Mat. 16 - Ebaibul

Kiitana ŋikarikok ŋulu ke edin ŋice adiokujuwuanut aneni a Yesu

¹ Potu Ŋiparisayon ka Ŋisadukayon neni a Yesu, kiŋita iŋes akitiyakin adiokujuwuanut ŋina ebunit anakuj.

² Toboŋok Yesu ikes tema, “Apaki ŋina edoiyorya akoloŋ itemarete iyes, ‘Ejokyar moi akwap, anerae ereŋ adis.’

³ Ani ereŋ adis taparacu, itemarete iyes, ‘Elosi akiru akilim, anerae ereŋ adis ka idisit neni ikitubuli.’ Iyenete iyes apolou ke epite ŋolo eyakar adis, nai ikipiyorit ayenun apolou a ŋakiro a ŋuna itiyasi ŋirwa lu!

⁴ Eroko nooi ŋituŋa a ŋirwa a lu nyekerito tari ŋina erae Akuj! Iwarito akitoodikinet ŋina ailiilon! Nai emam akitoodikinet ace ŋina ailiilon ŋina itoodikinio ikes mati ŋina ke ekadwaran a Yona.” Torotok nai Yesu toesik ikes.

Tocoito ekitatame ŋolo a Ŋiparisayon ka ŋolo a Ŋisadukayon

⁵ Ani edolete ŋikasyomak a Yesu ekekwaye anam, totamut atemar kimuryak ikes ayaun ŋamugati.

⁶ Tolimok Yesu ikes tema, “Tocoikinito ŋakinyalet ŋuna a Ŋiparisayon ka a Ŋisadukayon.”

⁷ Kirworikis ikes make temasi, “Irworo iŋes ŋun, anerae nyeyaunitae iwon ŋamugati.”

⁸ Nai aŋuna ayenia Yesu ŋuna erworosi ikes, tolimok ikes tema, “Iraakasi iyes ŋituŋa ŋulu edit anupit, kaanukiro irworotor iyes make ibasi imamukatar ŋamugati?

⁹ Ikwa eriŋa iyes nyeyenuna a? Nyitamunito iyes ŋina anyilinyilia ayoŋ ŋamugati ŋunakan ŋuna apotu ŋikilyok ŋalipyo ŋakan kimuja a? Ŋaditae ŋayai ipotu iyes kilelebikis akimuj ŋina apiyanun?

¹⁰ Ani bo ŋamugati ŋunakanikaarei ŋuna emujete ŋikilyok ŋalipyo ŋaomwon, ŋaditae ŋayai ipotu iyes kilelebikis akimuj ŋina apiyanun?

¹¹ Ikokinete nai iyes pa iyenete atemar pa erworo ayoŋ neni kus aŋuna a ŋamugati ai? Nai tocoikinito ŋakinyalet ŋuna a Ŋiparisayon ka ŋuna a Ŋisadukayon.”

¹² Toyenut nai ŋikasyomak atemar meere ŋakiro a ŋamugati aŋuna emam ŋasip kec erworo Yesu, nai ŋakiro ŋuna itatamete Ŋiparisayon ka Ŋisadukayon.

Toboŋok Petero Yesu tema, “Irae iyoŋ Kristo”

¹³ Ani elosi Yesu nakwap ŋina anyaritae Kaisaria Pilipi, kiŋit iŋes ŋikeekasyomak tema, “Ebasi mono ŋituŋa ŋae ayoŋ ŋolo abala arae Lokoku a Ituŋanan?”

¹⁴ Temasi ikes eboŋokinete, “Ebasi ŋice Yoana Ekebatisan, ebasi ŋice Eliya, ka ebasi ŋice Yeremiya, kori epei alokadwarak.”

¹⁵ Kiŋit Yesu ikes tema, “Ani bo iyes ibasi ŋae ayoŋ?”

¹⁶ Toboŋok Simoni Petero tema, “Irae iyoŋ Kristo, Lokoku ka Akuj a ŋina eyari.”

¹⁷ Tolimok Yesu Petero tema, “Irereŋ iyoŋ Simoni lokoku a Yona, anerae meere ituŋanan ikisileerek iyoŋ ŋakiro ŋun, nai erae Papa kaŋ ŋolo eyai nakuj.

¹⁸ Akalimokini ayoŋ iyoŋ atemar, irae iyoŋ Petero, (apolou keŋ atemar ataaba.) Nataaba ŋin iŋes adukokini ayoŋ akai kaŋ ka nyepedori atwanare akiloun iŋes.

¹⁹ Akainakini ayoŋ iyoŋ ŋikipuŋguwoi ŋulu ka Apukan a ŋina anakuj; ŋuna nyicamakini iyoŋ anakwap nyecamakinio tari anakuj; ka ŋuna icamakini iyoŋ anakwap ecamakinio anakuj.”

²⁰ Kicik nai iŋes ŋikeekasyomak nyelimokis ituŋanan ice atemar erae iŋes Kristo.

Kirwor Yesu ŋuna ka atwanare ka ayarun keŋ

²¹ Ameun apaki ŋinapei ŋin, togeu Yesu akisileerekin ŋikasyomak keŋ tema, “Itemokino ayoŋ olot Yerusalem ekesicani nooi alokatukok, alosacaradotin a ŋulu apolok, aloketatamak a Ŋikisila ka okaari. Nai kelunyar ŋirwa ŋiuni, ayaruni.”

²² Tonyaraiya Petero Yesu nawae togeu akisibura iŋes ebala, “Meere ikoŋina Ekapolon! Nyiryamasi ca ka ŋuna!”

²³ Toboboŋ Yesu tolimok Petero tema, “Tolot aneni kaŋ Satan! Irae iyoŋ ŋolo ikiretakinit ayoŋ, anerae ŋatameta kon nyeponito aneni ka Akuj, nai eponito alotuŋa.”

Alimokinet ŋina ka aŋero bon

²⁴ Tolimok nai Yesu ŋikeekasyomak tema, “Ŋinituŋanan ecamit akiwuapakin ayoŋ, itemokino toŋero bon, toryoŋ emusalaba keŋ, ekewuapak ayoŋ.

²⁵ Anerae ituŋanan daadaŋ ŋini iwarit akiricun akiyar keŋ, itotwaniyari, nai ŋini ejali akiyar keŋ aŋuna kaŋ eyari.

²⁶ Alipoida eryamuni ituŋanan erae keŋata iŋes akwap daadaŋ, nai totwania akiyar keŋ? Mam jik! Kori nyo epedorya ituŋanan akisyecia akiyar keŋ?

²⁷ Anerae ebuni Lokoku a Ituŋanan ka apedor a ŋina a Papa keŋ erukito ka ŋimalaikan, torop ŋinituŋanan ikwaŋina itiyator.

²⁸ Akalimokini ayoŋ iyes kire atemar, eya nege ŋice ŋulu nyetwakete nyeanyuwara Lokoku a Ituŋanan ebuni anapolou keŋ.”