Ŋakit. 1 - Ebaibul

¹ Ŋakitadapeta a Solomon alokoku a Daudi; arae Solomon erwosit a Isirael.

Ageunet

² Erae nu ŋakitadapeta ŋuna iŋarakinete ŋituŋa ayenun aosou ka ŋakitatameta ŋuna ajokak ka ayenunia ŋakiro ŋuna irworitae ŋuna epol nooi apolou kec.

³ Itatamete ŋakitadapeta nu ituŋanan akiboi erae ŋini aoson ka erae ŋini irworo ŋuna a kire, ŋini iyookino ka ŋini nyeroko ŋuna itiyae daadaŋ.

⁴ Itatamete ituŋanan ŋini sek ebaŋaana toruwor ŋini ejokak ŋipitesyo; itatamete ŋisorok toruwor ŋulu eosok ka ŋulu ejokak ŋipitesyo.

⁵ Emaikina ŋikaosok daŋ kiirasi ŋakiro nu, ido kiyatakis neni a ŋuna isisaete ikes, emaikina ŋulu epatana ayenun ŋuna ajokak ka ŋuna aronok toryamut anakiro a nu apiiryanut,

⁶ ikotere eyenunete ŋakitadapeta ŋuna nyepatana ayenun ka ŋakiro ŋuna irworosi ŋikaosok ka ŋuna eteduniyete ŋikaosok.

⁷ Erae akitopoloorit Ekapolon akisyakinet ŋina ka aosou; nai ejamuwarito ŋibaŋaanotin aosou ka ŋipitesyo ŋulu ajokak ŋulu itatamyo ikes.

Acoikinit arukit ka ŋulu aronok

⁸ Ikaakoku, kiira ŋakiro ŋuna ikitatami papa kon iyoŋ, nyiŋer ŋakiro ŋuna ikitatami toto kon iyoŋ,

⁹ anerae ejokak ŋakiro ŋun aŋuna kon, ikwaan ka akopiya ŋina ikimukunit iyoŋ, kori ibore ŋini inapit iyoŋ alodokole ŋini ikisibusit iyoŋ.

¹⁰ Ikaakoku, anikikicocoiyasi iyoŋ ŋikasecak, nyicamu ŋakiro kec.

¹¹ Ani ketemasi ikes ebe, “Bua orukosi ka isua, bua odaputu ituŋanan idio oara; bua odaputu ituŋanan idio oara tari kemam ibore esecit.

¹² Bua etoŋopiyasi ikes eyarete ikwa ŋulu eŋopiyanarete nakibois a ŋikatwak, etoŋopiyasi ikes daadaŋ kikwaanikin ka ŋulu anuki kwap.

¹³ Ikiryamuni iwon ŋiboro daadaŋ ŋulu epol egyelit; ilelebikinio iwon nakais yok ŋiboro ŋulu edemununuyo ŋituŋa.

¹⁴ Kilamilam, ido bu oruko ka isua; idyasyo iwon daadaŋ ŋiboro yok iwapei omora a nen.”

¹⁵ Ikaakoku nyicamu akitiya ŋuna itiyaete ikes, nyimyaanakini ŋirotin ŋulu itorito ikes,

¹⁶ anerae eloseneneete ikes akitiya ŋuna aronok, etenito ikes a ŋinapaki akiar ituŋanan.

¹⁷ Eruwor akoŋinait alosikinet a ituŋaŋan erae kelokaki iŋes atibait iteete ŋikyeny ŋulu ecamit iŋes akisurum.

¹⁸ Edapasi ŋikasecak aara make; edapasi ikes alemanar akiyar kec a ŋikulepek.

¹⁹ Erae ŋol epite ŋolo esaluniata daadaŋ ŋulu eyakatar ekibure ŋolo ka akidem ŋuluce ŋiboro kec; elemari ekibure ŋol akiyar a ŋulu eryamunete ekibure ŋolo ikoni nen.

Anyaritoi ŋina ka aosou

²⁰ Topupokisi! Enyara aosou alorotin a ŋulu a etaun; iworoonor aosou analapatui a ŋuna a etaun.

²¹ Iworoonor aosou alokoonae a ŋulu ileleba ŋituŋa Irworo aosou alopukei a ŋulu a etaun ebala,

²² “Okoe apaki ŋina etya ai iayete iyes ŋibaŋaanotin irae ŋibaŋaanotin? Apaki ŋina etya ai iayete iyes ŋulu ijamuwarito ŋuluce ilakara anajamuwarit ŋuluce? Apaki ŋina etya ai iayete iyes ŋibaŋaanotin iŋerito aosou?

²³ Tocamutu akimyekin ŋuna abala ayoŋ iyes kimyekisi; akabukokini ayoŋ iyes ŋatameta kaŋ; eketuruwori ayoŋ iyes ŋulu iyenunete ŋakiro kaŋ.

²⁴ Akanyarit ayoŋ iyes ŋinapei aponare neni kaŋ, nai nyicamito iyes aponare, abu ayoŋ ekesican iyes, nai nyimyekina iyes akitiya aronis,

²⁵ aŋuna iwouniata iyes akimyekin ŋakiro ŋuna abala ayoŋ iyes kimyekis ka aŋuna iŋeryoto iyes ŋakiro kaŋ daadaŋ,

²⁶ ayoŋ daŋ, akyeni epote ŋican neni kus. eketekini ayoŋ iyes irae ŋikoŋinae apaki ŋina ebunio ekabule neni kus.

²⁷ Ani epote ŋican ŋulu alalak neni kus, ido toryamut iyes akisicanio ŋina aryenyaanan; ani kepotu neni kus aŋoit ka aryeba,

²⁸ apaki nai ŋin inyaraata iyes aosou ikiŋarak iyes, nai nyikiŋarakini aosou iyes apaki ŋin, apaki ŋin, iwarete iyes aosou ilelakinito, nai nyiryamunete.

²⁹ Erae ŋun anerae nyecamito ikes aosou ka apotu ikes nyeseut anakiyar kec akitopoloor Ekapolon.

³⁰ Aŋuna aponiata ikes toŋero ŋuna abala ayoŋ ikes kiwiuapa, ido tojamuwasi epite daadaŋ ŋolo abunio ayoŋ etoŋoya ikes,

³¹ ikisicanio iyes anakiro a ŋuna itiyaete iyes, ikitedyakakinete iyes ŋakiro ŋuna itiyaete iyes,

³² anerae etwakete ŋibaŋaanotin aŋuna ka abaŋao kec. Emunyanarete ŋimasimas ŋituŋa ŋulu nyeyenete epite ŋolo iuryarotor make.

³³ Nai ikes ŋulu ekeirarete ayoŋ, eruwor ŋulu eiuna; iboiyete eiuna emam ibore einakinit ikes akuryanu.”