Mika 1 - Ebaibul

¹ Alorwa a ŋulu araakatar Yosam ka Aas ta Esekia ŋirwosi ŋulu a Yudaya, abu Ekapolon tolimok ŋakiro nu neni a Maika. Arae Maika ŋolo abunit alotaun a ŋolo a Moreses. Abu Ekapolon kisileerek Maika ŋakiro nu daadaŋ aŋuna a Samaria ka Yerusalem.

Atubokino a Samaria ka Yerusalem

² Kiirasi ŋakiro nu iyes ŋituŋa daadaŋ; topupokisi ŋakiro nu, iyes ŋulu iboiyete anakwap a daadaŋ. Elimori Ekapolon ŋolo Etiron ŋuna ikisitakinitor iyes. Irworo iŋes alo Kai keŋ anakuj.

³ Kiirasi! Ebunit Ekapolon anakibois keŋ; ebunit iŋes nakwap, ido itori kidiama ŋimoru.

⁴ Etalarete ŋimoru alokwap keŋ, ikwa etalarya amanok anakim; etiyaarosi ikes nakadipaalae, ikwa etiyaarotor ŋakipi kwap alomukura,

⁵ itiyakinosi ŋakiro ŋun daadaŋ, anerae adaut ŋituŋa a Yakob akibil ŋikisila, adaut ŋituŋa a Isirael akisec. Ai mono abilyata ŋituŋa a Yakob ŋikisila? Meere mono Samaria a? Ai mono aseciata ŋituŋa a Yudaya? Meere mono Yerusalem a?

⁶ Aŋun, eturuwori ayoŋ Samaria ereŋorot ŋolo etukotor ŋamoru anariet, akibois ŋina edupyo ŋikito ŋulu ke epiini, abukori ayoŋ ŋamoru keŋ nakadipaalat, ido emyek neni sek awuatar ŋarwatatain keŋ ileere.

⁷ Ebiliilaaryo ŋitorubei a ŋakujo ŋulu eya tooma keŋ. Icunyaryo ŋainakineta a ŋakujo keŋ daadaŋ, enyasuni ayoŋ ŋitorubei a ŋakujo keŋ daadaŋ. Aŋuna abunio Samaria tocunia ŋainakineta anamalao ka akilip neni a ŋakujo, isitiyao ŋainakineta ŋun amalaania nabo.

Amunyaro ŋina a ŋitaunio a Yudaya

⁸ Tolimu nai Maika atemar, aŋakiro a nu, egwori ka eololoe; arotokini emam ŋamuk ka aleri. Arui ikwa ekwee, arui ikwa etula.

⁹ Ikwaan ŋakiro a Samaria ka etoku; adolut ŋakiro ŋun tari Yudaya. adolut tari lokek a ŋituŋa kaŋ, Yerusalem elope.

¹⁰ Nyilimokis ŋituŋa a Gas ŋakiro ŋun; nyitoodikis ikes atemar igworosi iyes. Iyes ŋituŋa ŋulu a Bes-Leapira, kitoodiutu ŋican kus anakibelibelo anapuwa.

¹¹ Toema nakwapin ŋace, iyes ŋituŋa a Sapir toema ilerete ka ikirumito ŋileec. Emaikina ŋulu iboiyete alo Saanan, nyikatakis alomun alotaun kec. Ani iirarete iyes ŋituŋa a Bes-Esel igworosi, iyenunete iyes atemar mam epite ŋolo eemere akiŋop nen.

¹² Iyes ŋituŋa a Maros, kidara ŋuna ajokak ikiburit akiŋolikin, anerae ayau Ekapolon aronis nakwap, tari lopuke a Yerusalem.

¹³ Iyes ŋulu iboiyete alo Lakis, toenikisi ŋagaari naŋolei, anerae iyes ipotu kisyakis akisec, kiteseca Yerusalem. Iyes ŋituŋa a Lakis apotu kiteseca Ŋisirael.

¹⁴ Nai tokona iyes ŋituŋa a Yudaya, kimyekisi ŋituŋa a etaun a Moreses-Gas toloton. Emam akiŋarakinet eryamunete ŋirwosi a Ŋisirael alotaun a ŋolo ka Acisib.

¹⁵ Iyes ŋituŋa a Maresas, ikipotokini iyes Ekapolon neni a ŋimoe kus, a ŋulu ikamarete etaun kus. Eemete ŋikarikok a Ŋisirael akiŋop naturukan ŋina eyai Adulam.

¹⁶ Iyes ŋituŋa a Yudaya, tobanya ŋitim kus aŋuna a ŋidwe kus a ŋulu iminasi, tobanya ŋakyes kus toŋolyaakiata ikwa ŋuna a ŋataruk, anerae eyayio ŋidwe kus aneni kus, toruwor ŋulu a ŋakwapin a ŋace.