Mika 3 - Ebaibul

Ŋikepukak ka ŋikadwarak ŋulu aronok

¹ Abu nai ayoŋ otema, “Topupokisi iyes ŋikepukak a ŋituŋa a Yakob, iyes ŋikepukak ŋituŋa a Isirael. Emaikina iyes iyenete ŋuna iyookino,

² nai iremokino iyes ajokis, ido kitojokito aronis, iryetasi iyes ŋawat a ŋituŋa kaŋ, imyekis ikes erae ŋakoyo bon.

³ Irikasi iyes ŋituŋa kaŋ, iryetasi iyes ŋawat kec, ibilibiliyasi ŋakoyo kec, itubutuboto ŋakoyo kec esibit akiriŋ nina idorokinio ka asipirya, esibit akiriŋ ŋina idorokinio ka amot.”

⁴ Ebunit apaki ŋina ikalounioto iyes neni ke Ekapolon, nai mam ŋuna ikiboŋokini iŋes iyes, nyecamuni iŋes apupokin ŋakilipasinei kus, anerae itiyata iyes aronis.

⁵ Ŋakiro ŋuna irworo Ekapolon ikes nu, “Amodiyanakis ŋikadwarak ŋituŋa kaŋ, anerae iiyanakinete ikes ekisil neni a ŋulu isimujete ikes, nai iiyanakinete ejie neni a ŋulu nyisimujete ikes.

⁶ Aŋun, ŋikadwarak, eapi apaki kus adaun; edoiyori akoloŋ aneni kus, anerae ipotu kitooliyosi ŋituŋa kaŋ, mam nabo iyes akidwar ace, mam nabo nyipedorete iyes ayenun ŋuna eponito.”

⁷ Irumete ŋikadwarak ŋileec. Nyelakarosi ŋimurok, ituruworyo ikes daadaŋ ŋicaryo, anerae nyeboŋokini Akuj ŋakiro kec.

⁸ Nai, ani eruwor ayoŋ, ekelelebikinitae apedor, ekelelebikinitae etau ŋolo ke Ekapolon, ekelelebikinitae akiyookino ka agogoŋu, ikotere olimokinia ŋituŋa a Yakob ŋadyakanareta kec, olimokinia ŋituŋa a Isirael asecit kec.

⁹ Kiirasi ŋakiro nu, iyes ŋikarikok a ŋituŋa a Yakob, iyes ŋikepukak a ŋituŋa a Isirael, iyes ŋulu ijamuwarito akiyookino, ido kiloco ŋuna iyookino;

¹⁰ ipotu iyes toduko Sion anabukonor ŋaokot a ŋituŋa keŋ, ipotu iyes toduko Yerusalem anakitiya aronis lotuŋa keŋ.

¹¹ Etubete ŋikepukak a Yerusalem ŋakiro aŋuna a ŋakaluŋuluŋui, itatamete ŋisacaradotin keŋ ŋikisila aŋuna ke etacit, edwarete ŋikadwarak keŋ ŋakiro aŋuna a ŋisiliŋa; torae bo neni ke Ekapolon eyarikinito ebasi, “Kire jik, ikirukit iwon ke Ekapolon, emam awana ebuni neni yok.”

¹² Aŋuna a ŋakiro kus, itao Sion toruwor emanikor; eruwor Yerusalem ereŋorot ŋolo etukotor ŋamoru, ido elomuni amoni alomukura a ŋolo ka Akai ka Akuj.