Mika 2 - Ebaibul

Akitoroniyar aronis ŋina eyai nakimorikina a ŋituŋa

¹ Ekaŋ iyes ŋulu itukete akitiya ŋuna aronok, iyes ŋulu iyeete akitiya aronis apaki ŋina iperyoto! Ani iwalari akwap itiyakinete ikes ŋuna apotu totukut nakwaare akitiya, anerae ebasi ikes eya ŋakiro daadaŋ napedor kec.

² Iŋobelete ikes ŋimanikorin, ido kikamanasi. Iŋobelete ikes ŋirerya a ŋituŋa, ido todemasi. Edemanarete ŋituŋa ŋiboro kec.

³ Aŋun, ebala Ekapolon ebe, “Aye ayoŋ ayaun ŋican lotuŋa ŋul; ido nyibucarosi iyes alocan a ŋul. Nyirubakinete iyes ilosete iturosi, anerae eruwor apaki ŋin ŋina aronon.

⁴ Ŋina edolunio apaki ŋin, isitiyate ŋituŋa ŋatyokisyo ŋuna ipotu iyes toryamut, ikikyenatar iyes eosi, etemarete, ‘Ikimunaar isua jik, alema Ekapolon akwap kosi, ainaki neni a ŋulu apotu itorikosi isua ikirae ŋirikon.’ ”

⁵ Aŋun, amamukaun iyes anatukot a ŋituŋa ke Ekapolon ituŋanan ŋini ekorakinio ŋalup.

Ŋikadwarak ŋulu alyokonok

⁶ Ebasi ŋikadwarak kec neni kaŋ ebe, “Nyikilimonok isua ŋakiro ŋun daadaŋ. Nyelemari Ekapolon ajokis keŋ aneni kosi.

⁷ Itami iyoŋ icenen Ŋisirael a? Adaun mono atitinyikinit aneni ke Ekapolon a? Epedori mono iŋes kire akitiya ŋakiro ŋuna ikote ŋun a? Nyirworo mono iŋes alotooma arimao neni a ŋulu itiyaete ŋuna iyookino a?”

⁸ Abu Ekapolon toboŋok ŋikadwarak ŋulu alyokonok tema, “Itijiete iyes ŋituŋa kaŋ esibit ŋimoe, ilacete ŋikaasoi aneni a ŋituŋa a ŋulu emam ŋakiro eyakasi, aneni a ŋikalotok a ŋulu nyetamete ŋakiro ŋuna ke ejie.

⁹ Iritanarete iyes ŋaberu a ŋituŋa kaŋ alorerya kec a ŋulu ajokak. Ilemasi iyes jik ŋarereŋisyo ŋuna ainakinit ayoŋ ŋidwe a ŋituŋa kaŋ.

¹⁰ Tonyoutu, toloto, meere akibois na ŋina emaikina iyes kiboiyoto, anerae adaun amunaar, adau asecit kus akinyasun akibois na jik, mam ibore ipei daŋ epedori akitojokun iŋes jik.

¹¹ Ani kebu ekalyokonon, kori emodiyanot, ido tema, ‘Akadwarakini ayoŋ iyes epiini ŋolo alalan ka ŋagwe ŋuna alalak,’ eminakinete ŋituŋa ŋul ekadwaran ŋol.”

Akiikino ŋina ka alakuno

¹² “Okoe iyes ŋituŋa a Yakob, kire jik, akacunakini ayoŋ iyes daadaŋ iwapei, acunakini ayoŋ ŋipiya a Ŋisirael; acunakini ayoŋ ikes kaapei ikwa iudere ŋamesekin nanok, acununi ayoŋ ikes ikwa ecunere esipan a ŋamesekin anadakar; ilelebun ŋituŋa nakibois kus nooi.

¹³ Eŋaari Akuj erot aŋuna kec, ido toriku ikes anakwapin a ŋuna eya ikes erae ŋirikon, elomarete ikes alopukei a ŋitaunio a ŋulu eya erae ŋirikon, toloto emam ituŋanan iretakinit. Erikori ikes Ekapolon Erwosit kec apaki ŋina elomaryata.”