Mat. 26 - Ebaibul

Totukut ŋituŋa akiar Yesu

¹ Ani irikakini Yesu akitatam ŋakiro ŋun daadaŋ, tolimok ŋikeekasyomak tema,

² “Iyenete iyes atemar edoŋ ŋirwa ŋiarei todol akoloŋit ŋina a ŋasuban a ŋuna a Paska, ŋina ipotorere Lokoku a Ituŋanan kibubukinoe lomusalaba.”

³ Apotu nai ŋisacaradotin ŋulu apolok ka ŋikatukok tocunakinos kai a Kaipa a ŋolo apolokinit ŋisacaradotin;

⁴ tocamunos ikes daadaŋ amodiun Yesu, kikamuniata toara.

⁵ Nai temasi ikes, “Nyikikamu iŋes akoloŋit ŋina a Paska, ikotere nyebu aruruma alotuŋa.”

Kiwosakinae Yesu akimyet alo Betania

⁶ Ani imuji Yesu alo Betania alokai a Simoni a ŋolo sek adyaka atapon,

⁷ bu neni keŋ aberu ŋina aryoŋit amot ŋina ka Alabasta ŋina ayai akimyet ŋina akukunyon ŋina alal egyelit, tobukok akimyet ŋin nakou a Yesu a ŋolo emuji alomesa apaki ŋin.

⁸ Nai ani iŋolikinete ŋikasyomak keŋ ŋun, toŋoa nooi temasi, “Okoe ebalibal!

⁹ Anerae kerae togyelaritetei akimyet ŋin a ŋisiliŋa a ŋulu alalak, kekorakinitae ŋikulyak.”

¹⁰ Nai aŋuna ayenia Yesu ŋakiro ŋuna erworosi ikes, kiŋit tema, “Nyo icanitotor iyes aberu na? Kire etiya iŋes etic ŋolo ajokan neni kaŋ!

¹¹ Anerae irukito iyes ka ŋikulyak jwi jwi, nai nyikiruki iyes ka ayoŋ jwi jwi.

¹² Abukoki iŋes akimyet ŋina akukunyon na neni kaŋ akitemonokin anukia akuwan kaŋ.

¹³ Akalimokini ayoŋ iyes kire atemar, neni daadaŋ anakwap itatamere Ŋakiro ŋuna Ajokak nu, elimoryo tari ŋuna etiya aberu na, aŋuna ka atamunitor iŋes.”

Tocamu Yuda alukin Yesu

¹⁴ Akoloŋit ŋinapei ŋin, tolot epei a ŋulutomon ka ŋiarei ŋolo anyaritae Yuda Isikariot neni a ŋisacaradotin a ŋulu apolok;

¹⁵ kiŋit ikes tema, “Nyo ikiinakinete iyes ayoŋ, erae kepotu ayoŋ iŋes neni kus?” Tocamut ikes akitac iŋes a ŋisilipae a ŋatomoniuni.

¹⁶ Anyoun apaki ŋin, kiwar Yuda apaki ŋina etemokino torikorere ikes neni a Yesu.

Kimuja Yesu ka ŋikasyomak keŋ akimuj ŋina a Paska

¹⁷ Akoloŋit ŋina ke ekiŋaren ŋina a ŋasuban a ŋamugati aŋuna emam ŋakinyalet, potu ŋikasyomak a Yesu neni keŋ temasi, “Ai icamit iyoŋ isua etemokinioto akimuj ŋina a Paska?”

¹⁸ Toboŋok Yesu ikes tema, “Toloto lotaun neni a icetuŋanan, tolimokis iŋes ebe, ‘Ebala Eketataman, adol akaapaki, abuni ayoŋ ka ŋikasyomak kaŋ akinumunum ŋasuban ŋuna a Paska alokai kon.’ ”

¹⁹ Kitiyata ŋikasyomak keŋ ikwaŋina alimokinitor Yesu ikes, ido kitemokis Paska.

²⁰ Ani edoli eboŋ, kiboikin Yesu ka ŋikeekasyomak ŋulutomon ka ŋiarei kimuja.

