Neem. 2 - Ebaibul

Kiyakiyarae Neemia Yudaya

¹ Elap ŋolo enyaritae a Ŋaburaniyae Nisan, alokaru a ŋolo a ŋitomon ka ŋiarei ipukat erwosit Aritaseses Perisia, apaki ŋina einanakinere erwosit epiini, abu ayoŋ odaka epiini oina erwosit. Sek ekiŋaren mam apaki ŋina alositor ayoŋ neni ke erwosit eyaloloŋi.

² Aŋun abu erwosit ekeŋit ayoŋ tema, “Nyo enyorididio ereet kon, nyidyaka bo iyoŋ? Kire jik erae ŋin akiyaloloŋ ŋina eyai lotau.” Abu nai okobul ayoŋ nooi.

³ Olimok ayoŋ erwosit otema, “Elipi torubak erwosit eyari ŋikaru ka ŋikaru! Ikokini ereet kaŋ pa enyorididi, tomunaara etaun ŋolo erae akibois ŋina enukitae atapapaa kaŋ ka tomunaaritetei ŋipukei ka akim ai?”

⁴ Abu nai erwosit ekeŋit ayoŋ tema, “Nyo tokona iŋita iyoŋ?” Aŋun, abu ayoŋ elip neni ka Akuj a ŋina anakuj.

⁵ Tosodi olimok ayoŋ erwosit otema, “Ani kitalakarito ŋakiro nu erwosit ka ani kajok ayoŋ eketiyan kon aneni kon, eŋita ayoŋ atemar ikiyakiya iyoŋ ayoŋ Yudaya, lotaun ŋolo enukakinitae atapapaa kaŋ, ikotere alosi adukokin iŋes nabo.”

⁶ Kirwor erwosit neni kaŋ (eboi arwosit daŋ alodiyete keŋ) tema, “Apaki ŋina etya ai iboiyo iyoŋ ka ama, ido ori iboŋunio iyoŋ?” Aŋun, abu tojoik erwosit akiyakiyar ayoŋ ka abu ayoŋ olimok iŋes akoloŋit ŋina acamitor alosio.

⁷ Tosodi olimok ayoŋ erwosit otema, “Ani kitalakarito ŋun erwosit, kimyek okoinakin ayoŋ ŋabaruwae aŋuna a ŋikepukak a akwap a ŋina alokekwaye aŋolol, ikotere ekemyekis ikes ayoŋ etor nakiboisyo kec tari ŋina adolio ayoŋ Yudaya

⁸ ka akainakin ayoŋ abaruwa oya neni ka Asap a ekedaran amoni ke erwosit ŋina a ŋikito, tolimokinae iŋes ainakin ayoŋ ŋabaoi, ikotere etiyaunia ŋakito ŋuna a ŋipukei a ŋulu ka aduketait a ŋinajiet a ŋina iteere Akai ka Akuj ka adukokinia arwatata ŋina ke etaun ta akai ŋina alosi ayoŋ akiboiyo.” Abu erwosit okoinak ayoŋ ŋuna eŋita, anerae ikirukit ayoŋ ka Akuj kaŋ ŋina ajokan.

⁹ Tosodi abu ayoŋ odolu neni a ŋikepukak a akwap a ŋina Alokekwaye Aŋolol, ido oinak ikes ŋabaruwae a erwosit. Ani sek arotokini ayoŋ, abu erwosit okoinak ayoŋ ŋasigarya ŋuna alosete a ŋakejen ka ŋasigarya ŋuna adokito ŋaŋolei.

¹⁰ Ani iirarete Sanibalat ŋolo erae Eoranait ka Tobia ŋolo arae ekapolon a Ŋiamoni ŋakiro ŋun apotu ikes nyelakaros aŋuna ayenuniata atemar ebunit ituŋanan ice ayaun ajokis neni a Ŋisirael.

Kisyeme Neemia ŋarwatatain a Yerusalem

¹¹ Aŋun, abu ayoŋ odolu Yerusalem, eboi a nen ŋirwa ŋiuni.

¹² Abu nai ayoŋ onyou nakwaare, kaapei ka ŋikilyok ŋidi. Nyelimokina ayoŋ ituŋanan idio ŋakiro ŋuna abu Akuj kaŋ kiwuak lotau kaŋ akitiya aŋuna a Yerusalem. Abu ayoŋ oya aŋole ŋina sek adokit ayoŋ, iŋes bon abu ayoŋ oya.

¹³ Abu ayoŋ olot nakwaare, etor lopuke ŋolo enyaritae epuke ŋolo ka Akadipaalat, olunyar alolelya a ŋolo enyaritae Elelya ŋolo ke Etyaŋ a ŋolo adedeŋan tari lopuke ŋolo enyaritae epuke ŋolo a Aoret. Abu ayoŋ esyeme ŋarwatatain ŋuna keponi toritakinae kwap ka ŋipukei keŋ ŋulu keponi tomunaarae a akim.

¹⁴ Tosodi abu olot kiŋaren odol lopuke ŋolo ke Elelya tari Kare a erwosit, nai amam neni apedori aŋole ŋina adokit ayoŋ akitor.

¹⁵ Aŋun, abu ayoŋ etipeiyo, omek nakwaare erot ŋolo ke epuke a ŋolo a Akadipaalat, ido esyeme arwatata. Tosodi abu ayoŋ oboŋo oloma alopuke a ŋolo a Akadipaalat,

¹⁶ pa ayenete ŋikepukak neni alosit ayoŋ ka ŋuna etiyae ayoŋ, ido ariŋa ayoŋ nyelimokina ŋakiro ŋadi neni a Ŋiburaniyae, a ŋisacaradotin, a ŋikapolok ka ŋikepukak ta ŋituŋa daadaŋ ŋulu amaikina kitiyata etic.

Totubunoe adukokin nabo ŋarwatatain

¹⁷ Abu nai ayoŋ olimok ŋituŋa otema, “Iteete iyes ŋican ŋulu ikiyakar iwon, epite ŋolo eyakar Yerusalem emunaara ka emunaaritae ŋipukei keŋ ka akim. Potu odukokisi nabo arwatata a Yerusalem, ikotere nyikijamuwar nabo iwon.”

¹⁸ Abu ayoŋ olimok ŋituŋa atemar, abu Akuj kaŋ ekeŋarak ayoŋ, olimok daŋ ikes ŋakiro ŋuna abu erwosit okolimok ayoŋ. Temasi nai ikes, “Ogeikisi akiduk!” Aŋun, apotu ikes tocamunos akitiya kaapei akitojokun etaun kec.

¹⁹ Nai, ani iirarete Sanibalat ŋolo arae Eoranait ka Tobia ŋolo arae ekapolon a Ŋiamoni ka Gesem ŋolo abunit alo Arabia ŋakiro ŋun, apotu ikes itojamuwasi ka itokyanatar isua ebasi, “Anukiro nu ŋuna itiyaete iyes? Iŋero iyes erwosit a?”

²⁰ Tosodi abu ayoŋ oboŋok ikes otema, “Akuj ŋina anakuj iŋes ikiinakini isua akisiyookin etic kosi, ido elosyo isua ŋiketiyak keŋ ageun akiduk, nai imamukatar iyes idiobore ŋini erae ŋini kus alo Yerusalem, imamukatar iyes apedor ŋina ikiinakinitae iyes aŋuna a Yerusalem.”