋo erwor eriŋa nyiburakina.

¹⁵ Ituŋanan ŋini itojokit ŋulu aronok ka ituŋanan ŋini nyitojokit ŋulu iyookino, erae ŋul daadaŋ ŋisiilyanotin aneni a Ekapolon.

¹⁶ Erae aneni a ibaŋaanot atacar ŋisiliŋa aryamunia aosou akicanican ŋisiliŋa, anerae ebaŋaana iŋes nyeyeni ajokis ŋina ka akisyom.

¹⁷ Eminin ŋikonei ŋinapaki daadaŋ, nai nyo mono akaitotonu erae pa kiŋaranakinoi apaki ŋina a ŋican?

¹⁸ Erae abaŋao akiikin akitac eden ŋolo idenitor ikidunyet kon ituŋanan ice, erae abaŋao awoikin ikidunyet kon aŋuna ke eden keŋ.

¹⁹ Ituŋanan ŋini emina ebura, emina asecit, ituŋanan ŋini ituro a ŋinapaki, erikunit ŋican nakuwan keŋ.

²⁰ Ituŋanan ŋini etami akitiya aronis, nyerubakini itiyae ŋinibore ejok, ituŋanan ŋini irworo amodiyo, elomari locan.

²¹ Ituŋanan ŋini eurit ŋidwe ŋulu itiyaete ŋakiro ŋuna ka abaŋao, eryamuni ŋican, ituŋanan ŋini eurit ŋidwe ŋulu itiyaete ŋakiro ŋuna ka abaŋao, emamukar alelyanu.

²² Erae alakara a etau a ituŋanan ekitoe ŋolo einakinit akuwan keŋ aŋaleu, nai erae aŋoit ibore ŋini ipyedari etau a ituŋanan.

²³ Ecamununui ituŋanan ŋini aronon akaluŋuluŋut anakimunono, ikotere edaun epite ŋolo itiyaere ŋakiro iyookino.

²⁴ Ituŋanan ŋini eyakar ayenut iwarit akitiya ŋakiro alotooma aosou, nai eŋoleŋole ituŋanan ŋini ebaŋaana akitiya aronis aneni daadaŋ eyakaun iŋes.

²⁵ Eaunete ŋidwe ŋulu itiyaete ŋakiro ŋuna ka abaŋao akiyaloloŋ neni a papa kec, ido eaunete aŋoit neni a toto kec.

²⁶ Nyiyookino areikin ituŋanan ŋini nyitiyat aronis akitac ibore ŋini nyelemarit iŋes, kori nyiyookino akibuŋa ekapolon aŋuna itiyaa ŋuna iyookino.

²⁷ Eos ituŋanan ŋini nyirworo car, eyai ayenut neni a ituŋanan a ŋini iapara alotau keŋ.

²⁸ Tari ŋibaŋaanotin ŋulu ililiŋaka, etamakinete ŋituŋa atemar kori eosok, ani pa kelimut ŋibaŋaanotin ŋul ŋakiro ŋadi, etamakinete ŋituŋa atemar kori eyakatar ikes ayenut.