Neem. 9 - Ebaibul

Akiki a ŋituŋa a akwap a Isirael

¹ Ŋirwa ke elap ŋatomoniarei ka ŋiomwon a elap a ŋolo a ŋikanikaarei tocunakin Ŋisirael iwapei iredakinito akiron ka enapito ŋiguniyae ka eya ŋalup nakyes kec.

² Tosodo Ŋisirael totyakaros aneni a ŋituŋa a ŋulugelae a daadaŋ, tolimosi ŋasecisya kec ka aronis atapapaa kec.

³ Towua ikes anakiboisyo kec, ido yaasi ŋisaae ŋiuni esyomete ŋakiro alokitaabo a ŋolo a ŋikisila a Ekapolon a Akuj kec, tosodo nabo alotooma ŋisaae ŋiuni tolimonosi ŋasecisya kec ka kilipa neni ke Ekapolon a Akuj kec.

⁴ Apotu nai Yesua, Bani, Kadimel, Sebania, Buni, Serebia, Bani ka Kenani towua anadoketa a ŋilepi kiworout a ŋitoilon a ŋulu apolok neni ke Ekapolon Akuj kec.

⁵ Kirworikis nai ŋilepi Yesua, Kadimel, Bani, Asabineia, Serabia, Odia, Sebania ka Pesaia temasi, “Tonyoutu, kipuro Ekapolon Akuj kus ŋikaru ka ŋikaru. Kipuroe ekiro kon ŋolo itopolooritae, ŋolo itopolooritae alokidiama akilo akitopoloorit daadaŋ ka akipuro daadaŋ.”

⁶ Tolimu nai Esira tema, “Iyoŋ bon irae Ekapolon, iyoŋ isubuni kidiama, iyoŋ isubuni nakuj ka ŋasuban daadaŋ ŋulu eya kidiama, iyoŋ isubuni akwap ka ŋiboro daadaŋ ŋulu eyakasi nakwap, ŋanamyo ka ŋisubuna daadaŋ ŋulu eya tooma kec. Iyoŋ iinakini akiyar neni kec a daadaŋ, ido ilipete neni kon ŋisubuna ŋulu eya kidiama.

⁷ Irae iyoŋ Ekapolon, Akuj ŋina iseuni Aburaam, yau iŋes anakwap a Ur anakwap a Ŋibabiloniyae, tolimok iŋes ekiro Aburaam.

⁸ Ibu iyoŋ toryamu etau keŋ ikinyoma alokiŋaren kon, ibu iyoŋ tocamunos ka iŋes ainakin neni a ŋiletok keŋ, akwap a Ŋikanaani, a Ŋiitaiti, a Ŋiamori, a Ŋiperisi, a Ŋiebusi ka a Ŋigarigasi, ido idau iyoŋ akisiyookin akiikinet kon, anerae iyookino iyoŋ.

⁹ “Ibu iyoŋ kiŋolik ŋican atapapaa kosi alo Ijipit ka ibu kiira akigworo kec ananam a ŋina Areŋan.

¹⁰ Ibu iyoŋ kitiya ŋakitoodyanakineta ka ŋaumonokineta akisicania Parao ka ŋiketiyak keŋ daadaŋ ta ŋituŋa daadaŋ ŋulu a akwap keŋ, anerae iyeni iyoŋ atemar apotu ikes kiyata erono neni atapapaa kosi. Ibu iyoŋ kituruun bon a arwonu a ŋina arubaki tari nakoloŋit na.

¹¹ Ibu iyoŋ totyak ŋakipi a anam alokiŋaren kec, ikotere edokyata ikes anam eonit, nai ibu iyoŋ kimasak ŋulu ewupito ikes tooma nakipi, todoiyosi ikes esibit ŋamoru tooma nakipi ŋuna alalak.

¹² Ibu daŋ iyoŋ kiŋarenik ikes naparan isibit adis ka nakwaare isibit arira, itoodikinit ikes neni kitoro.

¹³ Ibu daŋ iyoŋ totiyaun kidiama emoru Sinai, kirwor neni kec alokidiama, ido iinaki ikes ŋakiro ŋuna iyookino, ŋikisila ŋulu a kire, ŋakiro ŋuna itubunit iyoŋ ŋuna ajokak ka ŋakiciketa,

¹⁴ ibu kiteyenik ikes Sabato kon ŋina asegan, ido iinak ikes ŋakiciketa, ŋakiro ŋuna etubunitoe ka ŋikisila aneni a eketiyan kon Moses.

