Mat. 24 - Ebaibul

Kirwor Yesu epite ŋolo inyasunere Akai ka Akuj

¹ Torotok Yesu alo Kai ka Akuj. Ani eriŋa elosi, potu ŋikeekasyomak kitoodikis iŋes epite ŋolo edukitere Akai ka Akuj.

² Nai tolimok Yesu ikes tema, “Iteete iyes ŋiboro lu daadaŋ a? Akalimokini ayoŋ iyes kire atemar, nyidoŋi nege tari amoru apei daŋ ŋina nyeukoryo.”

Ŋican ŋulu eponito alokiŋaren

³ Ani iboi Yesu alomoru a ŋikito a ŋulu enyaritae Olipa, potu ŋikasyomak keŋ kiŋita iŋes aneni kec make temasi, “Tolimokinae isua apaki ŋina etakanuniata ŋakiro ŋun daadaŋ, nabo nyo ikitaanyuni isua abunore kon ka asalunet ŋina ka akwap?”

⁴ Toboŋok Yesu ikes tema, “Tocoito nyikimodik idiotuŋanan iyes.

⁵ Anerae epote ŋikalalak irworosi alokiro kaŋ ebasi, ‘Arae ayoŋ Kristo!’ emodikinete kitooliyosi ŋikalalak.

⁶ Ani iirarete iyes ŋijiesyo ka ŋiemuto ŋulu a ŋijiyesyo, nyikibul, anerae itemokino ŋul totakanut, nai nyitoodiunito ikes atemar adol asalunet.

⁷ Ejikinosi ŋituŋa aŋakwapin, ejikin apukan ka apukan, eyakaun ŋironia ka emaranikini akwap anakiboisyo a ŋuna egelegelya.

⁸ Nai erae ŋun daadaŋ ageunet a ŋican, ikwaŋina egeunia aberu aryeba edoli akidoun.

⁹ “Ikikamunete ikes iyes ikisican ka itaari; ikiremokinosi iyes ŋituŋa daadaŋ aŋuna ke ekiro kaŋ.

¹⁰ Ejamakinete ŋikalalak anupit Akuj ŋirwa ŋul, eluwonokin ŋituŋa make todiŋanakin.

¹¹ Nabo epote ŋikadwarak ŋulu alalak ŋulu alyokonok, tomodikis kitooliyosi ŋikalalak.

¹² Aŋuna elalaaror aronis, editeuni amina Akuj alotuŋa a ŋulu alalak.

¹³ Nai ŋini etitinyikini tari nasalunet, eiunio.

¹⁴ Itatamio Ŋakiro ŋuna Ajokak ŋuna ka Apukan ka Akuj nakwapin daadaŋ, toyenut ŋituŋa daadaŋ, ani irikakin todolu asalunet.

Ekenyasunan ŋolo aronon nooi

¹⁵ “Iŋolikinete iyes ŋiboro ŋulu aronok eyakasi neni einakinitae Akuj, ikwaŋina koloŋ alimunitor ekadwaran Daniel, (toyenu ekasyoman apolou a ŋakiro a nu!)

¹⁶ Itemokino nai ŋulu eyakasi Yudaya, toema lomoru,

¹⁷ ŋini edokit akai, nyedoku kwap alemun ibore alokai keŋ;

¹⁸ ka ŋini eyai lomanikor, nyeboŋu aomun ekeelou.

¹⁹ Erokyarosi ŋakiro aneni a ŋaberu a ŋuna epotiyete kori itanakete ŋirwa ŋul!

²⁰ Kilipa Akuj tomamukaun asuronot ŋin nakiporo kori akoloŋit ŋina a Sabato.

²¹ Anerae alorwa a ŋul, eyakaunosi ŋakisicaneta ŋuna nyetakanuna ŋinapei kesubia Akuj akwap tari tokona, kori nyepote nabo jik ŋican ŋul.

²² Nai etuuruwuan Akuj ŋirwa ŋul. Kerae nyituuruwuanit, kemam ituŋanan epuun. Nai aŋuna aminar Akuj ŋulu aseunit iŋes, abu kituuruwuan ŋirwa ŋul.

²³ “Ani kikilimok iyes ituŋanan tema, ‘Kiŋolikisi, Kristo iŋes lo,’ kori tema, ‘Iŋes ye,’ nyinupa ŋakiro keŋ.

²⁴ Anerae epote atakristo ka ŋikadwarak ŋulu alyokonok. Epote ikes akitiya ŋakitoodyanakineta ka ŋaumonokineta ŋuna ailiilok, ikotere itooliyorete tari ŋituŋa ŋulu seuna, erae kepedorete.

²⁵ Topupokisi! Akalimokinit ayoŋ iyes ŋakiro nu eriŋa nyedoluno.

²⁶ “Kori ani kikilimokis iyes ŋituŋa temasi, ‘Eyai iŋes ama nariet!’ nyiloto inaa, kori ani ketemasi ‘Elo!’ nyinupa.