²¹ Ani eriŋa ikes imujete tolimu iŋes tema, “Akalimokini ayoŋ iyes kire atemar, akalukini ayoŋ epei alokidiŋ kus.”

²² Tonomosi ikes ŋakiro ŋun ŋitai nooi, kiŋitiŋita iŋes a ŋipeipei ebasi, “Ekapolon, ayoŋ a?”

²³ Toboŋok Yesu tema, “Iŋes ŋolo ikimori ka ayoŋ anasaani.

²⁴ Etwani Lokoku a Ituŋanan ikwaŋina igiritere Nakigireta aŋuna keŋ, nai eroko nooi ŋakiro ŋuna eryamuni ŋolo ipotori Lokoku a Ituŋanan! Kejoikinit koloŋ ekile ŋol nyidoun!”

²⁵ Kiŋit Yuda ekalukinon iŋes tema, “Eketataman, ayoŋ a?” Toboŋok Yesu iŋes tema, “Idau iyoŋ alimun.”

Akimuj ŋina ke Ekapolon

²⁶ Ani eriŋa ikes imujete, tolemu Yesu amugati, ani kedau akilipakin, tonyilinyili, inak ŋikeekasyomak tema, “Kijaasi, kimuja; erae na akaakuwan.”

²⁷ Tolemu nabo ekopo, kitalaka Akuj, inak ikes tema, “Tomata iyes daadaŋ,

²⁸ anerae erae nugu ŋaokot kaŋ, ŋaokot ŋuna ka Acamunet, ŋuna ebukoritae ikotere ŋulu alalak isyoniyo ŋasecisya.

²⁹ Akalimokini ayoŋ iyes atemar, nyamasi nabo ŋuna ke epiini, mati kedol akoloŋit ŋina ikimasya iwon a Napukan a Papa kaŋ.”

³⁰ Toeikis nai ikes eete ŋolo kitalakaret Akuj, ido tolomasi kiŋa, toloto lomoru a ŋikito a ŋulu enyaritae Olipa.

Tolimu Yesu atemar epegi Petero atemar ayeni iŋes

³¹ Tolimok Yesu ŋikasyomak keŋ tema, “Lolo nakwaare, ielarosi iyes daadaŋ ikimyekis ayoŋ. Anerae igiritae Nakigireta ebe, ‘Abuni ayoŋ akibuŋa ekeyokon, kielar nai esipan a ŋamesekin.’

³² Nai kedaun akiteyarun ayoŋ, ekeŋarenikini ayoŋ iyes Galileya.”

³³ Tolimok Petero Yesu ka agogoŋu tema, “Nyekemyekini ayoŋ iyoŋ jik, tari kikimyekis iyoŋ ŋuluce daadaŋ!”

³⁴ Tolimok Yesu iŋes tema, “Akalimokini ayoŋ iyoŋ kire atemar, lolo nakwaare eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.”

³⁵ Tolimok Petero iŋes tema, “Nyapegi ayoŋ jik, tari ketemar akaaryo ayoŋ ka iyoŋ!” Apotu ŋulucekasyomak daadaŋ tolimut ŋunapei ŋun.

Kilip Yesu alo Getesemani

³⁶ Toloto nai Yesu ka ŋikasyomak keŋ neni anyaritae Getesemani, tolimok ikes a nen tema, “Kiboikinos nege eriŋa ayoŋ alosit ama akilip.”

³⁷ Torukosi iŋes ka Petero ka ŋidwe a Sebedeo ŋuluarei. Togeu akibul iŋes ka kiyaloloŋ nooi.

³⁸ Tolimok nai ikes tema, “Iyaloloŋi ekaatau nooi esibit eapi atwanare. Kiboikinos nege, tokienyete kaapei ka ayoŋ.”

³⁹ Torotok iŋes kiŋaren iwadio, kibusokin kwap kijuuru kilip tema, “Okoe! Papa, ani kepedor, tolema ekopo ŋolo a ŋican lo aneni kaŋ. Meere nai ikwa acamitor ayoŋ, nai ikwaŋina icamitor iyoŋ.”