¹⁵ Ani enyami akoro ikes, ibu iyoŋ inak ikes ŋamugati ŋuna anakuj ka ani enyami ikes akure ibu iyoŋ inak ikes ŋakipi anataaba, ido ibu itolimok ikes atemar tolomasi kituruwosi akwap ŋina kus, akwap ŋina ibu iyoŋ kikoŋ ainakin ikes.

¹⁶ “Nai apotu atapapaa kosi kiturokinos, tosodo kitogogo ŋakyes kec ka nyiwuap ŋakiciketa kon;

¹⁷ apotu ikes toŋero akiwuap ŋakiro kon, nyemitakis ŋaumonokineta ŋuna itiyat iyoŋ alokidiŋ kec, nai apotu ikes kitogogoŋo ŋakyes kec, kiitana aboŋor napitoonut kec alo Ijipit. Nai irae iyoŋ Akuj ŋina itenit akisyon, Akuj ŋina ejok ka isyoniono, ŋina nyeŋoi atipei ka ŋina elal amina, ŋina nyiryaŋiryaŋa, ido ibu iyoŋ nyiŋer ikes.

¹⁸ Tari apaki ŋina etiyauniata ikes a egolid etorube a itaok aŋuna kec temasi, ‘Erae na akuj kus ŋina ikitipeunio iyes anakwap a Ijipit;’ ido apotu ikes ikiyanya iyoŋ nooi,

¹⁹ ibu iyoŋ anakisyon kon a ŋina apolon nyimyek ikes analoŋisat, abu adis ŋina eŋarenikinit ikes alorot naparan nyimyek ikes, tari arira ŋina eŋarenikinit ikes nakwaare alorot, abu nyimyek ikes.

²⁰ Ibu iyoŋ inak ikes etau kon ŋolo ajokan akitatam ikes, nyelemara iyoŋ Manna kon anakituka kec ka ibu iinak ikes ŋakipi aŋuna ka akure.

²¹ Ibu iyoŋ kiteyar ikes analoŋisat ŋikaru ŋatomoniomwon, ikotere nyicanakin idiobore; nyenyamuna ŋilowi kec ka nyebuuno ŋakejen kec.

²² Tosodi ibu iyoŋ inak ikes areun ŋapukasinei ka ŋituŋa a ŋakwapin ka ibu tokorak ikes akwap ŋin daadaŋ. Apotu ikes kikamasi akwap a erwosit Sikon a ŋolo a Esibon ka akwap a Og a erwosit a Basan.

²³ Ibu iyoŋ kitipitu ŋiletok kec, tolalata ikwa ŋikacer ka ibu iyau ikes nakwap ŋina ilimokinit iyoŋ atapapaa kec alomar ka akituruwor ŋina kec.

²⁴ Aŋun, apotu ŋiletok kec tolomasi nakwap ŋin kituruwosi ŋina kec, ido ibu iyoŋ kilou alokiŋaren kec ŋituŋa ŋulu eboiyete anakwap a ŋin ikes Ŋikanaani, ibu iyoŋ ikiwuak Ŋikanaani napedor kec kaapei ka ŋirwosi ta ŋituŋa ka akwap a ŋin, ikotere itiyaete Ŋikanaani neni a Ŋisirael ŋuna italakarito Ŋisirael.

²⁵ Apotu Ŋisirael kikamanasi ŋitaunio ŋulu adukitoe ŋaduketa ŋunajiet, kikamasi akwap ŋina ajokan a ŋalup, kituruwosi ŋakais ŋuna elelebitae ŋiboro ŋulu ajokak daadaŋ ŋuna kec, ŋakare, ŋimanikorin ŋulu a ŋikito a epiini, ŋulu a ŋikito ka Olipa ka ŋulu a ŋikito a ŋaraito ŋulu alalak; aŋun apotu ikes kimuja kimwoko ka totuma, tolelyana aŋuna ka ajokis kon a ŋina apolon.

²⁶ “Kikote neni daŋ, apotu ikes nyiwuapa ŋakiro kon ka apotu itoŋero iyoŋ tojamuwasi ŋikisila kon ka toara ŋikadwarak kon ŋulu apotu tolimokis ikes akimyekin ŋuna aronok ŋuna etiyaete ikes ikotere eboŋunete neni kon, apotu daŋ ikes ikiyanya iyoŋ nooi.

