Mat. 19 - Ebaibul

Kitatam Yesu ŋuna ka akilak aberu

¹ Ani kedau Yesu erwor ŋakiro ŋun, torotok alo Galileya todoka ekekwaye aŋolol Yorodan tari nakwap a Yudaya.

² Kiwuapito iŋes ŋasepico a ŋituŋa ŋuna alalak, kitaŋaleu iŋes ikes aina.

³ Potu Ŋiparisayon ecamito akikatakin iŋes temasi, “Ecamakinito mono Ŋikisila yok ekile akilak akeeberu a ŋakiro a daadaŋ a ŋuna ecamit iŋes a?”

⁴ Toboŋok Yesu tema, “Nyesyoma iyes Akigiret ŋina ebala, ‘Anakisyakinet abu Akuj tosub ekile ka aberu’ ka nabo,

⁵ ‘Aŋakiro a ŋun, eesikini ekile papa keŋ ka toto keŋ, kimorikinos ka akeeberu. Toruworos ŋuluarei ŋul apeikuwan’ a?

⁶ Aŋun, nyeriŋa ikes erae ŋiarei, nai aruworosi apeikuwan. Aŋun, ŋulu emorik Akuj, nyitemokino idiotuŋanan etyaki.”

⁷ Kiŋita Ŋiparisayon iŋes temasi, “Nyo bo acamakinitor Moses ekile ainakin aberu abaruwa ŋina ke elakit ido kirit iŋes?”

⁸ Toboŋok Yesu ikes tema, “Aŋuna ka agogoŋu a ŋakyes kus, abu Moses itocamak iyes akilak ŋaberu kus. Nai amam ŋakiro ŋuna ekote ŋun anakisyakinet.

⁹ Akalimokini ayoŋ iyes atemar, ŋinituŋanan elaki akeeberu tomam nyelomit aberu keŋ, tosodi kiit ace, eruwor ekaloman.”

¹⁰ Tolimokis ŋikasyomak Yesu temasi, “Ani kikote ŋakiro ke ekile ka aberu nen, nyitemokino akiitar.”

¹¹ Toboŋok Yesu ikes tema, “Nyikamunito ŋakiro ŋun ŋituŋa daadaŋ mati ŋulu einakinit Akuj bon.

¹² Anerae egelegelya ŋakiro ŋuna nyepedoryata ŋituŋa akiitanar, ŋicetuŋa idounitoe ekolupaka, ŋice itokolupanete ŋituŋa ŋuluce; ŋice nyiitanarete aŋuna ka Apukan a ŋina anakuj. Iŋes ŋini epedori acamun akitatamet na, tocamu.”

Kiterereŋ Yesu ŋidwe ŋulu cicik

¹³ Yaut ŋituŋa ŋice ŋidwe neni a Yesu, ecamito iŋes kidokok ŋakan keŋ nakyes kec kilipak, nai kiŋenyakis ŋikasyomak ŋituŋa.

¹⁴ Nai tolimok Yesu ikes tema, “Kimyekisi ŋidwe potu neni kaŋ. Nyiretakis ikes, anerae erae Apukan ŋina anakuj ŋina a ŋulu ikote lu.”

¹⁵ Kidokok nai iŋes ŋakan keŋ nakyes a ŋidwe. Ani kiterereŋ iŋes ikes, torotok a nen.

Ekile ŋolo abarit

¹⁶ Bu epeikile neni a Yesu kiŋit iŋes tema, “Eketataman, nyo ibore ŋini ajokan ŋini itemokino ayoŋ etiya oryamunia akiyar ŋina nyedaun?”

¹⁷ Toboŋok Yesu iŋes tema, “Nyo ikiŋisitor iyoŋ ayoŋ ibore ŋini ajokan? Eyai epei bon ŋolo ejok. Ani kicamit iyoŋ alomar nakiyar, kiric Ŋakiciketa.”

¹⁸ Kiŋit iŋes Yesu tema, “Anukiciketa?” Toboŋok Yesu iŋes tema, “Nyiar, nyilom, nyikoko, nyisudi ŋakiro!

¹⁹ Tokerite papa kon ka toto kon, ka tomina ekidunyet kon ikwaŋina iminar iyoŋ akonikuwan.”

²⁰ Toboŋok esorokit ŋol tema, “Ericakinit ayoŋ Ŋakiciketa ŋun daadaŋ; nyo nai eriŋa akabucit ayoŋ?”

²¹ Tolimok Yesu iŋes tema, “Ani kicamit iyoŋ aruwor ituŋanan ŋini ajokan nooi, tolot togyela ŋiboro ŋulu iyakar iyoŋ daadaŋ tokorak lokulyak, ibu nai ikiwuapak ayoŋ. Iryamuni iyoŋ ebari kon anakuj.”

²² Ani iirari esorokit ŋol ŋakiro ŋun, torotok esiliyorit, anerae abarit iŋes nooi.

Etyono ekabaran alomar nakuj

²³ Tolimok Yesu ŋikeekasyomak tema, “Akalimokini ayoŋ iyes kire atemar, etyonior nooi ekabaran alomar Napukan ŋina anakuj.

²⁴ Nabo akalimokini ayoŋ iyes atemar, epatana ekaal alomar anapedot a ŋina ke esindan akilo ekabaran alomar Napukan ŋina ka Akuj.”

²⁵ Ani iirarete ŋikasyomak a Yesu ŋakiro ŋun, toumokis nooi temasi, “Ŋae bo nai eiun?”

²⁶ Kitek Yesu ikes tema, “Alotuŋa nyepedorosi, nai aneni ka Akuj epedorosi ŋiboro daadaŋ.”

²⁷ Tema nai Petero eboŋokini, “Kiŋolik iyoŋ, ikiesik isua ŋiboro daadaŋ ikiwuapak iyoŋ. Nyo ikiryamuni isua?”

²⁸ Tolimok Yesu ikes tema, “Kire akalimokini ayoŋ iyes atemar, anakwap a ŋina kitete apaki ŋina iboikinor Lokoku a Ituŋanan lokicoloŋ ŋolo ka apolou keŋ anakuj, iboikinosi iyes daŋ ŋulu ikiwuapakis ayoŋ lokicoloŋo ŋulutomon ka ŋiarei, atubonokin ŋatekerin ŋunatomon ka ŋaarei ŋuna a Isirael.

²⁹ Nabo ituŋanan daadaŋ ŋini aesiki ekeere kori ŋikaitotoi keŋ, papa keŋ, toto keŋ, aberu keŋ, ŋidwe keŋ, kori ŋamanat keŋ aŋuna kaŋ, einakinio eropit ŋolo erae amiat ŋarwa amiat, ka eryamuni akiyar ŋina nyedaun.

³⁰ Nai ŋulu alalak ŋulu iŋarenete tokona, isidiyoryo; nabo ŋulu isidiyoro tokona, isiŋarenio.”