Neem. 5 - Ebaibul

Kiŋarak Neemia ŋulu a ŋican

¹ Apotu ŋikilyok kaapei ka ŋaberu kec kikalout nooi itoroniarito Ŋiburaniyae ŋulu arae ŋiyeneta kec.

² Aya ŋulu abasi, “Ikilalak isua ka ŋidwe kosi, ŋulusapa ka ŋulupesur, emaikina isua oryamutu ŋikinyom, ikotere isua ikimuji oyara.”

³ Aya ŋice ŋulu abasi, “Emaikina isua kiikinae akipotor ŋimanikorin kosi ŋulu a ŋikinyom, ŋulu a epiini ka ŋakais kosi aŋuna ka aryamunia ŋikinyom apaki na ŋina ka eron.”

⁴ Tosodi aya ŋice ŋulu abasi, “Idenunuyo isua ŋisiliŋa aŋuna a ŋimanikorin totacere ocur neni a erwosit aŋuna a ŋimanikorin kosi a ŋulu a ŋikinyom ka a ŋulu a epiini.

⁵ Ikirae isua ŋituŋa ŋipei ka ŋiyeneta kosi ka ejokak ŋidwe kosi aneni kosi lopite ŋolo ejokyata ŋidwe kec aneni kec, nai kitiŋakinitetei bo isua ŋidwe kosi ŋulusapa ka ŋulupesur aruwor ŋipi ka ŋapi, adaun akituruwor ŋidwe kosi ŋice ŋulupesur ŋapi, adaun isua apedor ka aruworosi ŋimanikorin kosi ŋulu a ŋikinyom ka ŋulu ke epiini ŋulu a ŋituŋa a ŋice.”

⁶ Abu ayoŋ oŋo nooi eirari akigworo kec ka akiŋuruŋura ŋin.

⁷ Kadau ayoŋ atamatam ŋakiro ŋun, abu ayoŋ esitak ŋikapolok ka ŋikepukak a ŋituŋa olimok ikes otema, “Iyatanakinete iyes ŋisiliŋa ŋice losiliŋa ŋulu idenionokinete ŋituŋa kus pei.” Abu nai ayoŋ onyarau atukot ŋina alalan toanyu epite ŋolo esubakinere ŋakiro kec,

⁸ abu ayoŋ olimok ikes otema, “Alopite a ŋolo ikipedorya isua, ikidau isua agyelun ŋiyeneta yok ŋulu erae Ŋiburaniyae ŋulu keponi togyelarae nakwapin ŋace, nai tokona igyelanarete iyes ŋiyeneta kus pei, ikotere ikitegyelakinio nabo isua.” Apotu ikes daadaŋ kililiŋa, todaun ŋakiro ŋuna elimunete.

⁹ Aŋun, abu ayoŋ otema, “Nyejokak ŋakiro ŋuna itiyaete iyes. Nyemaikina mono iyes itopoloorito Akuj yok, ikotere kiretakis ajamuwaro nyebu neni yok aneni a ŋituŋa a ŋakwapin a ŋulu erae ŋimoe yok a?

¹⁰ Nabo daŋ idenionokinio isua ŋituŋa ŋikinyom ka ŋisiliŋa, ayoŋ ka ŋikaitotoi kaŋ ta ŋiketiyak kaŋ. Kimyekisi ŋakiro ŋuna ka akiyatanakin ŋisiliŋa ŋice losiliŋa ŋulu idenionokinete iyes ŋuluce.

¹¹ Kinyakakisi ikes akoloŋit napei na ŋimanikorin kec ŋulu a ŋikinyom, ŋulu ke epiini, ŋulu a ŋikito ka Olipa ka ŋakais kec; kinyakakisi ikes ibore ŋini ipotu iyes kiyatakis kerae ŋisiliŋa, ŋikinyom, epiini, akimyet, ŋiboro ŋulu ipotu iyes kijaununut aneni kec.”

¹² Temasi nai ikes, “Inyakakinio isua ibore daadaŋ ka nyikiitani nabo isua idiobore aneni kec. Ikitiyae isua lopite ŋolo ilimunio iyoŋ.” Tosodi, abu ayoŋ onyarau ŋisacaradotin, esikoŋ ŋikapolok ka ŋikepukak kitiyata lopite ŋolo adauniata ikes akiikin.

¹³ Abu daŋ ayoŋ elakilakaa abilet a elou kaŋ otema, “Elipi ayoŋ kilakilakaa Akuj ŋinituŋanan alokai keŋ ka alotic keŋ ŋini nyiwuapi akiikinet na. Elipi kilakilakaarae iŋes lopite ŋol, kimyekinae ikes emam ibore eyakatar.” Tolimu atukot daadaŋ tema, “Amen”, ido kipuro Ekapolon. Apotu ŋituŋa kitiyata lopite ŋolo eikinitotor.

Arimao a Neemia

¹⁴ Ameun anapaki a ŋina akaseunere ayoŋ aruwor ekepukan a Yudaya, ameun alokaru a ŋolo a ŋatomoniarei akitodol ekaru ŋolo a ŋatomoniuni ka ŋiarei ipukat Aritaseses ŋikaru ŋitomon ka ŋiarei, nyenyama ayoŋ, kori ŋikaitotoi kaŋ akimuj ŋina alemunit erwosit aŋuna kaŋ a ekepukan.

¹⁵ Ŋikepukak ŋuluce daadaŋ ŋulu epukato eriŋa ayoŋ, atiŋito ŋituŋa erono nooi, ejaununeete akimuj ka epiini aneni kec, pa imaritae ŋicekelya ŋatomoniomwon ŋulu ke esilipa ŋulu alemununeete ŋituŋa. Ŋiketiyak kec daŋ arae ŋikepukak. Nai nyitiya ayoŋ ŋun, anerae etopoloorit ayoŋ Akuj.

¹⁶ Kire, abu ayoŋ oinakin akitiya etic ŋolo ka akiduk arwatata na, nyegyela isua ŋalup a ituŋanan a idio, ido acunakina ŋiketiyak kaŋ daadaŋ lotic.

¹⁷ Emujete alomesa kaŋ ŋituŋa amiat ka ŋatomonikan: Ŋiburaniyae, ŋikepukak a ŋituŋa pa imaritae ŋituŋa ŋulu aponeneete neni kosi anakwapin aŋuna alodiyete kosi.

¹⁸ Aareneneo aŋuna kaŋ a ŋinakoloŋit emoŋ epei ka ŋamesekin ŋakanikapei ŋuna atumak, aareneneo daŋ aŋuna kaŋ ŋikorwa, ido a ŋinapaki alunyar ŋirwa ŋitomon bon, yaunae epiini ŋolo alalan nooi, kikote neni daŋ, nyiŋita ayoŋ ainakinio akimuj ŋina amaikina ayoŋ oryamu ikwapei ekepukan. Etiyae ayoŋ ŋun, anerae alalakinit ŋituŋa etic nooi.

¹⁹ Totamunitetei ayoŋ aŋuna ka ajokis kaŋ, okoe Ekapolon, totamunite daadaŋ ŋuna adau ayoŋ akitiya aŋuna a ŋituŋa a lu.