Neem. 3 - Ebaibul

Epite ŋolo akoritere ŋiticisyo

¹ Apotu nai Eliasib ŋolo arae esacaradoti ŋolo apolon nooi togeikis etic kaapei ka ŋisacaradotin ŋuluce, todukokis Epuke ŋolo a Ŋamesekin nabo. Apotu ikes kitaleut Epuke ŋol, kirikakis daŋ akiduk ŋikekya a ŋipukei; apotu ikes kitaleut arwatata ameun a lopuke a Ŋamesekin akitodol naduketait ŋina aoyan ŋina anyaritae ŋina ka Amiat tari naduketait ŋina aoyan ŋina ka Ananel;

² ameun a nen todukosi ŋituŋa a Yeriko arwatata, kikoba Sukur lokoku a Imuri akiduk a nen.

³ Tosodi toduko ŋidwe ka Asenaa epuke ŋolo a Ŋikolya, kiwuakis ŋakito ŋuna a epuke, ido kiwuakis ŋikekya, ŋigolyet ka ŋasuwa ŋuna ilorere epuke.

⁴ Todukok Merimos lokoku a Uria a ŋolo arae lokoku ka Akos arwatata alokiŋaren neni adukete ŋidwe ka Asenaa, alokiŋaren keŋ todukok Mesesabel, alokiŋaren Mesesabel todukok Sadok lokoku a Baana.

⁵ Alokiŋaren a Sadok todukok Tekoites, nai nyetapa ŋikapolokinitok kec etic ŋolo ke Ekapolon kec.

⁶ Todukokis nabo Pasea ka Mesulam lokoku a Besodeia epuke ŋolo Ŋorot, kiwuakis ŋakito ŋuna a epuke, ŋikekya ka ŋigolyet ta ŋasuwa ŋuna ilorere epuke.

⁷ Todukokis alokiŋaren kec Melatia ŋolo alo Gibeon ka Yadon ŋolo alo Meron, arae ikes ŋikilyok ŋulu alo Gibeon ka Misipa, ŋulu epukat ekepukan ŋolo ka akwap a ŋina Alokekwaye Aŋolol.

⁸ Alokiŋaren kec todukok Usiel lokoku ka Araia ŋolo arae epei a ŋiketyakak egolid. Alokiŋaren keŋ todukok Anania ŋolo arae epei a ŋulu enyalak ŋamyeta ŋuna akukunyok, todukokis ikes nabo arwatata Yerusalem todol tari Narwatata ŋina Aburon.

⁹ Alokiŋaren kec todukok Rapaia lokoku a Ur ŋolo arae ekepukan ka atutubet a apei a ŋina ka akibois a Yerusalem.

¹⁰ Alokiŋaren kec todukok Yedaia lokoku ka Arumap neni eteosi ka akai keŋ, ido alokiŋaren todukok Atus lokoku ka Asabineia.

¹¹ Todukokis Malakia lokoku ka Arim ka Asub lokoku a Paas-Moab atutubet ace ŋina ka arwatata ta aduketait ŋina aoyan ŋina a Ŋikenoi.

¹² Alokiŋaren kec todukok Salum lokoku ka Aloes, ŋolo arae ekepukan a atutubet ka apei a akibois a ŋina a Yerusalem, adukete iŋes kaapei ka ŋidwe keŋ ŋulupesur.

¹³ Apotu Anun ka ŋituŋa ŋulu eboiyete alo Sanoa todukokis nabo epuke ŋolo a Akadipaalat; kiwuakis ŋikekya, ŋigolyet ka ŋasuwa ŋuna ilorere epuke, todukokis daŋ arwatata ŋina arae aoyau keŋ ŋimitae ŋamiae ŋaomwon ka ŋatomoniomwon, todol lopuke ŋolo ka Aoret.

¹⁴ Todukok nabo Maliciya lokoku a Rekab, ŋolo arae ekepukan a atutubet a apei a ŋina ka akibois a ŋina a Bes-Akerem epuke ŋolo ka Aoret, kiwuak ŋikekya, ŋigolyet ka ŋasuwa ŋuna ilorere epuke.

¹⁵ Todukok Salum lokoku a Kolose, ŋolo arae ekepukan a akibois a Misipa, epuke ŋolo a Elelya, todukok arwatata kidiama epuke, kiwuak daŋ ŋikekya, ŋigolyet ka ŋasuwa ŋuna ilorere epuke, tosodi todukok arwatata ŋina ka akare a ŋina a Sela, a akare a emanikor a ŋolo ke erwosit akitodol nadoketa ŋuna etiyaere, kori edokanarere lotaun a Daudi.

