Ŋakit. 15 - Ebaibul

¹ Isililiŋiyari aboŋokinet ŋina iapunitae anyunyura, nai isiwuaŋi akikirikira akirworikin anyunyura.

² Ikiinakinete ŋakiro ŋuna irworosi ŋikaosok ekibure ŋolo ka aryamun aosou, nai irworosi ŋibaŋaanotin ŋakiro ŋuna erae abaŋao.

³ Ite Ekapolon ŋuna itiyao a ŋinakibois a daadaŋ, ite Ekapolon ŋuna itiyao iwon, kerae ŋuna aronok, kori ŋuna ajokak.

⁴ Akirworo ŋakiro irimaana, eauni akiyar, nai akirworo ŋakiro iryenyaana, eauni akitakadakinet lotau.

⁵ Ituŋanan ŋini ebaŋaana, ejamuwari ŋakiro ŋuna itatami papa keŋ iŋes, nai ituŋanan ŋini eesyanakini ŋuna ebookoi toesik eyakar ayenut.

⁶ Ileleba ebari nakais a ŋulu iyookino, nai elemanaryo anapakio a ŋuna a ŋican ibore ŋini eyakatar ŋulu aronok.

⁷ Iiranarete ŋituŋa ŋulu alalak ŋakiro ŋuna ka aosou aneni a ŋikaosok, nai nyiiranaryo ŋun aneni a ŋibaŋaanotin.

⁸ Erae ŋamuronisya a ŋulu aronok asiilyo aneni a Ekapolon, nai elakara Ekapolon aŋuna ka akilip a ituŋanan a ŋini iyookino.

⁹ Erae ŋakiro ŋuna iwuapito ŋulu aronok asiilyo aneni a Ekapolon, nai emina Ekapolon ituŋanan ŋini iwuapit akiyookino.

¹⁰ Eyai akisicanio ŋina apolon nooi neni a ŋini nyiwuapi ŋuna ebookoi kiwuapa, nai ituŋanan ŋini nyecamit alimokino atemar toesik akitiya ŋuna aronok, etwani.

¹¹ Ani kileere aneni a Ekapolon akibois a ŋikatwak ka amunyaro, ikokini nai Ekapolon pa eyeni ŋuna eya lotau a ituŋanan ai?

¹² Nyecamununeete ŋituŋa ŋulu ejamuwarito ŋuluce alimokino atemar eroko ŋuna itiyaete ikes, nyecamunete tari alosit neni a ŋulu aosok.

¹³ Ituŋanan ŋini emaisyani, itoodiunit alakara ŋina eyai lotau keŋ, nai ani kiyaloloŋi ituŋanan, mam alakara eyai lotau keŋ.

¹⁴ Iwarito ŋatameta a ituŋanan a ŋini eyakar ayenut aosou, nai ileleba nakitukwa a ŋibaŋaanotin ŋakiro ŋuna ka abaŋao.

¹⁵ Etyonikinit ŋikulyak akiyar ŋirwa daadaŋ ŋulu ka akiyar kec, nai ŋituŋa ŋulu elakara, elelyanete a ŋinapaki anakiyar kec.

¹⁶ Ejok ayakau ka ibore idio cici kitopoloorite Ekapolon, akilo ayakau ka ebari toyai locan.

¹⁷ Ejok akinyam ŋidyas tolakara, akilo akinyam ŋimoŋin ŋulu atumak ŋulu ikimanere.

¹⁸ Epedorete ŋituŋa ŋulu epatana akiŋo akisiwaŋ erwor, nai epedorete ŋituŋa ŋulu nyepatana akiŋo akisililiŋ ebura.

¹⁹ Eyakatar ŋikalanyanotin ŋatyokisyo aneni daadaŋ eyakasi ikes, nai ani kitiyae ituŋanan ŋuna iyookino, mam ŋatyokisyo epote neni keŋ.

²⁰ Epedori ikoku ŋini aoson ayaun alakara neni a papa keŋ, nai epedorete ŋidwe ŋulu ebaŋaaka ajamuwar ata toto kec.

²¹ Ituŋanan ŋini emam ayenut eyakar ebobokinit iŋes akitiya ŋuna ka abaŋao, nai ituŋanan ŋini eyakar ayenut itiyae ŋuna iyookino.

²² Ani pa kiŋisi ŋituŋa ŋuluce epite ŋolo itiyaere ŋuna ecamitae akitiyakin, nyitiyakin ŋuna ecamitae akitiyakin, nai ani kikilimokis ŋituŋa ŋulu alalak ŋunakitiya, nyikipiyori akitiya ŋun.

²³ Ani keboŋoki ituŋanan ŋakiro ŋuna iŋisitae iŋes erae ŋuna iyookino, eyakaun alelyanu neni a ŋinituŋanan, ejok akirot ŋina ikilimokinio atipei nyelunyara apaki.

²⁴ Ilereete aneni a ŋulu iyookino ŋuna iwuapito ikes erae ŋuna einakinete ikes akiyar, ikotere ikes nyelot nakibois a ŋikatwak.

²⁵ Emunaari Ekapolon ŋakais a ŋulu eturok, nai iturubakini Ekapolon ŋiboro a ŋapuseru eyakasi.

²⁶ Erae asiilyo aneni a Ekapolon ayere akitiya aronis, nai erae alakara aneni a Ekapolon ayere akitiya ajokis.

²⁷ Epedori ituŋanan ŋini erorokana ayaun ŋican lotuŋa a ekal keŋ, nai eyari ituŋanan ŋini nyecamit ŋakaluŋuluŋui.

²⁸ Etamatamaete mono ŋituŋa ŋulu iyookino ŋakiro eriŋa nyeboŋokino, nai eboŋonokinete ŋituŋa ŋulu aronok ŋakiro atipei, ido yaut ŋican.

²⁹ Nyecamuni Ekapolon akiirar akilip a ŋituŋa a ŋulu aronok, nai iiranari Ekapolon akilip a ŋituŋa a ŋulu iyookino.

³⁰ Eyauni akitere ŋuna ajokak alelyanu lotau, ido ikiinakini ekiyan ŋolo ajokan aruwor ŋini emam ŋuna aronok itami.

³¹ Ituŋanan ŋini iiranari ŋakiro ŋuna aronok daadaŋ, ŋuna elimokinatae iŋes atemar toesik, eminakini akiboi aneni a ŋikaosok.

³² Ituŋanan ŋini nyiiranari ŋakiro ŋuna elimonokinio iŋes atemar toesik, ejamuwara bon, nai ituŋanan ŋini eesyanakini ŋakiro ŋuna elimokinio iŋes atemar toesik, eryamuni ayenut.

³³ Akitopoloorit Ekapolon, itatami ituŋanan aruwor ŋini eyakar aosou, ido emaikina mono ituŋanan erae ŋini itiditeuna bon, toryamu nai akitopolooro.