Mika 4 - Ebaibul

Ipukae Akuj ŋituŋa keŋ a ekisil

¹ Alorwa a ŋulu eponito, ituruworyo emukura ŋolo ka Akai ke Ekapolon ŋolo eoya nooi akilo ŋimoru, itooyaaryo kileŋ ŋikamukumukui, ilelebikinosi ŋituŋa a ŋakwapin neni keŋ.

² Epote ŋituŋa anakwapin nen, ido temasi, “Potu, emaikina iwon etipeiyosi lokamukumukut ŋolo ke Ekapolon, Kai ŋina ka Akuj a Yakob, ikotere Ekapolon ikitatam iwon ŋuna ebala kiwuapa, ido opedosi iwon akiwuap ŋuna ebala iŋes; anerae Sion iŋes elomuniata ŋikisila, ido, Yerusalem iŋes elomunia akirot ke Ekapolon.”

³ Etubi Akuj ŋiburasinei a ŋakwapin, etubi iŋes ŋiburasinei a ŋakwapin a ŋuna agogoŋok a ŋuna elwaka. Ityakarete ikes ŋileŋia kec ŋulujiet toruworos ŋimelekyes ka ŋakwaaras kec toruworos ŋileŋia ŋulu etubere ŋikito. Nyejikinosi nabo ŋakwapin, kori nyitatamete nabo ŋituŋa epite ŋolo ejiere.

⁴ Iboikin ŋinituŋanan lotolim a epiini keŋ ka a ebobore keŋ; mam ituŋanan einakini ikes akuryanu, anerae adau Ekapolon ŋolo Etiron alimun ŋun.

⁵ Elosete ŋakwapin daadaŋ iwuapit ŋinakwap akuj keŋ ka ilipi ŋinakwap neni ka akuj keŋ, nai iwon ikiwuapi ŋuna a Ekapolon ka ikilipi neni a Ekapolon Akuj yok ŋikaru ka ŋikaru.

Akiikinet ŋina ka alakuno ekaku ka akielaro nakwapin

⁶ Alimu Ekapolon ebe, “Ani edoli akoloŋit ŋin, acunakini ayoŋ ŋikaŋwalak, acunakini ayoŋ ŋulu ealar nakwapin ka ŋulu eteryamu ayoŋ ŋican.

⁷ Eteyari ayoŋ ŋikaŋwalak ŋulupiya, eturuwori ayoŋ ŋulu aponi yae erae ŋirikon ŋituŋa ŋulu egogoŋ. Ayoŋ Ekapolon epukae ikes alokamukumukut Sion, akisyakin anakoloŋit a ŋin tari ŋikaru ka ŋikaru.

⁸ Ani eruwor iyoŋ Yerusalem, neni iyokiyo Akuj ŋituŋa keŋ ikwa ekeyokon, iruwor iyoŋ nabo etaun ŋolo apolon anapukan a ŋina sek erae ŋina kon.

⁹ Kaanukiro igworotor iyes ioroete nooi? Imamukatar mono iyes erwosit a? Atwana mono ekesirworiunan kus a? Ŋakiro mono ŋun ikikamunia iyes aryeba nooi ikwa aberu ŋina eapi akidoun a?

¹⁰ Kibelibelo aŋuna ka aryeba, iyes ŋituŋa a Yerusalem, lopite ŋolo ibelibelor aŋuna ka aryeba a aberu ŋina eapi akidoun, anerae emaikina tokona iyes kimyekis etaun toloto tolomiyasi nariet. Ilosete iyes Babilon; nen iŋes ikiiunia iyes Ekapolon alomoe kus, nen iŋes ikilakunia iyes Ekapolon kus alomoe.

¹¹ Nai tokona, acunakin ŋakwapin ŋuna alalak akitijikin iyes ebasi ikes, ‘Emaikina tomunaarae Yerusalem! Emaikina iwon eŋolikisi etaun ŋol eruwor ŋamoru koŋin!’ ”

¹² Nai nyeyenete ŋakwapin ŋun ŋuna etami Ekapolon, nyeyenete ikes ŋuna eye Ekapolon. Nyeyenete ikes atemar adaun ikes acunakin iwapei, ikwa ecunakinere ŋimomwa iwapei toramae.

¹³ Ebala Ekapolon ebe, “Ŋituŋa a Yerusalem, toloto kisicana ŋimoe kus, eketogogoŋi ayoŋ iyes ikwa emaanik ŋolo egogoŋ ŋamomwar ikwa ŋasuwa ka togogoŋ ŋimolokony ikwa eburonis. Ireunete iyes ŋakwapin ŋuna alalak, ikiinakinete iyes ayoŋ ebari kec ŋolo kepotu ikes toŋatut anaryenyeo. Iyaunete iyes ebari ŋol neni kaŋ ke Ekapolon a akwap a daadaŋ.”