⁴⁰ Toboŋo nai neni a ŋikasyomak keŋ toryamu ikes ejotoete. Kiŋit nai Yesu Petero tema, “Nyipedorete iyes akikieny ka ayoŋ epeisaa daŋ bon a?

⁴¹ Tokienyete ka kilipete, ikotere nyilomasi nakitemyet. Ecamit etau, nai epalag akuwan.”

⁴² Toboŋo nabo iŋes akilip tema, “Okoe! Papa, ani pa kitemokino alemar ekopo ŋolo a ŋican lo aneni kaŋ, alemar mati kamat iŋes, kitiyakin ŋuna icamit iyoŋ.”

⁴³ Ani eboŋuni iŋes nabo, toryamu ikes eriŋa ejotoete, anerae abu tokuruwo ikes akikieny.

⁴⁴ Toesik nabo Yesu ikes tolot kilip akilipet ŋina a ŋauni, kirwor ŋakiro ŋunapei sek.

⁴⁵ Toboŋu neni a ŋikasyomak keŋ tolimok ikes tema, “Eriŋa iyes ijotoete ka ieŋunito a? Kiŋolikisi, adol esaa ŋolo ipotokinere Lokoku a Ituŋanan nakan a ŋikasecak.

⁴⁶ Tonyoutu, oloto! Kiŋolikisi, adolu ekalukinon kaŋ!”

Akikamuno a Yesu

⁴⁷ Ani eriŋa Yesu irworo, todolu Yuda epei alokidiŋ ŋikasyomak ŋulutomon ka ŋiarei erukito ka ŋituŋa ŋulu atiŋito ŋatumio ka ŋabiroi. Eyakuunitae ikes aneni a ŋisacaradotin a ŋulu apolok ka ŋikatukok.

⁴⁸ Aris sek ekalukinon kelimoki ŋituŋa atemar, “Ŋolo anui ayoŋ, iŋes ŋolo; kikamutu iŋes!”

⁴⁹ Tolot Yuda neni a Yesu atipei tolimok iŋes tema, “Maata Eketataman!” Tonu iŋes.

⁵⁰ Tolimok Yesu iŋes tema, “Ekone, kitiya atipei ŋuna ibunitor iyoŋ!” Potu nai ikes kikamut Yesu ka agogoŋu.

⁵¹ Tolemu epei a ŋulu arukito ka Yesu atum, kitel akit ŋina ke epito a ŋolo ke esacaradoti a ŋolo apolon totubo.

⁵² Tolimok Yesu iŋes tema, “Kinyakak atum kon nakuraro, anerae ŋulu daadaŋ ejiete ka atum, earyo ka atum.

⁵³ Itami iyoŋ atemar nyapedori ayoŋ akiŋit Papa kaŋ kiyaku neni kaŋ atipei ŋajorei a ŋimalaikan ŋuna edeparito ŋatomon ka ŋaarei a?

⁵⁴ Nai ani kikokis neni, iyookinosi ikwaani Ŋakigireta ŋuna igiritae ebe itemokino ŋun totakanut?”

⁵⁵ Apaki ŋin tolimok Yesu ŋituŋa tema, “Kan nyo iponitotor iyes akikamun ayoŋ itiŋito ŋatumio ka ŋabiroi esibit arae ayoŋ ekokolan? A ŋinakoloŋit abu ayoŋ oyakaun Kai ka Akuj etatami, ipotu iyes nyikikamut ayoŋ.

⁵⁶ Nai etiyakinosi nugu daadaŋ kiyookinotor ŋuna igirito ŋikadwarak.” Toesikis nai ŋikasyomak daadaŋ iŋes kielaros.

Yesu alokiŋaren Atukot a Ŋiyudayan

⁵⁷ Torikosi ŋituŋa ŋulu ekamunete Yesu iŋes neni a Kaipa a ŋolo arae Esacaradoti ŋolo Apolon nooi, ka neni ka Atukot a ŋiketatamak a Ŋikisila ka neni a ŋikatukok.

