Biblia Todo Logo
Bìoball air-loidhne

- Sanasan -

Mika 6 - Ebaibul


Kisit Akuj Ŋisirael

1 Kiirasi ŋakiro ŋuna irworo Ekapolon: “Tonyoutu! Todyekanaros aŋuna a ŋakiro kus aloŋaren ŋimoru, kimyekisi ŋikamukumukui kiirasi ŋitoilon kus.

2 Kiirasi iyes ŋimoru ŋakiro ŋuna isitar Ekapolon, topupokisi iyes ŋawoeta ŋuna ka akwap ŋuna a ŋikaru ka ŋikaru, eyakar Ekapolon asitan lotuŋa keŋ, isitakinit iŋes Ŋisirael.

3 Ŋikaatuŋa, anukiro etiya ayoŋ neni kus? Alipite eketeryamunia ayoŋ iyes ŋican? Toboŋokinoe ayoŋ.

4 Abu ayoŋ okoyau iyes anakwap a Ijipit, okolaku anakwap a ŋina iraakatar ŋipi. Abu ayoŋ eyakiu Moses kaapei ka Aron ta Miriam akirik iyes.

5 Ŋikaatuŋa, totamutu ŋakiro ŋuna abu erwosit ŋolo a Moab ŋolo anyaritae Balak totuk akitiya neni kus, ka ŋuna abu Balaam lokoku a Beor toboŋok Balak. Totamutu ŋakiro ŋuna apotu kitiyakin neni kus alorot ameun alo Sitim tari Giligal. Totamutu ŋakiro ŋun, ikotere iyenunete ŋuna abu ayoŋ etiya aŋuna ka aiun iyes.”


Ŋuna iitanit Akuj
( Amos 5:24 )

6 “Nyo emaikina ayoŋ oyau neni ke Ekapolon a Akuj a ŋina alokidiama, apaki ŋina abunio akilip neni keŋ? Emaikina mono ayoŋ oyau ŋainakineta ŋuna epeyo, kaapei ka ŋitak ŋulu erae apolou kec ekaru epei a?

7 Elakar mono Ekapolon keyaun neni keŋ ŋamesekin ŋalipyo ka akimyet ŋina ilelebun ŋaŋololin ŋalipyo ŋatomon a? Ainakini mono ayoŋ Ekapolon ikoku kaŋ ŋini kiyae aŋuna a ŋadyakanareta a? Ainakini mono ayoŋ iŋes arait ŋina ka akuwan kaŋ aŋuna ka asecit ke etau kaŋ a?”

8 Iyoŋ ituŋanan, adau Ekapolon alimokin iyoŋ ŋuna ajokak; ŋuna ecamit Ekapolon aneni kon ikes nu: Akitiya ŋuna iyookino ka amina arimakinit ŋuluce ta alosit itiditeuna bon anakimorikina ka Akuj yok.


Isicanio ŋikamodyanakinak ka ŋiryenyaanotin

9 Erae ibore ŋini ejok akitopoloorit Ekapolon. Enyarit iŋes ŋituŋa ŋulu ke etaun ebala, “Topupokisi, iyes ŋituŋa ŋulu itukokina lotaun.

10 Ekemuryakinete mono ayoŋ ŋisiliŋa ŋulu emodiununiyo, ŋisiliŋa ŋulu eyakasi nakais a ŋulu aronok a? Ekemuryakinete mono ayoŋ ŋaratilyo ŋuna emodiyanakinere ŋituŋa ŋuna icenen a?

11 Arubakini mono ayoŋ emyekinit ituŋanan ŋini isitiyae aratil ŋina nyiyookino ka ecwee ŋolo nyiyookino ŋakiloi keŋ esibit nyitiyaete aronis a?

12 Eryenyaaka ŋikabarak kon, irworosi ŋituŋa ŋulu iboiyete alotooma kon alyokonu, erae daadaŋ ŋuna irworosi ikes alyokonu.

13 Aŋun, esyaki ayoŋ amunaar iyoŋ, esyaki ayoŋ akitisilun iyoŋ aŋuna a ŋasecisya kon.

14 Imujete ŋituŋa kon nai nyimwokete; erubakinete ŋakookyes kec eororete. Iŋadaete ikes, nai mam ibore ideun, anerae ibore ŋini iŋadakinete ikes, etelemari ayoŋ ŋimoe.

15 Epedorete ikes aekin, nai mam ibore elemunete; icuunete iyes akimyet alokito ka Olipa, nai nyiosakinosi akimyet adio daŋ, icuunete iyes epiini, nai nyimasete edio daŋ,

16 anerae iwuapa iyes ŋakiro ke erwosit Omiri ka etiyata ŋituŋa kon ŋiticisyo daadaŋ ŋulu etiyaete ŋituŋa ke ekal ka Aab, iwuapa iyes ŋakiro ŋuna aronok ŋuna etiyaete ikes. Aŋun, ekepotokini ayoŋ iyoŋ namunaaro ka ŋituŋa kon najamuwaro; ikitekinete iyoŋ ŋituŋa a ŋakwapin irae koŋin.”

Ngakarimojong Interconfessional Bible © Bible Society of Uganda, 2008.

Bible Society of Uganda
Lean sinn:



Sanasan