Mat. 28 - Ebaibul

Ayarun a Yesu

¹ Ani kelunyar akoloŋit ŋina a Sabato, akiwalaret ŋina ke Esabit, apotu Maria Magadalena ka Maria ŋinace toloto aanyun alyal.

² Ŋolopeikiro tomaranik akwap; bu emalaika ŋolo ke Ekapolon anakuj, kikokoriyo amoru nawae, kiboikin kidiama keŋ.

³ Anoki iŋes ikwa akimilyaunet ka akwaŋ elou keŋ kya ikwa ŋalepan.

⁴ Tobul ŋisigarya, tomaranikis kiketaros kikokis ŋituŋa ŋulu atwak.

⁵ Tolimok nai emalaika ŋaberu tema, “Nyikibul iyes, anerae ayeni ayoŋ atemar iwarito iyes Yesu ŋolo ebubukinio lomusalaba.

⁶ Emam iŋes a ne, anerae ayaru ikwaŋinapei alimunitor iŋes. Potu kiŋolikisi neni eperikinitoe iŋes.

⁷ Nai toloto atipei tolimokis ŋikasyomak keŋ atemar ayaru iŋes alokatwak ka elosi iŋes Galileya ikiŋarenikinit iyes; ianyunete iyes iŋes aina. Eŋuna adau ayoŋ alimokin iyes.”

⁸ Aŋun, torotokis ikes atipei analyal ebulit ka elakara nooi; toŋeda alimokin ŋikasyomak a Yesu ŋakiro daadaŋ.

⁹ Ŋolopeikiro, kiryamun Yesu ka ikes tolimok tema, “Toyai ekisil neni kus.” Potu ikes toryediko, totapa ŋakejen keŋ kilipa.

¹⁰ Tolimok Yesu ikes tema, “Nyikibul, toloto tolimokisi ŋikaitotoi kaŋ toloto Galileya, akaanyuwarete ikes ayoŋ aina.”

Ŋuna apotu ŋiketeok alyal kitatamut

¹¹ Ani erotokinete ŋaberu, torotokis ŋisigarya daŋ ŋice ŋulu eteete alyal lotaun, kitatamikis ŋisacaradotin ŋulu apolok ŋakiro daadaŋ ŋuna apotu totakanut.

¹² Ani ecunakinosi ŋisacaradotin ŋulu apolok ka ŋikatukok Natukot, tolemut ŋisiliŋa ŋulu alalak inakis ŋisigarya,

¹³ tolimokis ikes temasi, “Tolimokisi ŋituŋa atemar, ‘Apotu ŋikasyomak keŋ potu nakwaare tokokoiyasi akuwan keŋ ejotoo isua!’

¹⁴ Ani kiira ekapolon a Ŋiromanin ŋakiro ŋun, ikitunupi isua iŋes, nyiryamut iyes akisicanio.”

¹⁵ Kijaasi ŋisigarya ŋisiliŋa kiwuapa ŋakiro ŋuna alimokinitae. Ekeikina ŋakiro nu Loyudayan daadaŋ tari nakuwar na.

Totakanu Yesu lokasyomak keŋ

¹⁶ Toloto ŋikasyomak keŋ ŋulutomon ka epei Galileya, lomoru ŋolo sek alimokinit Yesu ikes alosit.

¹⁷ Ani iŋolikinete ikes iŋes, kilipa neni keŋ, nai aya ŋice ŋulu aŋayaŋayato.

¹⁸ Toapiya Yesu diyete kec tolimok ikes tema, “Akainakin ayoŋ apedor daadaŋ ŋina anakuj ka ŋina alokwap.

¹⁹ Aŋun, toloto kituruwosi ŋituŋa a ŋakwapin a daadaŋ ŋikasyomak kaŋ, kibatisata ikes alokiro a Papa ka a ŋolo a Lokoku ka a ŋolo ke Etau a ŋolo Asegan.

²⁰ Kitatama ikes toyenut ka kiwuapa ŋakiro daadaŋ ŋuna adau ayoŋ akicikakin iyes; ka daŋ toyenete atemar ikirukit ayoŋ ka iyes ŋirwa daadaŋ tari ŋina esalunia akwap.”