Naum 1 - Ebaibul

¹ Erae nu ŋakiro ŋuna abu Akuj kisileereu aŋuna ke etaun a Ninepe, ŋakiro ŋuna abu Naum ŋolo abunit alo Elikos toanyu anakiruja, ido kigir.

Aŋoit ka Akuj ŋina amunyaran ŋituŋa a Ninepe

² Erae Akuj Ekapolon ŋolo alilyan ka ŋolo enyaŋan. Inyaŋana Ekapolon ka epatana iŋes akiŋo. Isicani Ekapolon jik ŋulu eŋerito iŋes eŋoikini Ekapolon nooi ŋimoe keŋ.

³ Nyeŋoi Ekapolon atipei nai egogoŋ iŋes nooi, mam nyeesikini iŋes ŋikasecak nyisicana aŋuna a ŋasecisya kec. Neni daadaŋ itori iŋes, eyakaun ekuwuam ŋolo ipiripiri ka ŋolo ekusi ka agogoŋu. Erae ŋidouwon apuwa ŋina a ŋakejen keŋ.

⁴ Iŋenyakini Ekapolon anam, ido kitoon, itooni iŋes ŋaŋololin daadaŋ. Eokiyorete ŋinya ka ŋikito alomoru Karimel ka alo Basan, einiyarete ŋatur a Lebanon.

⁵ Emaranikinete ŋimoru alokiŋaren Ekapolon ka ecelarete ŋikamukumukui; emaranikini akwap alokiŋaren keŋ kaapei ka ŋinibore daadaŋ eyai nen.

⁶ Ŋae epedori akidaŋidaŋ aŋoit keŋ? Ŋae epedori akidaŋidaŋ anyunyura ŋina ka adedeŋu keŋ? Ededeŋ anyunyura a Ekapolon ikwaan ka akim ŋina amwanan nooi, ebwaŋabwaŋaari iŋes ŋatabab ŋuna aburok.

⁷ Ejok Ekapolon, eiununui iŋes ŋituŋa keŋ apaki ŋina eyakatar locan, eiununui iŋes ŋituŋa ŋulu eemete neni keŋ,

⁸ tari anakalele a ŋina ipuma nooi. Emunyari Ekapolon ŋimoe keŋ, iwuapari ŋimoe keŋ tari nakiryonut.

⁹ Kaanukiro itukotor iyes imanito Ekapolon? Emunyari Ekapolon ŋimoe keŋ daadaŋ, Emunyari iŋes ikes apeimunyaret bon todaunos jik.

¹⁰ Iyes ŋikamerak, ikicunyaryo iyes lopite ŋolo icunyarere ŋikukwa ŋulu eenikina, kori ŋinya ŋulu aonok.

¹¹ Abu aneni kon Ninepe ekile ŋolo etuki akitiya ŋuna aronok neni a Ekapolon, ekile ŋolo itatami ŋituŋa ŋuluce akitiya ŋuna aronok.

Ŋakiro ŋuna ajokak aŋuna a Yudaya

¹² Tema Ekapolon neni a ŋituŋa keŋ, “Tari kegogoŋ ŋituŋa ka Asiriya ka kelalak daŋ, emunyaryo ikes jik todaunos. Tari kekesicanit ayoŋ iyes ŋituŋa kaŋ, nyekesicani nabo.

¹³ Alemari ayoŋ apedor ŋina ka Asiriya aneni kus ka alemari ayoŋ ŋican aneni kus.”

¹⁴ Alimu Ekapolon nu aŋuna kus a ŋituŋa keŋ ebe, “Imamukaunotor iyes ŋiletok ŋulu itorubakinete ŋirorwa kus. Amunaari ayoŋ ŋitorubei a ŋakujo kus ŋulu eyakasi nakais a ŋakujo kus. Asubakini ayoŋ neni ikinukio iyes, anerae mam ajokis eyai neni kus.

¹⁵ Kiirasi iyes ŋituŋa a Yudaya, adolu alokidiama ŋimoru ekiyakia ŋolo eyaunit ŋakiro ŋuna ajokak, iserae iŋes ŋuna ke ekisil. Iyes ŋituŋa a Yudaya, kinumunuma ŋasuban kus, kisiyookisi ŋakikoŋieta kus, anerae nyikiremete nabo iyes ŋimoe kus, adaun amunyar ikes jik.”