²⁷ Anerae ikoni abunore a Lokoku a Ituŋanan neni imilyaunia akimilyaunet alo Kide tari To.

²⁸ Neni eyai ibore ŋini atwan, iŋes iudakin ŋataruk.

Abunore a Lokoku a Ituŋanan

²⁹ “Ani elunyari ŋican ŋulu a ŋirwa a ŋul, iryoniar akoloŋ, nyecauni elap, ecakunosi ŋikacer anakuj, nabo emaranikinete ŋisubuna daadaŋ ŋulu alokidiama.

³⁰ Totakanu nai akitoodikinet a Lokoku a Ituŋanan anakuj. Ikalounete ŋibukui daadaŋ anakwap iŋolikinete Lokoku a Ituŋanan ebuni alodowuon eyakar apedor ka akica ŋina apolon nooi.

³¹ Iyakuuni iŋes ŋimalaikan keŋ apaki ŋina ekutakinere arupepe ŋina apolon, tocunakis ŋiseuna keŋ alowaetin ka akwap a daadaŋ, ameun anakisyakinet tari nasalunet.

Akitatamet ŋina ke ebobore

³² “Toyenutu akitatamet ŋina a kire alobobore. Ani ipuriteunete ŋaten keŋ ka tolibut ŋakwii, iyenunete iyes atemar aapuu akamu.

³³ Ikwaŋinapei, iyes daŋ ŋina iŋolikiniata ŋakiro ŋun daadaŋ etakanunete, toyenutu atemar aapuu Lokoku a Ituŋanan, adolu lokekia kus.

³⁴ Akalimokini ayoŋ iyes kire atemar, nyelunyar anyamet na eriŋa nyetakanuna ŋakiro ŋun daadaŋ.

³⁵ Edaunosi nakuj ka akwap, nai nyedaunosi ŋakaakiro jik.

Emam ituŋanan ŋini eyeni apaki ŋina ebunio Lokoku a Ituŋanan

³⁶ “Nai ŋuna ka akoloŋit a ŋin, kori ke esaa a ŋol, emam ituŋanan eyeni, nyeyenete tari ŋimalaikan ŋulu anakuj, kori tari Lokoku, nai mati Papa bon.

³⁷ Ikokinete ŋirwa ŋulu ebunio Lokoku a Ituŋanan ŋulu koloŋ a Noa.

³⁸ Anerae ŋirwa ŋul, eriŋa ŋakipi nyerapuwara akwap, apotu ŋituŋa kimuja ka tomatas. Apotu ŋikilyok kiitanasi, nabo epotonoryo ŋapesur kiitae akitodol akoloŋit ŋina alomarya Noa nataker.

³⁹ Nyeanyuna ikes ŋadikiro jik tari ŋina aponiata ŋakipi tomunyasi ikes daadaŋ. Ikokini nen abunore a Lokoku a Ituŋanan.

⁴⁰ Apaki ŋin eyakaun ŋikilyok ŋiarei lomanikor, eayo epei toesikinae ŋoloce.

⁴¹ Eryamunio ŋaberu ŋaarei iryeete, eayo apei kimyekinae ŋinace.

⁴² “Aŋun totenito, anerae nyiyenete iyes Akoloŋit ŋina ebunio Ekapolon kus.

⁴³ Toyenutu nu, kerae toyenunite elope akai esaa ŋolo ebunio ekokolan nakwaare, kekienyit iŋes ka pa kimyekinit ekokolan ituwuokini akai keŋ.

⁴⁴ Aŋun, itemokino iyes daŋ totenito, anerae ebuni Lokoku a Ituŋanan apaki ŋina nyitamakinitotor iyes atemar ebunio.

Eketiyan ŋolo kikinyoma ka ŋolo nyikinyoma

⁴⁵ “Ŋae nai erae eketiyan ŋolo aoson ŋolo kikinyoma, ŋolo aseu ekapolon keŋ apolokin ŋuluceketiyak tokoranakini akimuj edoli apaki?

⁴⁶ Erereŋ eketiyan ŋol ŋina ebunio ekeekapolon, toryamu iŋes itiyae ikoŋina!

⁴⁷ Akalimokini ayoŋ iyes kire atemar, iwuakini ekapolon iŋes topolok ebari keŋ daadaŋ.

⁴⁸ Nai ani kerae iŋes eketiyan ŋolo aronon, etemari alotau keŋ, ‘Adid ekapolon kaŋ,’

⁴⁹ togeu akibuŋa ŋiketiyak ŋuluce, kimuj ka tomatas ka ŋikamerak;

⁵⁰ eboŋuni nai ekapolon ke eketiyan a ŋol akoloŋit ŋina nyetamunitor iŋes ka esaa ŋolo nyeyeni iŋes.

⁵¹ Isicani ekapolon iŋes nooi, kimorik ka ŋikaŋisoswae; kigwor aina tokonyanak ŋikyal.