⁵⁸ Nai ewuapit Petero Yesu aneni alwana tari tooma ere ŋolo ke Esacaradoti a ŋolo Apolon nooi. Toloma iŋes tooma, kiboikinos kaapei ka ŋisigarya idarit aanyun ŋuna itiyakinosi.

⁵⁹ Kiwara ŋisacaradotin ŋulu apolok ka Atukot daadaŋ erot ŋolo kisudokinet Yesu ŋakiro, ikotere totubokinere iŋes atwanare.

⁶⁰ Nai nyeryamut ikes ŋakiro ŋadi daŋ, ata ŋina alalaata ŋisuudae ŋulu alyokonok. Ekaku, potu ŋiarei kiŋaren

⁶¹ temasi, “Abala etuŋanan lo ebe, ‘Apedori akituwor Akai ka Akuj, odukok nabo alotooma ŋirwa ŋiuni.’ ”

⁶² Tonyou Esacaradoti ŋolo Apolon nooi, kiŋit Yesu tema, “Emam iyoŋ akirot ŋina iboŋokini a? Anukiro ikisitakinitotor iyoŋ ŋituŋa lu?”

⁶³ Nai kililiŋ Yesu cek. Tolimok Esacaradoti ŋolo Apolon nooi iŋes tema, “Ekesikoŋi ayoŋ iyoŋ alokiro ka Akuj a ŋina eyari, tolimokinae isua kirae iyoŋ Kristo Lokoku ka Akuj.”

⁶⁴ Tolimok Yesu iŋes tema, “Idau iyoŋ alimun. Nai akalimokini ayoŋ iyes atemar, kelunyar nu, ianyuwarete Lokoku a Ituŋanan iboi aloteten Akuj ŋina alokidiama nooi ka ebunit alokidiama ŋidouwon ŋulu anakuj.”

⁶⁵ Ŋolopeikiro, tocil Esacaradoti ŋolo Apolon nooi ŋilowi keŋ tema, “Eyany iŋes Akuj! Nyo nabo eriŋa ikiitanitor ŋisuudae ŋice? Iirasi tokona iyes ŋiyany keŋ.

⁶⁶ Ibasi tokona iyes ai?” Toboŋokis ikes temasi, “Itemokino totwan.”

⁶⁷ Kisyakis ikes akimwaanakin iŋes loreet, kibuŋata ŋice ka kibapabapata ŋice iŋes

⁶⁸ ebasi, “Todwar iyoŋ Kristo! Ŋae ikibap iyoŋ?”

Topeg Petero atemar ayeni Yesu

⁶⁹ Apaki ŋin, kiboiye Petero alokiŋa aneni alapatan. Bu apeiketiyan neni ayai iŋes tema, “Irukito iyoŋ daŋ ka Yesu ŋolo alo Galileya.”

⁷⁰ Nai topeg iŋes ŋun alokiŋaren kec daadaŋ tema, “Nyayeni ayoŋ ŋuna irworo iyoŋ.”

⁷¹ Ani eriŋa iŋes elosi nakan ŋina ke epuke, toanyuwa aketiyan ace iŋes, tolimok ŋulu awuasi alodiyete tema, “Arukito ekile logo ka Yesu ŋolo a Nasaret.”

⁷² Topeg nabo iŋes ŋun daŋ, kikoŋ tema, “Nyayeni ayoŋ ekile ŋol!”

⁷³ Ani elunyar apaki adio, potu ŋituŋa ŋulu awuasi alodiyete temasi neni a Petero, “Kire jik, irae iyoŋ daŋ epei alokidiŋ kec, anerae itoodiunit epite ŋolo irworor iyoŋ.”

⁷⁴ Togeu nai Petero akilama bon ka akikoŋ ebala, “Nyayeni ayoŋ ekile ŋol!” Apaki ŋinapei ŋin, toruuni ekokoroit.

⁷⁵ Totamu nai Petero ŋakiro ŋuna alimokinit Yesu iŋes atemar, “Ani eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.” Toloma iŋes kiŋa, kigwor nooi.