Mika 7 - Ebaibul

Amodyanakin ŋina apolon ŋina abu min lotuŋa

¹ Emam akigeno apei daŋ eyai neni kaŋ! Ikikwaanikin ayoŋ ka ituŋanan ŋini enyamit akoro, ŋini ani elosi lokitoe ecamit ŋaraito, nyeryamu tari apei imyekinitae ka nyeryamu tari arait ke epiini apei daŋ, toryamu epiini ka ŋaboboryo ŋuna akonok daadaŋ kigyeror.

² Adaun anakwap ŋituŋa ŋulu enupito Akuj, adaun ipei daŋ ŋini iyookino ŋini eriŋa eyari; iwarito ŋituŋa daadaŋ akiar, iwuarit ŋinituŋanan akiar ituŋanan keŋ pei.

³ Ayenikis ŋakan kec nooi akitiya aronis; iŋitasi ŋikapolok ka ŋikatubok ŋakiro ŋakaluŋuluŋui, ereanakinete ŋulu eyakatar apedor ŋuluce akitiya ŋuna ecamito ikes; aŋun, aoliyosi ikes daadaŋ anakiyookino.

⁴ Ekwaanikin ŋulu ajokak aneni kec ka amoni ŋina erae ŋikukwa bon, arokyeta nooi ŋulu iyookino akilo neni eitana alokukwae. Adolu akoloŋit ŋina isicania Akuj ŋituŋa ŋul, lopite ŋolo alimokinitotor ŋikadwarak kec ikes. Adolu tokona neni kec akigurokin.

⁵ Nyikinyom ekone, nyikinyom neni a ŋini imina iyoŋ; tocoik ŋakiro ŋuna irworo iyoŋ tari neni ka aberu kon,

⁶ anerae ediŋakin esapat ka papa keŋ, ediŋakin apese ka toto keŋ, ediŋakin ateran ka tata keŋ, eruworosi ŋimoe a ituŋanan ŋituŋa ŋulupei alokal keŋ.

⁷ Nai ani eruwor ayoŋ edarit ayoŋ anakigeno Ekapolon, edarit ayoŋ Akuj akaiunan kaŋ; ekeirari ayoŋ Akuj kaŋ.

Akiki ka akikinyom Akuj

⁸ Okoe iyes ŋimoe kaŋ, nyilelyana aŋuna ka akiloun ayoŋ; ani apapanuni ayoŋ, aryamuni nabo agogoŋu, ani amini ayoŋ nakiryonut, Ekapolon eruwor akica kaŋ.

⁹ Aŋuna aseca ayoŋ aneni ke Ekapolon, edaŋidaŋi ayoŋ anyunyura ke Ekapolon, akitodol ŋina akacamakinia iŋes ayoŋ, ido totub ŋakiro kaŋ. Akalemuni iŋes ayoŋ anakiryonut tooma nakica; eŋolikini ayoŋ iŋes akaiuni.

¹⁰ Iŋolikinete nai ŋimoe kaŋ ŋun, ido irumete ŋileec ŋituŋa ŋulu apotu temasi neni kaŋ ebe, “Ai mono eyai Ekapolon Akuj kon?” Eŋolikini ayoŋ ikes ereunio, ido kipudaarae ikwa ecoto ŋolo eyai lorotin ŋulu ke etaun.

Akidwar ŋuna ka adukokin nabo Yerusalem

¹¹ Ŋituŋa a Yerusalem, ebunit apaki ŋina idukokiniata iyes nabo ŋarwatatain ŋuna ke etaun kus, apaki ŋin, isiyotokinete iyes ŋikorin kus neni alwanan.

¹² Akoloŋit ŋin, eboŋunete ŋituŋa kus neni kus. Eboŋunete alo Asiriya ka alotaunio a Ijipit, eboŋunete alo Ijipit ka Eupurate, eboŋunete ananamyo a ŋuna alwanak ka alomoru a ŋulu alwanak.

¹³ Esilunete ŋakwapin, aŋuna a ŋituŋa kec a ŋulu etiyata aronis.

Akilip ka akipuro

¹⁴ Ekapolon kiyok ŋituŋa kon, ŋulu ibu iyoŋ toseu aruwor ŋulu kon, tari daŋ kiboiyete make anamoni, eyakasi ikes nalup ŋuna ajokak, kimyek ikes toryamut ibore ŋini enyamete alo Basan ka alo Gilead, lopite ŋolopei koloŋ aryamununiata.

¹⁵ Ekapolon, kitiya ŋakujuwuanisya aŋuna kosi, lopite ŋolo ibunio iyoŋ kitiyaa apaki ŋina ikiyaunia isua alo Ijipit.

¹⁶ Iŋolikinete ŋakwapin ŋakiro ŋuna itiya iyoŋ, ido kiruma ŋileec, tari sek daŋ kerae ŋakwapin ŋun ŋuna egogoŋ, ebunete ikes ŋakituka kec ka erapete ŋaki kec.

¹⁷ Elyaete ikes alokwap ikwa ŋimuno, elomunete ikes anaduketa kec a ŋunajiet emaranete ka ekuryaka. Epote ikes ikitopoloorito iyoŋ Ekapolon Akuj kosi.

Akisyon ka Akuj ka amina keŋ ŋina nyiryaŋiryaŋa

¹⁸ Okoe Akuj, anikuj ikwaan ka iyoŋ! Irae iyoŋ Akuj ŋina isyoniyenene asecit ka ŋadyakanareta a ŋipiya a ŋituŋa kon. Nyirubakini iyoŋ iŋoit ŋikaru ka ŋikaru, nai imina iyoŋ akitoodiunun akisyon.

¹⁹ Ikisyoni iyoŋ isua nabo; ikwaanikin ŋasecisya kosi ka ibore ŋini ipudaari iyoŋ a ŋakejen. Ilemari iyoŋ ŋasecisya kosi, ikwaanikin ka ibore ŋini imasaryo nanam kwap ŋakipi.

²⁰ Itoodikini iyoŋ ŋituŋa kon akikinyoma kon ka amina kon ŋina nyiryaŋiryaŋa, itoodikini iyoŋ ŋun neni a ŋipapae ka Aburaam ka Yakob, lopite ŋolo ibunio iyoŋ koloŋ sek kiikinia atapapaa kosi.