²⁷ Aŋun, ibu iyoŋ kipotok ikes napedor a ŋimoe kec, ŋulu apotu kiteryamut ikes ŋican. Tosodi anapaki a ŋina ayakatar ikes locan, apotu ikes ikigworokis iyoŋ ka ibu iyoŋ kiira akigworo kec anakuj, alotooma akisyon kon ŋina apolon, ibu iyoŋ inak ikes ŋikaiunak ŋulu apotu toiut ikes anapedor a ŋimoe kec.

²⁸ Nai, ani kedaut ikes akieŋar, apotu nabo kitiyata ŋuna aronok alokiŋaren kon, tosodi ibu iyoŋ kipotok ikes napedor a ŋimoe kec, ido apotu ŋimoe kec kipukata ikes, kikote neni daŋ, ani eboŋunete ikes akigworokin iyoŋ, ibu iyoŋ kiira anakuj ka ibu iyoŋ toiu ikes ŋarwa ŋuna alalak alotooma akisyon kon.

²⁹ Ibu iyoŋ tolimok ikes akimyekin akitiya ŋuna aronok, ikotere toboŋut ikes akiwuap ŋikisila kon, nai apotu ikes kiturokinos toŋero ŋakiciketa kon, toŋero akiwuap ŋuna itubunit iyoŋ ŋuna ani kiwuap ituŋanan eyari. Apotu ikes kisyaaketa, kitogogoŋo ŋakyes kec towout jik akiwuap ŋakiro kon.

³⁰ Alotooma ŋikaru ŋulu alalak, ibu iyoŋ kidaŋidaŋ ŋakiro kec. Alotooma etau kon, ibu iyoŋ tolimonok ikes aneni a ŋikadwarak akimyekin akitiya ŋuna aronok, nai apotu nyecamut akiirar ŋakiro kon. Aŋun, ibu iyoŋ kipotok ikes napedor a ŋituŋa a ŋakwapin.

³¹ Kikote neni daŋ, alotooma akisyon kon ŋina apolon, ibu iyoŋ nyimyek ikes emunyaryo jik, kori nyimyekina iyoŋ ikes, anerae irae iyoŋ Akuj ŋina ijok ka ŋina isyoniono.

³² “Aŋun nai, Akuj kosi, Akuj ŋina ka apedor, ŋina etiron ka ŋina ikitubuli, ŋina iricit acamunet ka amina ŋina nyiryaŋiryaŋa, nyijamak ŋatyokisyo ŋuna apotu neni kosi, neni a ŋirwosi kosi, neni a ŋikepukak kosi, neni a ŋisacaradotin kosi, neni a ŋikadwarak kosi ka neni atapapaa kosi, neni a ŋituŋa kon a daadaŋ ameun anapaki a ŋina a ŋirwosi a ŋulu ka Asiriya akitodol nakoloŋit na.

³³ Iyookino iyoŋ anakiro a daadaŋ a ŋuna apotu neni kosi, anerae itiya iyoŋ ikinyoma, nai etiyae isua erono,

³⁴ nyiwuapa ŋirwosi kosi, ŋikepukak kosi, ŋisacaradotin kosi ka atapapaa kosi ŋikisila kon, nyiwuapa ikes tari ŋakiciketa kon ka ŋakiro ŋuna ilimokinit iyoŋ ikes akimyekin akitiya.

³⁵ Tari anapukan kec ka anajokis a ŋina apolon a ŋina ibu iyoŋ kitiya neni kec ka anakwap a ŋina alalan a ŋina ajokan a ŋalup a ŋina ibu iyoŋ inak ikes, nyitiyanakina ikes iyoŋ ka nyimyekina ikes akitiya aronis.

³⁶ Ikirae isua a ne ŋipi tari nakoloŋit na, ikirae isua ŋipi anakwap a ŋina ibu iyoŋ inak atapapaa kosi, ikotere enyamete ŋaraito ka ibore ŋini ajokan daadaŋ.

³⁷ Ŋirwosi ŋulu iwuak iyoŋ akipuka isua aŋuna a ŋasecisya kosi, ikes enyamete ŋaraito a akwap a na ŋuna alalak, ikipukato ikes isua ka isitiyaete ŋibaren ikwa ŋina ecamitotor, ido ikiya isua locan.”

Ŋulu apotu tocamut kigirae ŋirorwa kec nakipucakinet acamunet

³⁸ Aŋuna a ŋakiro a ŋun a daadaŋ, ikicamuni isua ka igiryo acamunet, ido igiryo nakipucakinet ŋirorwa a ŋikepukak kosi, a ŋilepi ka a ŋisacaradotin.