Ŋakit. 14 - Ebaibul

¹ Edukonokini aberu ŋina aoson akai keŋ, nai eutuutoori ŋina ebaŋaana akai keŋ todaun.

² Ituŋanan ŋini elosi erae ŋini iyookino, itopoloorit Ekapolon, nai ituŋanan ŋini nyitiyae ŋuna a kire, ejamuwarit Ekapolon.

³ Ibuŋao ŋibaŋaanotin anakiro a ŋuna irworosi ikes, nai eiunito ŋikaosok ŋakiro ŋuna irworosi ikes.

⁴ Ituŋanan ŋini emamukar ŋimoŋin ŋulukitaet, emam ŋikinyom iwuakini natukit keŋ, eryamuni ituŋanan ŋikinyom ŋulu alalak anakisitiya agogoŋu a ŋimoŋin.

⁵ Nyirworo esuuda ŋolo ikinyoma alyokonu, nai alyokonu bon irworo esuuda ŋolo nyikinyoma.

⁶ Epedori ituŋanan ŋini ejamuwarit ŋuluce akiwarit aosou, ido nyeryamuni, nai epatana aosou abunore neni a ŋini eyakar ayenut.

⁷ Nyirukito ka ŋibaŋaanotin, anerae nyiryamuni iyoŋ aneni kec ŋakiro ŋuna ka aosou.

⁸ Aosou a ŋituŋa a ŋulu eyakatar ayenut, iŋes itoodianakini ikes neni emaikina ikes toloto, nai itooliyori abaŋao ŋibaŋaanotin.

⁹ Ejamuwarito ŋibaŋaanotin ainakinet ŋina ka akiilit aŋuna ka asecit, nai eryamunito ŋulu iyookino alelyanu anajokis a ŋina ka Akuj.

¹⁰ Eyeni ŋolotau ŋuna itoŋoito iŋes, mam ituŋanan emorete ka ŋinice alelyanu ŋina eyai lotau keŋ.

¹¹ Emunaaryo akai a ituŋanan a ŋini aronon, nai erubakini akai a ituŋanan a ŋini iyookino eyai.

¹² Eyai erot ŋolo esibit iyookino aneni a ituŋanan nai neni isalakini erot ŋol, erae natwanare.

¹³ Tari kekyena ituŋanan, imunonit akiyaloloŋ ŋina eyakar, adaun alelyanu bon anituŋanan, elomuni akiyaloloŋ.

¹⁴ Eryamunete ŋituŋa ŋulu nyejokak ŋuna itemokinitoe aŋuna kec, eryamunete ŋituŋa ŋulu ajokak ŋuna itemokinitoe aŋuna a ŋiticisyo kec a ŋulu ajokak.

¹⁵ Enupito ŋibaŋaanotin ŋakiro daadaŋ, nai eyenete ŋituŋa ŋulu eyakatar ayenut ŋakiro ŋuna itiyaete.

¹⁶ Erae ŋikaosok ŋulu ecoito akitiya aronis ŋapakio daadaŋ, nai nyecoito ŋibaŋaanotin akitiya aronis, ionyanakinete atipei akitiya aronis.

¹⁷ Ituŋanan ŋini epatana akiŋo, itiyae ŋakiro alotooma abaŋao, ido eye ituŋanan ŋini aronon ŋiman.

¹⁸ Eruwor abaŋao ibore ŋini eryamunete ŋibaŋaanotin, nai einakinio ŋikaosok aosou.

¹⁹ Eryedikete ŋituŋa ŋulu aronok alokiŋaren ŋulu ajokak, ido eyakaunos ŋituŋa ŋulu aronok lopukei a ŋituŋa a ŋulu iyookino.

²⁰ Nyecamito ŋikidunyet a ŋikulyakanotin ŋikulyakanotin, nai eyakatar ŋikabarak ŋikonei ŋulu alalak.

²¹ Erae ŋikasecak ŋituŋa ŋulu ejamuwarito ŋikidunyet kec, nai erereŋ ŋituŋa ŋulu itoodiunito arimao neni a ŋikulyak.

²² Nyecakanar mono ŋituŋa ŋulu eyeete akitiya aronis a? Nai ŋulu eyeete akitiya ŋuna ajokak, eryamunete amina ka akikinyoma.

²³ Eryamuni ituŋanan ibore ŋini eyarya erae kitiya ka agogoŋu, nai akirworo ka akituk bon tomam ibore itiyakini ikiyai nakulyako.

²⁴ Ebari iŋes eruwor eropit a ŋikaosok, nai abaŋao a ŋibaŋaanotin eruwor ŋina eyenere ŋibaŋaanotin.

²⁵ Eiununui esuuda ŋolo a kire akiyar a ŋituŋa, nai ituŋanan ŋini irworo alyokonu, erae ŋini elukinit ŋuluce.

²⁶ Ani itopoloorit ituŋanan Ekapolon, eryamuni atitinyu ŋina nyiryaŋiryaŋa, ido eryamunete ŋidwe a ituŋanan a ŋin neni eiunotor.

²⁷ Erae akitopoloorit Ekapolon eitanit ŋolo ka akiyar, ikotere nai ituŋanan eŋeri ŋakiro ŋuna eyaunete atwanare.

²⁸ Ŋituŋa ŋulu alalak ikes ituruworete ituŋanan erwosit, nai ani kekudyoko ŋituŋa, nyeruwor ituŋanan erwosit.

²⁹ Ituŋanan ŋini nyeŋoyenene atipei, eyakar ayenut ŋina apolon, nai ituŋanan ŋini eŋoyenene atipei itoodiunit abaŋao.

³⁰ Ani emam ŋakiro isicanito ŋatameta, etumi akuwan, nai ikwaan arakao ka edeke ŋolo emam ekitoe.

³¹ Ituŋanan ŋini ekyenar ŋikulyak, iyanyi ituŋanan ŋin Akuj ŋina abu tosub ŋikulyak, nai ituŋanan ŋini erimaana aneni a ŋikulyak, itopoloorit ituŋanan ŋin Akuj.

³² Elemari ŋulu aronok aronis ŋina itiyaete ikes, nai eryamunito ŋulu iyookino aiuno aŋuna ka akiyookino kec.

³³ Eyai aosou nakiro daadaŋ ŋuna etami ituŋanan ŋini eyakar ayenut, nai mam ŋakiro ŋuna ka aosou ŋuna eyenete ŋibaŋaanotin.

³⁴ Itopoloori nooi akiyookino akwap, nai elemari asecit ajokis aneni a ŋinituŋanan.

³⁵ Ejokyar aneni a erwosit eketiyan ŋolo itiyae ka aosou, nai enyunyurikin erwosit eketiyan ŋolo itiyae ŋuna a ŋileec.