Ŋakit. 10 - Ebaibul

Ŋakiro a Solomon ŋuna ka aosou

¹ Erae nu ŋakitadapeta a Solomon: Eauni ikoku ŋini aoson alakara neni a papa keŋ, nai eauni ikoku ŋini ebaŋaana akiyaloloŋ neni a toto keŋ.

² Emam ibore ŋini eryamuni ituŋanan alobari a ŋolo eryamununuyo anakitiya aronis, nai ikiuni iyoŋ anatwanare, akiyookino.

³ Nyimianakini Ekapolon ŋulu iyookino elosete enyamit akoro, nai iuryari iŋes ŋulu aronok nyeryamut ibore ŋini iitanito.

⁴ Ikiteryamunete ŋakan ŋuna ekalanyaka akulyako, nai ikiteryamunete ŋakan ŋuna itiyaka ebari.

⁵ Ituŋanan ŋini ecuni ŋikinyom nakamu, erae ŋini eos, nai ituŋanan ŋini eperi ŋirwa ŋulu elemere, eauni ŋileec.

⁶ Erae ŋarereŋisyo ŋuna a ŋulu iyookino, nai iwuaito ŋulu aronok ŋakiro ŋuna ka aryenyeo anakituka kec.

⁷ Atamunit ŋituŋa ŋulu iyookino, erae arereŋu, nai epuripuryaar ŋirorwa a ŋulu aronok.

⁸ Ecamununuyete ŋituŋa ŋulu eosok akiwuap ŋakiciketa, nai emunaar ebaŋaanot ŋolo ecela car.

⁹ Eyari ituŋanan ŋini iyookino erae ŋini eiuna, nai ituŋanan ŋini itiyae ŋuna nyiyookino, eripunio.

¹⁰ Ituŋanan ŋini eedi ŋakonyen, eaununui ŋican, nai iŋes ŋini ikilimokini atemar toesik akitiya ŋuna aronok, eaununui ekisil.

¹¹ Erae ŋakiro a ituŋanan a ŋini iyookino eitanit ŋolo ka akiyar, nai erae ŋakiro a ituŋanan a ŋini aronon akisyakinet ŋina ka akimunonit ŋakiro ŋuna ka aryenyeo.

¹² Iasete ŋiman ŋican, nai erapuwarit amina ŋasecisya daadaŋ.

¹³ Irworo ituŋanan ŋini eyakar ayenut ŋakiro ŋuna ka aosou, nai emetae a ebela ŋulu ebaŋaaka.

¹⁴ Eryamununeete ŋikaosok aosou daadaŋ ŋina ecamito ikes, nai itaapununui erwor a ŋibaŋaanotin ŋican diyete.

¹⁵ Eiunit ebari ŋikabarak, emunyanari akulyako ŋikulyak.

¹⁶ Erae akitiya ŋuna ajokak eropit ŋolo ka akiyar, nai ibore ŋini eryamununeete ŋulu aronok anakitiya aronis, eauni akisicanio neni kec.

¹⁷ Ituŋanan daadaŋ ŋini eesikini ŋuna alimokin iŋes atemar toesik, eyai lorot ŋolo ka akiyar, nai iŋes ŋini nyeesikini ŋuna alimokin atemar toesik, eoliyori alorot a ŋolo ka akiyar.

¹⁸ Ituŋanan ŋini imunonit ŋuna ikimanitor, irworo alyokonu, ituŋanan ŋini irworor ŋuluce, erae ibaŋaanot.

¹⁹ Ani kirwor iyoŋ ŋakiro ŋuna alalak, epatana iyoŋ akisec, nai ani erae kios iyoŋ, emaikina kililiŋ cek.

²⁰ Ikwaan ŋakiro a ituŋanan a ŋini ajokan ka esilipa ŋolo ajokan, erae ŋatameta a ituŋanan a ŋini aronon ŋakoŋinae.

²¹ Eryamunete ŋituŋa ŋulu alalak akiyar ŋina ajokan anakiro a ituŋanan a ŋini aoson, nai etwakete ŋibaŋaanotin aŋuna ebaŋaaketa.

²² Erae akiterereŋiet ŋina ke Ekapolon itabari ituŋanan, emam akiyaloloŋ iatakini Ekapolon narereŋu ŋin.

²³ Elakara nooi ebaŋaanot anakiro a ŋuna aronok a ŋuna itiyae iŋes, nai elakara ituŋanan ŋini eyakar ayenut aŋuna ka aosou.

²⁴ Ebuni neni a ŋulu aronok ibore ŋini ekerito ikes, nai einakinio ŋulu iyookino ibore ŋini iitanito ikes.

²⁵ Ani ŋinibore eponianata ŋatyokisyo, edaunun ŋulu aronok, nai eiuna a ŋinapaki ŋituŋa ŋulu iyookino.

²⁶ Lopite ŋolo elyokio ibore ŋinibabar ŋikyal ka emunaarya apuru ŋakonyen, ikote nenipei ŋikalanyanotin aneni a ituŋanan a ŋini einakinit ikes etic.

²⁷ Kitopoloorite Ekapolon, ido itooyaryo ŋirwa ŋulu ka akiyar kon, nai euruwuakunete ŋirwa ŋulu ka akiyar a ituŋanan a ŋini aronon.

²⁸ Eai akigeno ituŋanan ŋini ajokan nalelyanu, nai eruwor akiitanit a ituŋanan a ŋini aronon akoŋinait.

²⁹ Erae agogoŋu aneni a ŋulu iyookino akiwuapit ŋuna a Ekapolon, nai erae amunyaro ŋina a ŋulu itiyaete ŋuna aronok.

³⁰ Eyakaunotor ŋituŋa ŋulu iyookino aiuna a ŋinapaki, nai nyerubakinete ŋulu aronok iboiyete ekaoyan anakwap.

³¹ Irworosi ŋituŋa ŋulu iyookino ŋakiro ŋuna ka aosou, nai elemaryo ŋulu irworosi alyokonu tojoŋoto akirworo alyokonu.

³² Irworosi ŋituŋa ŋulu iyookino ŋakiro ŋuna ecamunito ŋituŋa akiirar, nai irworosi ŋituŋa ŋulu aronok ŋakiro ŋuna itoŋoyete ŋituŋa iirarete.