¹⁶ Ekaku keŋ todukok Neemia lokoku ka Asibuk, ŋolo arae ekepukan a atutubet a apei a akibois a ŋina anyaritae Besur ameun aneni eteosi ka alyal a Daudi akitodol neni ayai akare ka lolain a ŋasigarya.

¹⁷ Ekaku a Neemia, todukokis ŋilepi lu arwatata alokiŋaren keŋ: Todukok Reum lokoku a Bani, totupak Asabia ekepukan a atutubet a apei a akibois a ŋina anyaritae Keila, todukok iŋes arwatata aŋuna a ŋituŋa a akibois keŋ.

¹⁸ Ekaku ka Asabia todukokis ŋiyeneta keŋ lu arwatata: Todukok Binui lokoku ka Enadad a ekepukan a atutubet a apei a ŋina ka akibois a ŋina anyaritae Keila,

¹⁹ totupak Eser lokoku a Yesua a ŋolo arae ekepukan a Misipa, abu iŋes todukok arwatata neni eteosi ka neni eŋadatae ŋiboro ŋulujiet alokoona a arwatata.

²⁰ Ekaku keŋ todukok Baruk lokoku a Sabai iwace a arwatata ameun alokoona tari lopuke ŋolo a akai ka Eliasib a esacaradoti a ŋolo Apolon nooi.

²¹ Ekaku a Baruk, todukok Meremos lokoku a Uria a ŋolo arae lokoku ka Akos iwace a arwatata ameun alopuke a akai ke Eliasib tari neni isalitor akai ke Eliasib.

²² Ekaku a Meremos todukokis ŋisacaradotin ŋulu eboiyete anakiboisyo a ŋuna edunyito nen arwatata.

²³ Ekaku a ŋisacaradotin totupakis Benjamin ka Asub, todukokis ŋul arwatata neni iteosi ka akai kec. Ekaku kec todukok Asaria lokoku ka Maaseia a ŋolo arae lokoku ka Anania arwatata neni ebakasi ka akai keŋ.

²⁴ Ekaku ka Asaria todukok Binui lokoku a Enadad iwace a arwatata ameun alokai ka Asaria tari lokoona a arwatata.

²⁵ Todukok Palal lokoku a Usai arwatata neni eteosi ke ekoona ka aduketait ŋina aoyan ŋina eleŋoro alokai ke erwosit a ŋina alokidiama a ŋina ayai diyete alapatu ŋina a ŋasigarya a ŋuna iyokiyete akai ke erwosit. Ekaku keŋ kiwuapakis Pedaia lokoku a Paros

²⁶ ka ŋiketiyak ŋulu ka Akai ka Akuj ŋulu eboiyete alo Opel, todukokis ikes arwatata akitodol neni eteosi alo Kide ka epuke ŋolo a Ŋakipi ka aduketait ŋina aoyan ŋina eleŋit ŋakais ŋunace.

²⁷ Ekaku keŋ todukokis Ŋitekoitei iwace a arwatata neni eteosi ka aduketait ŋina aoyan, akitodol narwatata ŋina ka Opel.

²⁸ Todukokis ŋisacaradotin kidiama epuke ŋolo ka Aŋole, todukok ŋinituŋanan neni eteosi ka akai keŋ.

²⁹ Ekaku a ŋisacaradotin, todukok Sadok lokoku ka Imer neni eteosi ka akai keŋ. Ekaku keŋ todukok Semaia lokoku a Sekania a eketen a epuke ŋolo alo Kide,

³⁰ ekaku keŋ todukokis Anania lokoku a Selemia ka Anun lokoku a Salap a ŋolo a ŋikanikapei iwace a arwatata. Ekaku ka Anun todukok Mesulam lokoku a Berekia neni amunaara anarwatata neni eteosi ka ŋakais ŋuna eboiyo iŋes.

³¹ Ekaku keŋ kiwuapak Maliciya epei a ŋiketyakak egolid, todukok arwatata akitodol kai ŋina a ŋiketiyak a ŋulu ka Akai ka Akuj ka Kai ŋina a ŋikagyelanarak, neni eteosi ke epuke ŋolo a Mipikad tari nagule ŋina alokidiama ŋina ayai lokoona.

³² Todukokis ŋikagyelanarak ka ŋiketyakak egolid arwatata ŋina alokidiŋ agule ŋina alokidiama ŋina alokoona ka epuke ŋolo a Ŋamesekin.