Ŋakit. 11 - Ebaibul

¹ Erae asiilyo aneni a Ekapolon akisitiya akipimet ŋina emodyanakinere ŋituŋa, nai elakara Ekapolon erae kisitiyae ituŋanan akipimet ŋina nyemodyanakinere ŋituŋa.

² Ani kisyak ituŋanan akituro, esyak iŋes tari amamukau ka ajokis nai eyakar ŋini itiditeuna bon aosou.

³ Iyokiunit ŋulu iyookino akitiya ŋuna a kire, nai emunyari amamukau akitiya ŋuna a kire ŋulu nyikinyomitae.

⁴ Emam ajokis itiyakini ebari neni kon akoloŋit ŋina itwania iyoŋ, nai ikilakuni iyoŋ anatwanare akiyookino.

⁵ Akiyookino a ŋituŋa a ŋulu emam ŋakiro itoroniyaritere, einakini ikes akiboi emam ŋican eryamunito, nai iwarunete ŋulu aronok atwanare kec.

⁶ Eiununui akiyookino ŋituŋa ŋulu iyookino, nai ŋituŋa ŋulu nyikinyomitae, ikamanarete ŋakiro ŋuna eyeununeete ikes akitiya.

⁷ Ani etwakete ŋulu nyiyookino, etwaniyari akigeno kec daŋ, ido eruwor ikoŋinait ibore daadaŋ ŋini sek eitanito ikes aryamun anapedor kec a ŋikulepek.

⁸ Eiunitae ŋulu iyookino nyeryamut ŋican, ido epote ŋican ŋul neni a ŋulu aronok.

⁹ Epedorete ŋituŋa ŋulu nyenupito neni ka Akuj amunaar ŋikidunyet kec anakiro a ŋuna irworosi ikes, nai eiunit aosou ŋulu iyookino.

¹⁰ Ani eryamunito ŋulu iyookino ibore daadaŋ ŋini ecamito, elelyanete ŋituŋa daadaŋ alotaun, ani etwakete ŋulu aronok, eyakaun lotaun ecelet ŋolo ka alelyanu.

¹¹ Kegatakis ŋulu iyookino ŋarereŋisyo lotaun, itopolooryo etaun ŋol, nai emunaaryo etaun aŋuna a ŋakiro a ŋuna irworosi ŋulu aronok.

¹² Ituŋanan ŋini ejamuwarit ŋuluce, erae ibaŋaanot, nai emina ituŋanan ŋini aoson akililiŋiyanar ŋakiro.

¹³ Emina ituŋanan ŋini irworor ŋuluce alimonor ŋakiro ŋuna nyemaikina tolimoroe, nai emina ituŋanan ŋini ikinyoma akililiŋiyanar ŋakiro ŋuna nyemaikina tolimoroe.

¹⁴ Akwap ŋina emam ŋakiro ŋuna emaikina kiwuapae, emunaar, nai ani eyakasi ŋikeŋarakinitok ŋulu alalak, eyai aiuna.

¹⁵ Ani kitac iyoŋ amica a ituŋanan a ŋini egelaana, ilomari iyoŋ locan, nai eyai aiuna neni kon kiŋer iyoŋ akitac amica ŋin.

¹⁶ Eryamuni aberu ŋina erimaana akitopolooro, nai aberu ŋina eremokino ajokis, erae ŋina irumito ŋileec. Ituŋanan ŋini irumito ŋileec, eruwor ŋini a ŋican, nai ituŋanan ŋini eryenyaana, eruwor ŋini ebarit.

¹⁷ Ituŋanan ŋini erimaana, eryamuni ŋuna ajokak nai eaunete ŋiryenyaanotin ŋican nawat kec.

¹⁸ Emam eropit eryamununeete ŋituŋa ŋulu aronok. nai ŋituŋa ŋulu itiyaete ŋuna iyookino, eryamunete eropit ŋolo a kire.

¹⁹ Ituŋanan ŋini nyiryaŋiryaŋa anakiyookino keŋ, eyari, nai ituŋanan ŋini erubakinit jik itiyae aronis, etwani.

²⁰ Erae asiilyo aneni a Ekapolon ayakau ka ŋatameta ŋuna etamete akitiya aronis. nai erae alakara aneni a Ekapolon akitiya ŋuna iyookino.

²¹ Toyenete atemar nyebucarosi ŋulu aronok pa isicanitae, nai elosete ŋulu iyookino pa isicanitae.

²² Ikwaan akibuses a aberu a ŋina emamukar ayenut ka ekaboboot ŋolo itiyaunitae a egolid ŋolo eyai lokume a epege.

²³ Ejokak ŋiboro ŋulu iitanito ŋituŋa ŋulu iyookino, nai igenosi ŋulu aronok aryamun ŋiboro ananyunyura.

²⁴ Einanakinete ŋituŋa ŋice ŋiboro kec neni a ŋuluce pa etacitae, ido iatakin nabo ŋice neni kec tobara nooi; ewounitotor ŋice ŋiboro kec ainakin ŋuluce, ido eruwonor ŋituŋa ŋul ŋikulyakanotin.

²⁵ Itabaryo nooi ituŋanan ŋini einanakini ŋuluce ibore ŋini eyakar iŋes, iŋes ŋini iŋaranakini ŋuluce a ibore a ŋini eyakar, iŋarakinio.

²⁶ Icenete ŋituŋa ituŋanan ŋini iŋadae ŋikinyom akitodol ŋina iatakinotor ŋisiliŋa ŋulu egyelere, nai egatakinete ŋarereŋisyo neni a ŋini egyelanari tari pa kiyatakina ŋisiliŋa.

²⁷ Ituŋanan ŋini elelakinit akiwarit ajokis, eryamuni ajokis, nai ebuni aronis neni a ituŋanan a ŋini iwarit aronis.

²⁸ Ituŋanan ŋini ikinyomit ebari keŋ, epuripuryaar ebari ŋol, nai ileereunete ŋulu iyookino erae ŋulu ebarito nooi.

²⁹ Ituŋanan ŋini eaununui ŋican lotuŋa a ekal keŋ, edaun ibore eruwor ŋini keŋ ekaku, ido eruwor ŋibaŋaanotin ŋiketiyak a ŋikaosok.

³⁰ Eauni akiyookino akiyar, nai elemari aryenyeo akiyar.

³¹ Einanakinio ŋulu iyookino eropit kec a ne alokwap, aŋun, ipedori iyoŋ ayenun kire jik atemar isicanio ŋulu aronok ka ŋikasecak.