Neem. 4 - Ebaibul

Kitepegae ŋikadukok

¹ Ani iirari Sanibalat atemar edukio isua arwatata, abu iŋes toŋo nooi, toresiyar nooi, tojamuwana Ŋiburaniyae.

² Tolimu iŋes epupete ŋituŋa ŋulu etiyaata Iŋes etic ŋolo ka apukan ka ŋasigarya ŋuna a Samaria tema, “Nyo itiyaete Ŋiyudayan lu epalag lu? Epedorete mono ikes akinyakakin arwatata daadaŋ a? Einakinete ikes ŋamuronisya a? Edukokinete mono ikes arwatata alotooma apei koloŋit a? Ekutunete mono ikes ŋamoru aneni etukotor icunyitae a?”

³ Ayai Tobia ŋolo alo Amon diyete keŋ, tolimu tema, “Arwatata ŋina edukitoe a ŋamoru ŋin epedori ekwee edio ŋolo edokari kidiama keŋ aritaar!”

⁴ Kiira, okoe Akuj kosi, anerae ikijamuwar isua, kimyek ajamuwanar kec toboŋok ikes pei, kimyek ikes toŋatarae torikoroe nakwap ŋina erikoryo.

⁵ Nyijamak asecit kec, ido nyikisa asecit kec alokiŋaren kon, anerae iyanyete ikes ŋikadukok.

⁶ Aŋun, aponi isua todukokinae nabo arwatata, ido abu arwatata daadaŋ kiryam alokwap, alokidiama todol natutubet apei ŋina ka aoyau keŋ, anerae ayakatar ŋituŋa atametait ŋinakitiyaet.

⁷ Nai ani iirarete Sanibalat, Tobia ka Ŋimarabui ta Ŋiamoni ka ŋituŋa ka Asod atemar elosi kiŋaren etic ŋolo ka akiduk nabo arwatata a Yerusalem ka aapuu agolokin neni amunaara daadaŋ anarwatata, apotu ikes toŋoa nooi,

⁸ tosodo totukut daadaŋ aponare akitijikin Yerusalem ka akiguryakin ŋituŋa alotooma keŋ.

⁹ Aŋun, aponi isua kilipae neni ka Akuj kosi, kiwuakinae ŋikilyok ŋulu eyokiyete akwap naparan ka nakwaare.

¹⁰ Nai apotu ŋituŋa a Yudaya temasi, “Adaun agogoŋu aneni a ŋiketiyak, ido elalak ŋatunyeny ka nyikipedorit iwon arubakin ikiduki arwatata.”

¹¹ Tolimut ŋimoe kosi temasi, “Nyeyenunete, kori nyiŋolikinete ikes ŋadikiro eriŋa iwon nyedolo neni kec akiar ikes, towo etic.”

¹² Ani epote Ŋiburaniyae ŋulu eboiyete alodiyete ŋimoe kosi, apotu ikilimokis isua ŋarwa ŋatomon temasi, “Epote ŋimoe yok anakiboisyo a daadaŋ a ŋuna iboiyoto, itipeunete ikes akitijikin iwon.”

¹³ Aŋun, abu ayoŋ ewuanak neni aorori alodiyete arwatata alokwap ŋituŋa a ŋikalya kec etiŋito ŋileŋia kec, ŋakwaaras ka ŋakausinei a ŋikaleŋeleŋe.

¹⁴ Kadau ayoŋ akiŋolikin ŋakiro ŋun daadaŋ, abu ayoŋ owo olimok ŋikapolok, ŋikepukak ka ŋituŋa ŋuluce daadaŋ otema, “Nyikuryaketa aŋuna kec, totamutu Ekapolon ŋolo etiron ka ŋolo ikitubuli, ido tojioto aŋuna a ŋiyeneta kus, aŋuna a ŋidwe kus a ŋulusapa ka aŋuna a ŋidwe kus a ŋulupesur, aŋuna a ŋaberu kus ka aŋuna a ŋirerya kus.”

¹⁵ Ani iirarete ŋimoe kosi atemar keyenun isua ŋuna atukunito ikes akitiya ka atemar adau Akuj amunaar ŋuna atukunito ikes akitiya, aponi isua daadaŋ toboŋoroe lotic ŋolo ka akiduk arwatata, toboŋo ŋinituŋanan lotic keŋ.

¹⁶ Ameun akoloŋit ŋin etiyaete atutubet apei a ŋiketiyak kaŋ etic ŋolo ka akiduk, ido totiŋito atutubet apei ŋakwaaras, ŋaupala, ŋakawo a ŋikaleŋeleŋe ka ŋarapeta ŋuna a ŋawat alojie, ido awuato ŋikarikok ŋituŋa a Yudaya daadaŋ

¹⁷ ŋulu adukete arwatata. Adakito ŋiketiyak ŋiboro ŋulu ke etic a akan a apei, totiŋito ŋiboro ŋulujiet a akan a ŋinace.

¹⁸ Tosodi ayakar ŋolokadukon daadaŋ ekileŋ keŋ eenikina nacir keŋ, ido kitiyae. Ayai ekile ŋolo akusi arupepe diyete kaŋ.

¹⁹ Abu nai ayoŋ olimok ŋikapolok ka ŋikepukak ta ŋituŋa ŋuluce daadaŋ otema, “Elal etic nooi ka epetakina ŋiwaetin daadaŋ, ido ikilatanakina iwon ikiduki arwatata.

²⁰ Apaki ŋina iiraryata iyes arupepe aneni iyakasi, tomotunos atipei neni kosi. Ebuni Akuj yok ajiore aŋuna yok.”

²¹ Aŋun, aponi isua tomunikinoe etic, etiŋito atutubet apei a ŋituŋa ŋakwaaras ameun apaki ŋina eapuunia akiwalar akitodol eboŋ etakanunete ŋikacer.

²² Abu daŋ ayoŋ olimok ŋituŋa apaki ŋin otema, “Emaikina ŋolokile ka ekeŋarakiniton keŋ topero tooma etaun Yerusalem nakwaare, ikotere eruworosi ikes ŋiketeok aŋuna yok nakwaare ka kitiyata naparan.”

²³ Aŋun, nyelacara ayoŋ ŋilowi kaŋ, kori ŋikaitotoi kaŋ, kori ŋiketiyak kaŋ, kori ŋikilyok ŋulu eteete akwap nakwaare, ŋinituŋanan daadaŋ atiŋit ŋiboro keŋ ŋulujiet tari elosi nakipi.