Ŋakit. 12 - Ebaibul

¹ Ituŋanan ŋini emina akiiranar ŋuna ebookoi toesik, emina aosou, nai ebaŋaaka ŋulu eremokino ituŋanan ŋini elimokinit ikes atemar eroko ŋuna itiyaete ikes.

² Eryamununui ituŋanan ŋini ajokan ajokis aneni a Ekapolon, nai etubonokini Ekapolon ŋini eyeununui akitiya aronis.

³ Emam ituŋanan eryamuni aiuna anakitiya aronis, nai erubakinete ŋulu iyookino iboiyete pa iryaŋiryaŋasi.

⁴ Erae aberu ŋina ajokan akituro ka alelyanu aneni alokile keŋ, Erae aberu ŋina eaunit ŋileec, ikwaan ka edeke nolo nyeŋaleununui ŋolo edyaka lokile keŋ.

⁵ Erae ŋakiro ŋuna etamete ŋulu iyookino ŋuna iyookino; erae ŋakiro ŋuna ikilimokinete ŋulu aronok ŋuna nyipedori akikinyom.

⁶ Erae ŋakiro ŋuna irworosi ŋulu aronok ekitoe ŋolo ikiari atipei, nai erae ŋakiro ŋuna irworosi ŋulu iyookino ŋuna elakunete ŋulu itubulitoe.

⁷ Emunyaryo ŋulu aronok aŋuna ka aronis kec, todaun ŋini eruwor iletonit kec jik, nai erubakinete ŋikalya a ŋulu iyookino eyarete jik.

⁸ Ani keos ituŋanan, ipurete ŋituŋa iŋes, nai ani kebaŋaana ituŋanan, ejamuwarete ŋituŋa iŋes.

⁹ Ejok akitiditeuna bon toyakar ca iyoŋ ituŋanan ŋini itiyae a ŋuna kon, akilo iyoŋ akitopolooro bon tomam bo ibore inyami.

¹⁰ Eyenete ŋituŋa ŋulu ajokak ibore ŋini icanasi ŋibaren kec, nai eryenyanikinito ŋituŋa ŋulu aronok ŋibaren kec.

¹¹ Ituŋanan ŋini itiyae ka agogoŋu lomanikor keŋ, eryamuni akimuj ŋina alalan, nai erae abaŋao akicanican apaki aloticisyo a ŋulu emam ibore iryamuni.

¹² Iburit ŋulu aronok ibore ŋini elemunito ŋikasecak, nai erubakinete ŋulu iyookino egogoŋ anakiyookino kec.

¹³ Isupanarete ŋakiro ŋuna aronok ŋituŋa ŋulu aronok, nai eiunun alocan ŋituŋa ŋulu iyookino.

¹⁴ Eryamuni ituŋanan ŋiboro ŋulu ajokak anakiro a ŋuna irworo iŋes, lopite ŋolo itiyaunere a ŋakan ibore ŋini ecamitae aryamun.

¹⁵ Etamete ŋibaŋaanotin atemar iyookino ŋuna iwuapito ikes, nai iiranarete ŋikaosok ŋakiro ŋuna elimokinio atemar toesikisi, kori kitiyata.

¹⁶ Itoodiununeete atipei ŋibaŋaanotin aŋoit kec, nai ililiŋiyanarete ŋikaosok ŋuna itoŋoitere ikes.

¹⁷ Ituŋanan ŋini irworo ŋuna a kire, irworo ŋuna iyookino ŋuna ete iŋes itiyasi, nai esuuda ŋolo alyokonon, irworo ŋuna nyiyookino ŋuna pa ete iŋes itiyasi.

¹⁸ Epatana ŋakiro ŋuna irworoe car akiumiyar ituŋanan lopite ŋolo ikiduŋio ekileŋ, nai ikisirworiunete ŋakiro ŋuna irworosi ŋikaosok.

¹⁹ Erubakinete ŋakiro ŋuna a kire ŋikaru, nai euruwuana apaki ŋina irworore ŋuna ka alyokonu.

²⁰ Eyai amodiyo natameta a ŋulu eyeete akitiya aronis, nai eyai alelyanu neni a ŋulu itiyaete aŋuna a ekisil.

²¹ Emam awana ebuni neni a ŋulu iyookino, nai ileleba ŋican neni a ŋulu aronok.

²² Erae asiilyo aneni ke Ekapolon akirworo alyokonu, nai elakara Ekapolon aŋuna a ŋituŋa a ŋulu itiyaete ŋuna a kire.

²³ Eyakar ituŋanan ŋini eos ŋakiro ŋuna ka aosou lotau keŋ, nai ielunito ŋatameta a ituŋanan a ŋini ebaŋaana ŋakiro keŋ daadaŋ ŋuna ka abaŋao kiŋa.

²⁴ Epedori akitiya ka agogoŋu akituruwor ituŋanan ŋini epolokinit ŋuluce, nai ituruwori akalanyo ituŋanan eketiyan a ŋuluce.

²⁵ Epedori akiyaloloŋ ayaun asiliyorit lotau a ituŋanan, nai epedorete ŋakiro ŋuna ka arimao akisimukekin ituŋanan.

²⁶ Elimonokinete ŋituŋa ŋulu iyookino ŋikonei kec akitiya ŋuna ajokak, nai ikicakari akiwuapit ŋakiro a ŋulu aronok.

²⁷ Nyeminasi ŋikalanyanotin aryamunun ibore ŋini ecamito ikes aryamun. nai eryamununeete ŋulu itiyaete ka agogoŋu ebari ŋolo ajokan.

²⁸ Eyai akiyar nakiwuapit ŋuna ka akiyookino, mam atwanare eyai nakiwuapit ŋuna ka akiyookino.